Indian gymnast queen Dipa Karmakar Announces Retirement : దేశంలో జిమ్నాస్టిక్స్ రారాణి అంటే టక్కున వినిపించే పేరు దీపా కర్మాకర్ పేరే! ఆ రంగంలో ఆమె అంతలా తనదైన ముద్ర వేసింది. తాజాగా ఆమె సంచలన నిర్ణయం నిర్ణయం తీసుకుంది. రిటైర్మెంట్ ప్రకటించి అందరికీ షాకిచ్చింది.
కాగా, 2011 నేషనల్‌ గేమ్స్‌లో నాలుగు ఈవెంట్లలో బంగారు పతకాలు సాధించడంతో దేశవ్యాప్తంగా దీపా కర్మాకర్ పేరు మార్మోగింది. ఇంకా చెప్పాలంటే వాస్తవానికి దేశంలో అమ్మాయిలను జిమ్నాస్టిక్స్ వైపుగా నడిచేలా స్ఫూర్తి నింపింది కూడా ఆమెనే. ఆసియన్‌ గేమ్స్‌లోనూ బంగారు పతకం గెలిచి, అది సాధించిన తొలి భారత జిమ్నాస్ట్‌గానూ నిలిచింది. వరల్డ్‌ ఆర్టిస్టిక్‌ జిమ్నాస్టిక్స్ ఛాంపియన్‌షిప్స్‌, ఒలింపిక్స్‌కు అర్హత సాధించిన తొలి భారత మహిళా జిమ్నాస్ట్‌గా రికార్డుకెక్కింది. ఇంకా దేశీయ, అంతర్జాతీయ స్థాయిలో 77 పతకాలను తన ఖాతాలో వేసుకుంది.
కష్టాలకు ఎదురొడ్డి విజయతీరాలకు - దీపా కర్మాకర్ జీవితంలో చాలా కష్టాలను ఎదురొడ్డి జిమ్నాస్టిక్స్లో ఎవరికి అందనంత ఎత్తుకు చేరింది. చిన్నప్పటి నుంచి ఆమెకు జిమ్నాస్టిక్స్ అంటే ఎంత ఇష్టమో తెలిపేందుకు ఓ చిన్న ఊదాహరణ కూడా ఉంది. ఓసారి శిక్షణ గది బయట ఎదురు చూస్తున్నాడు దీప తండ్రి. గంటలు గడుస్తున్నాయి కానీ ఎంతసేపటికీ దీపా కర్మాకర్ బయటికి రాలేదు. ఇంట్లోనేమో బంధువులు ఎదురుచూస్తున్నారు. ఆరోజు దీప కర్మాకర్ బర్త్ డే. కేక్‌ కట్ చేయడానికి తండ్రి రమ్మంటే దీప ట్రైనింగ్‌ పూర్తవ్వాల్సిందేనని పట్టుబట్టింది. అప్పటికామెకు పదేళ్లు కూడా లేవు. అంతలా దీపకు జిమ్నాస్టిక్ అంటే ఇష్టం. ఇప్పటికీ దీప తీరు అదే విధంగా ఉంది. నిజానికి జిమ్నాస్టిక్స్ లోకి దీప అనుకోకుండా వచ్చింది. ఆరేళ్ల వయసులో ఆమె కోచ్‌ బిశ్వేశ్వర్‌ నంది దీపను ఎంపిక చేసి శిక్షణిచ్చారు.
రోజుకు 8గంటల సాధన - దీప కర్మాకర్ స్వస్థలం త్రిపురలోని అగర్తల. ఆమె తండ్రి నాన్న శాయ్‌లో వెయిట్‌ లిఫ్టింగ్‌ కోచ్‌గా ఉండేవారు. అయినా దీప ప్రయాణం అంత సులువగా ఏమీ సాగలేదు. అసలే ఎక్కడ పడిపోతానో, దెబ్బలు తగిలించుకుంటానో అని చిన్నప్పుడు భయపడేది దీప. దాన్ని దాటి నెమ్మదిగా ఇష్టం పెంచుకుంటోంటే జిమ్నాస్టిక్స్‌కు పనికి రాద’న్నారు. కారణం దీప పాదం పూర్తిగా నేలను తాకేది. అలా ఉన్నవారికి విన్యాసాలు చేయడంలో ఇబ్బందులు ఎదురవుతాయట. పాదాల్లో ఆ వంపు తెచ్చుకోవడానికి చాలా కష్టపడింది దీప. రోజూ 8 గంటలు కష్టపడి ప్రాక్టీస్ చేసేది. మంచి స్కూళ్లయితే శిక్షణకు ఇబ్బందని, ఉత్తీర్ణతను పెద్దగా పట్టించుకోని పాఠశాలలో చదివింది.
అరకొర సదుపాయాలతో - దీపకు శిక్షణా కాలంలో నిధులు, సరైన సదుపాయాల్లేవు. జిమ్‌లో వాడే పరుపులు, పాత స్కూటర్‌ భాగాలనే శిక్షణా వస్తువులుగా చేసుకుంది. అయినా నిరూపించుకోవాలన్న కసి దీప మనసు నిండా ఉండేది. అదే దీపను ప్రపంచానికి పరిచయం చేసింది. పతకం కోసం ప్రాణం పోయినా పర్లేదని దీప అంటుందని ఆమె సన్నిహితులు చెబుతుంటారు. అంతలా జిమ్నాస్టిక్స్ పై దీప మక్కువ పెంచుకుంది.