Drainage System Expansion in Vijayawada :ఇటీవల వర్షాలు, వరదలు బెజవాడలో భూగర్భ డ్రైనేజీ వ్యవస్థను విస్తృతం చేయాల్సిన అవసరాన్ని చాటాయి. గత నెల 31, ఈ నెల 1న విజయవాడలో వర్షం కురిసింది. అప్పటికే వర్షం నీరు అనేక చోట్ల రోడ్లపై నిలిచింది. సైడ్ డ్రెయిన్లు, రోడ్లు ఏకమయ్యాయి. విజయవాడ నగర పాలక పరిధిలో 1.01 లక్షల ఇళ్లకు అండర్ గ్రౌండ్ డ్రైనేజీ కనెక్షన్లు ఉండగా, కనెక్షన్లు లేని నివాసాలు 1.09 లక్షలు ఉన్నాయి. చాలా మంది ఇండ్లకు అండర్ గ్రౌండ్ డ్రైనేజీ కనెక్షన్లు తీసుకోలేదు. అనేక చోట్ల నేటికీ ఓపెన్‌ డ్రెయిన్లే ఉన్నాయి. అవికూడా గత ఐదేళ్లూ సరైన నిర్వహణలేక పూడిపోయాయి.
'వర్షాలు పడినప్పుడు నీరు వెళ్లేందుకు ఏర్పాట్లు లేకపోవడంతో మురుగు కాల్వల నుంచి వరద బయటికి వస్తుంది. ఈ ప్రభావంతో బందరు రోడ్డు, ఏలూరు రోడ్డు, ఆటోనగర్ వందడుగల రోడ్డు, బెంజ్ సర్కిల్ ఫ్లైఓవర్ సర్వీసు రోడ్డు, మహానాడు రోడ్డు, గుణదల వంటి వివిధ కాలనీల రోడ్లను మురుగు ముంచెత్తుతోంది. ఆ సమయంలో బయటికి రావాలంటే ఇబ్బందులు ఎదుర్కొంటున్నాం.' -స్థానికులు
Vijayawada Sewerage Modernization Works :2014-2019 మధ్య అప్పటి తెలుగుదేశం సర్కార్ విజయవాడ నగరపాలిక పరిధిలో మురుగు కాలువల ఆధునీకరణ పనులు చేపట్టింది. కేంద్ర ప్రభుత్వాన్ని ఒప్పించి రూ. 462 కోట్ల నిధులు రాబట్టింది. పనులు సైతం ప్రారంభించింది. సుమారు రూ. 200 కోట్ల విలువైన పనులూ పూర్తి చేయించింది. వైఎస్సార్సీపీ అధికారంలోకి వచ్చాక డ్రైనేజీ పనులకు మంగళం పాడింది. కూటమి ప్రభుత్వం అధికారంలోకి రావడంతో నేడు మళ్లీ డ్రైనేజీ వ్యవస్థకు ఓ పరిష్కారం లభిస్తుందని ప్రజలు భావిస్తున్నారు.