మహిళా కమిషన్‌ ముందుకు కేటీఆర్ - బీఆర్‌ఎస్, కాంగ్రెస్‌ పోటాపోటీ ఆందోళనలు - ఉద్రిక్తత - BRS AND CONGRESS PROTEST

BRS and Congress Protest : మహాలక్ష్మి ఉచిత ఆర్టీసీ బస్సు పథకంపై అనుచిత వ్యాఖ్యలు చేశారనే ఫిర్యాదుపై కేటీఆర్​ నేడు మహిళా కమిషన్ ముందు హాజరయ్యారు. ఈ క్రమంలో బీఆర్‌ఎస్, కాంగ్రెస్‌ మధ్య పోటాపోటీగా ఆందోళనలు జరిగాయి. దీంతో మహిళా కమిషన్‌ కార్యాలయం వద్ద ఉద్రిక్త పరిస్థితులు నెలకొన్నాయి.

Protest at Women Commission Office :మహాలక్ష్మి ఉచిత ఆర్టీసీ బస్సు పథకంపై అనుచిత వ్యాఖ్యలు చేశారనే ఫిర్యాదు నేపథ్యంలో బీఆర్​ఎస్​ కార్యనిర్వాహక అధ్యక్షుడు కేటీఆర్‌ రాష్ట్ర మహిళా కమిషన్‌ ఎదుట విచారణకు హాజరయ్యారు. భారత రాష్ట్ర సమితి మహిళ ప్రతినిధులు, జీహెచ్​ఎంసీ కార్పొరేటర్లు కేటీఆర్‌ వెంట వచ్చారు. హైదరాబాద్‌ బుద్ధ భవన్‌లోని మహిళా కమిషన్‌ ముందు హాజరైన ఆయన, తన వ్యాఖ్యలపై వివరణ ఇచ్చారు. కేటీఆర్‌తో పాటు కార్యాలయం లోపలికి వెళ్లేందుకు బీఆర్​ఎస్​ మహిళా కార్పొరేట్లకు అనుమతి ఇవ్వకపోవడంతో వారు ప్రభుత్వానికి వ్యతిరేకంగా నినాదాలు చేశారు.

ఇదే సమయంలో కేటీఆర్​ మహిళలకు బహిరంగ క్షమాపణలు చెప్పాలని డిమాండ్‌ చేస్తూ మహిళా కాంగ్రెస్‌ అధ్యక్షురాలు సునీత నేతృత్వంలో ఆ పార్టీ శ్రేణులు బుద్ధభవన్ వద్ద ఆందోళనకు దిగడం ఉద్రిక్తతకు దారి తీసింది. క్షమాపణలు చెప్పేవరకు వదిలిపెట్టబోమంటూ మహిళా కమిషన్ కార్యాలయం వద్ద రాష్ట్ర అధ్యక్షురాలు సునీత బైఠాయించారు. సునీతను అక్కడి నుంచి పంపించేందుకు పోలీసులు శతవిధాలా ప్రయత్నించారు. కాంగ్రెస్‌కు పోటాపోటీగా బీఆర్​ఎస్​ మహిళ శ్రేణులు కూడా ఆందోళనకు దిగడంతో ఉద్రిక్తత నెలకొంది. పరస్పరం తోపులాటలు, నినాదాలతో మహిళా కమిషన్‌ కార్యాలయం ఎదుట పరిస్థితి రణరంగంగా మారింది. దీంతో పోలీసులు ఆందోళన చేస్తున్న మహిళా కాంగ్రెస్‌ నేతలు అరెస్టు చేశారు.

ఇదీ జరిగింది :ఆర్టీసీ బస్సుల్లో మహిళలకు ఉచిత ప్రయాణంపై బీఆర్​ఎస్​ మీటింగ్​లో కేటీఆర్‌ పలు వ్యాఖ్యలు చేశారు. బస్సుల్లో కుట్లు, అల్లికలు, వద్దు అనట్లేదని, అవసరమైతే బ్రేక్‌ డ్యాన్సులు వేసుకున్నా అభ్యంతరం లేదని అన్నారు. మహిళలపై అభ్యంతరకర వ్యాఖ్యలు చేశారని ఈ మేరకు మహిళా కమిషన్‌ కేటీఆర్‌కు నోటీసులు జారీ చేసింది. దీనిపై మరుసటి రోజే ఆయన స్పందించారు. తన వ్యాఖ్యలతో మహిళలకు మనస్తాపం కలిగితే విచారం వ్యక్తం చేస్తున్నానని ట్వీట్​ చేశారు. తన అక్కచెల్లెమ్మలను కించపరిచే ఉద్దేశం ఎప్పుడూ లేదని కేటీఆర్ వివరించారు. ఈ నేపథ్యంలో ఆ నోటిసులకు వివరణ ఇచ్చేందుకు కేటీఆర్‌ శనివారం కమిషన్‌ ఎదుట హాజరు కాగా బీఆర్​ఎస్​, కాంగ్రెస్​ శ్రేణుల మధ్య తీవ్ర ఉద్రిక్తత నెలకొంది.