Murder Accused Parole for Kids : తండ్రి కావాలనే కోరికను తీర్చేందుకు ఓ హత్య కేసులో నిందితుడిగా ఓ వ్యక్తికి పెరోల్ మంజూరు చేసింది దిల్లీలోని సాకేత్ కోర్టు. విదేశాల్లో ఉన్న తన భార్యతో కలిసి ఉండేందుకు ఆ వ్యక్తికి నాలుగు నెలల పాటు పెరోల్కు అనుమతిచ్చింది. గత 11 ఏళ్లుగా జైలులో ఉన్న రిధమ్ గిరోత్రాను రూ.5 లక్షలతో ష్యూరిటీ బాండ్తో విడుదల చేయాలని కోర్టు ఆదేశించింది.
ఇదీ జరిగింది
2013 సెప్టెంబర్ 13న రిధమ్ గిరోత్రా, అతడి నలుగురు స్నేహితులు కలిసి మద్యం సేవించేందుకు దిల్లీలోని కాల్కాజీలోని ప్రణీల్ షా అనే వ్యక్తి ఇంటికి వెళ్లారు. అందరూ మద్యం సేవించి తర్వాత వారిలోని అన్మోల్ సర్నా అనే వ్యక్తి, ప్రణీల్ ఇంట్లోని వస్తువులను బయటకు విసిరేయడం ప్రారంభించాడు. దీంతో ప్రణీల్కు, మిగతా వారి మధ్య గొడవ జరిగింది. ఈ విషయాన్ని గమనించిన పక్కన వాళ్లు ఇద్దరు వచ్చి గొడవను అదుపు చేసేందుకు ప్రయత్నించారు. కానీ ప్రణీల్ వారిని కూడా కొట్టి పరుగెత్తాడు. ఆ తర్వాత ప్రణీల్ అపస్మారక స్థితిలో కనిపించాడు. ఆస్పత్రికి తరలించగా అప్పటికే మృతి చెందినట్లు వైద్యులు తెలిపారు. దీనిని పోలీసులు హత్య కేసుగా నమోదు చేశారు. అప్పటి నుంచి రిధమ్ జైలులో విచారణ ఖైదీగా ఉన్నాడు.
భార్య ఇండియాకు రాలేదు
రిధమ్కు 2022లో లండన్లోని ఓ కంపెనీలో పని చేస్తున్న అక్షితా అహూజాతో వివాహం జరిగింది. రిధమ్ భార్యకు 2023లోనే యూకే పౌరసత్వం లభించింది. తనకు సంతానం కావాలని, రెండేళ్లుగా లండన్లో ఉంటున్న తన భార్యను కలిసేందుకు అనుమతి ఇవ్వాలని కోర్టును ఆశ్రయించాడు. విచారణ సందర్భంగా దిల్లీ పోలీసులు పెరోల్ మంజూరు చేసేందుకు వ్యతిరేకించారు. నిందితుడిపై మోపిన అభియోగాలు చాలా తీవ్రమైనవని, లండన్ వెళ్లేందుకు అనుమతిస్తే భారత్కు తిరిగి రాడని, తప్పించుకునేందుకే ఈ ప్లాన్ అని అన్నారు. అయితే, 2019లో కూడా ఫిలిప్పీన్స్లో ఉన్న తన తల్లిదండ్రులను కలిసేందుకు అనుమతిచ్చారని, ఆ సమయంలో ఎలాంటి నిబంధనలను ఉల్లఘించలేదని రిధమ్ తరఫు న్యాయవాది పేర్కొన్నారు. రిధమ్ భార్య ప్రస్తుతం ఇండియాకు రాలేదని, అతడే లండన్కు వెళ్లేలా అనుమతి ఇవ్వాలని కోర్టుకు విజ్ఞప్తి చేశారు.