YS Sharmila on Jagan Bail : వైఎస్ విజయమ్మ బహిరంగ లేఖ రాయకపోతే ఆ లేఖతో సంబంధం లేదని, అది ఆమె రాయలేదని ఖండించే వారని ఏపీసీసీ అధ్యక్షురాలు వైఎస్ షర్మిలా రెడ్డి అన్నారు. జగన్ మోహన్ రెడ్డి బెయిల్ రద్దు చేసేందుకు తాము కుట్ర చేస్తున్నామనడం ఈ శతాబ్దపు పెద్ద జోక్ అని విమర్శించారు. ఈడీ అటాచ్ చేసింది షేర్లను కాదని, 32 కోట్లు విలువ చేసే కంపెనీ స్థిరాస్తి మాత్రమే అని గుర్తు చేశారు. షేర్ల బదలాయింపుపై ఎటువంటి ఆంక్షలు, అభ్యంతరాలు లేవని స్పష్టం చేశారు. గతంలో కూడా ఎన్నో కంపెనీల ఆస్తులను ఈడీ అటాచ్ చేసినప్పటికీ, వాటి షేర్లు, స్టాక్ మార్కెట్లో ట్రెండింగ్, బదిలీలను మాత్రం ఆపలేదని గుర్తు చేశారు.
బెయిల్ రద్దు అవుతుందని తెలియదా? :2016లో ఈడీ, భూములను అటాచ్ చేసినందు వల్ల షేర్ల బదిలీ చేయకూడదని జగన్ వింతగా చెప్పడం హాస్యాస్పదమని షర్మిల అన్నారు. 2019లో తనకు 100 శాతం వాటాలు బదలాయిస్తామని స్పష్టంగా పేర్కొంటూ ఎమ్ఓయూ మీద సంతకం చేశారని, అప్పుడు బెయిల్ రద్దు అవుతుందని తెలియదా అని ఆమె ప్రశ్నించారు. 2021లో క్లాసిక్ రియాలిటీ, సండూర్ పవర్కి చెందిన సరస్వతి షేర్లను రూ. 42 కోట్లకు విజయమ్మకు ఎలా అమ్మారో చెప్పాలని డిమాండ్ చేశారు. అప్పుడు స్టేటస్ కోను ఉల్లంఘించినట్లు కాదా అని నిలదీశారు. 2021లో జగన్, భారతి రెడ్డి తమ షేర్స్పై సంతకం చేసి, విజయమ్మకి ఫోలియో నెంబర్లతో సహా రాసి గిఫ్ట్ డీడ్ ఇచ్చారని, ఇచ్చే ముందు బెయిల్ రద్దు అవుతుందని తెలియదా అని ప్రశ్నలు సంధించారు.
'జరగకూడనివన్నీ జరిగిపోతున్నాయి' - వైఎస్సార్ అభిమానులకు విజయమ్మ బహిరంగలేఖ