சாலையில் நடந்து சென்ற சிறுமியை கடிக்க பாய்ந்த நாய்கள்.. பதைபதைக்க வைக்கும் காட்சி! - Stray dogs Attack issue - STRAY DOGS ATTACK ISSUE

திருப்பத்தூர்: திருப்பத்தூர் மாவட்டம் வாணியம்பாடி நகராட்சிக்கு உட்பட்ட பகுதிகளில் தெருநாய்கள் அதிகளவில் சுற்றித்திரிகிறது. அதனால், சாலையில் நடந்துச் செல்லும் போது, தெருநாய்களைக் கண்டு ஒருவித அச்சத்துடனே செல்வதாக அப்பகுதி மக்கள் வேதனையுடன் தெரிவிக்கின்றனர்.  

வாணியம்பாடி நகராட்சி தரப்பில் தெருநாய்களின் எண்ணிக்கையைக் கட்டுப்படுத்த உரிய நடவடிக்கைகள் மேற்கொண்டு வருவதாக விளக்கம் அளிக்கப்பட்டுள்ளது. ஆனாலும், வாணியம்பாடி நகராட்சியில் ஆங்காங்கே தெருநாய்களின் தொல்லை இருந்து வருகிறது.  

இந்த நிலையில், வாணியம்பாடி நகராட்சிக்குட்பட்ட ஆசிரியர் நகர்ப் பகுதியில் உள்ள வீதியில் தனியாக நடந்து சென்ற சிறுமியை, திடீரென 3 தெருநாய்கள் தாக்க முயற்சி செய்து அச்சுறுத்தியுள்ளது. அதனால், பயந்து கதறிய சிறுமி, வீதியோரமாகச் சென்றுள்ளார். அப்போது, அவ்வழியாக வந்த இருசக்கர வாகன ஓட்டி மற்றும் அக்கம்பக்கத்தினர் 3 தெருநாய்களையும் விரட்டியடித்து, சிறுமியைப் பத்திரமாக அவரது வீட்டிற்கு அனுப்பி வைத்தனர்.  

தற்போது சிறுமியை தெருநாய்கள் அச்சுறுத்தும் பதைபதைக்க வைக்கும் சிசிடிவி காட்சி வெளியாகி பெரும் பரபரப்பை ஏற்படுத்தியுள்ளது. நாய்கள் எப்போது தாக்கும் என்பது தெரியாமல், பயத்துடனே நடந்து செல்ல வேண்டிய அவல நிலை உருவாகிவிட்டது. ஆகையால், வாணியம்பாடி நகராட்சி அதிகாரிகள் தெருநாய்களின் எண்ணிக்கையை கட்டுப்படுத்த உடனடி நடவடிக்கை மேற்கொள்ள வேண்டும் என பொதுமக்கள் கோரிக்கை விடுத்துள்ளனர்.  

ஈடிவி பாரத் தமிழ் வாட்ஸ்ஆப் சேனலில் இணைய இங்கே கிளிக் செய்யவும்