சென்னை: தனியார் யூடியூப் சேனலுக்கு அளித்த நேர்காணலின் போது, நடிகர் பிரசாந்த் ஹெல்மெட் அணியாமல் தொகுப்பாளருடன் சென்ற வீடியோ சமூக வலைத்தளங்களில் வைரலானது. இதனைத் தொடர்ந்து, பிரசாந்த் மற்றும் தொகுப்பாளர் இருவரும் ஹெல்மெட் அணியாமல் சென்றதாக 2,000 ரூபாய் அபராதம் விதித்து சென்னை போக்குவரத்து காவல்துறை நடவடிக்கை எடுத்தது.
இதனைத் தொடர்ந்து செய்தியாளர் சந்திப்பில் பேசிய பிரசாந்த், “ஹெல்மெட் அணியாமல் வாகனம் ஒட்டியதால் போலீசார் அபராதம் விதித்தனர் எனவும், ஹெல்மெட் குறித்து விழிப்புணர்வு ஏற்படுத்த இலவச ஹெல்மெட் வழங்கி வருவதாகவும்” தெரிவித்தார்.
இந்நிலையில், நடிகர் பிரசாந்திற்கு அபராதம் விதிக்கப்பட்டதை மையப்படுத்தி, சென்னையில் பிரபல யூடியூபர் இர்பான் தலைக்கவசம் மற்றும் வாகன எண் இல்லாமல் பயணம் செய்திருந்தது குறித்து பலரும் சமூக வலைத்தளங்களில் பரப்பி விமர்சனங்களை எழுப்பினர்.
இதனையடுத்து, யூடியூபர் இர்ஃபானுக்கு தலைகவசம் அணியாமல் சென்றது மற்றும் வாகன எண் இல்லாமல் பயணித்ததற்காக 1,500 ரூபாய் விதித்து சென்னை பெருநகர போக்குவரத்து காவல்துறை உத்தரவிட்டுள்ளது. யூடியூபர் இர்பானுக்கு அபராதம் விதித்தது தொடர்பாக, சென்னை பெருநகர போக்குவரத்து காவல்துறை தனது அதிகாரப்பூர்வ X தளத்திலும் பதிவிட்டுள்ளது.