புதுக்கோட்டை: மதிமுக முதன்மை செயலாளரும் திருச்சி நாடாளுமன்ற உறுப்பினருமான துரை வைகோ புதுக்கோட்டையில் இன்று செய்தியாளர்களை சந்தித்து பேசினார். அப்போது அவர், "உதயநிதிக்கு வாரிசு அடிப்படையில் துணை முதலமைச்சர் பொறுப்பு வழங்கப்படவில்லை. அவருடைய திறமை மற்றும் செயல்பாடு காரணமாகவே அவருக்கு துணை முதலமைச்சர் பதவி வழங்கப்பட்டுள்ளது.
பேச்சுவார்த்தை மூலமாக காவிரி விவகாரத்தை தீர்க்க முடியாது. ஏற்கனவே உச்ச நீதிமன்றம் வழங்கியுள்ள தீர்ப்பின் அடிப்படையிலேயே இதனை அணுக வேண்டும். தேர்தல் பத்திர விவகாரத்தில் மிகப்பெரிய மோசடி நடந்துள்ளது. தேர்தல் பத்திரத்தின் மூலமாக பாஜக பல்வேறு முறைகேடுகளில் ஈடுபட்டுள்ளது.
அதேபோல, பரந்தூர் விமான நிலையத்தை பொருத்தவரை அங்குள்ள மக்களின் எண்ணங்களை கேட்டு அதன் அடிப்படையிலேயே திட்டத்தை செயல்படுத்த வேண்டும்" என்று தெரிவித்தார்.
மேலும் தொடர்ந்து பேசிய அவர், "திருமாவளவனின் மது விலக்கு மாநாட்டிற்கு 100 சதவீதம் எங்களின் ஆதரவை அளிக்கிறோம். பூரண மதுவிலக்கு தான் எங்களின் எண்ணமும். அரசியல் இயக்கங்கள் நினைத்தால், பூரண மதுவிலக்கை கொண்டு வர முடியாது. மக்கள் மனதில் மாற்றம் வர வேண்டும், மக்கள் நினைத்தால் தான் பூரண மதுவிலக்கு சாத்தியம்.
தமிழகத்தில் கடுமையான நிதி தட்டுப்பாடு மற்றும் நிதி நெருக்கடி உள்ளது. மத்திய அரசின் ஒத்துழைப்பு தமிழக அரசுக்கு இல்லை. இதுமட்டும் அல்லாது, மத்திய அரசுப் பள்ளிக் கல்வித்துறைக்கான நிதியையும் தேசிய கல்விக் கொள்கையை ஏற்காததால் வழங்காமல் நிறுத்தி வைத்துள்ளது. இதனால், தமிழக பள்ளிக் கல்வித்துறையும் கடுமையான நிதி நெருக்கடியில் உள்ளது.