பிப்.8-இல் நாடாளுமன்ற வளாகத்தில் கருப்பு சட்டை அணிந்து போராட்டம் - டி.ஆர்.பாலு அறிவிப்பு!

DMK Protest: தமிழகத்திற்கு புயல் வெள்ள பாதிப்பிற்கு நிவாரணம் அளிக்காததைக் கண்டித்து திமுக, கூட்டணி கட்சி நாடாளுமன்ற உறுப்பினர்கள் கருப்புச் சட்டை அணிந்து கண்டன ஆர்ப்பாட்டத்தில் ஈடுபட உள்ளதாக திமுக நாடாளுமன்ற குழுத் தலைவர் டி.ஆர்.பாலு தெரிவித்துள்ளார்.

சென்னை:இடைக்கால பட்ஜெட்டில் தமிழகத்திற்கு வெள்ள நிவாரண நிதி அறிவிக்காததைக் கண்டித்து, திமுக மற்றும் கூட்டணி கட்சி எம்பிக்கள் நாடாளுமன்ற வளாகத்தில் பிப்ரவரி 8ஆம் தேதி கண்டன ஆர்ப்பாட்டத்தில் ஈடுபட உள்ளதாக முதலமைச்சர் ஸ்டாலின் அறிவித்துள்ளார்.

இது குறித்து திமுக நாடாளுமன்ற குழுத் தலைவரும், ஸ்ரீபெரும்பதூர் எம்பியுமான டி.ஆர்.பாலு வெளியிட்டுள்ள அறிக்கையில், “திமுக தலைவரும், தமிழ்நாடு முதலமைச்சருமான மு.க.ஸ்டாலினின் ஆணைக்கிணங்க, ஒன்றிய அரசின் இடைக்கால நிதி நிலை அறிக்கையில் தமிழ்நாட்டுக்கு புயல் வெள்ள நிவாரண நிதி உதவி மற்றும் வளர்ச்சித் திட்டங்களுக்கு உரிய நிதியை ஒதுக்கீடு செய்யாத ஓரவஞ்சனையைக் கண்டித்து, எதிர் வரும் பிப்ரவரி 8 அன்று காலை 10 மணிக்கு திமுக மற்றும் தோழமை எம்.பிக்கள் டெல்லியில் நாடாளுமன்ற வளாகத்திலுள்ள காந்தி சிலை முன்பு கருஞ்சட்டை அணிந்து கண்டன ஆர்ப்பாட்டம் நடைபெறும்.

இந்த ஆர்ப்பாட்டத்தில் தமிழ்நாட்டைச் சேர்ந்த தோழமைக் கட்சி எம்.பிக்களும் கலந்து கொள்ள வேண்டுமென கேட்டுக் கொள்கிறேன். சென்ற பிப்ரவரி 1 அன்று, வரும் நிதியாண்டு 2024-2025க்கான இந்திய ஒன்றிய அரசின் இடைக்கால நிதி நிலை அறிக்கையை நிதி அமைச்சர் நிர்மலா சீதாராமன் மக்களவையில் தாக்கல் செய்தார்.

அதில், அன்மையில் 2023 டிசம்பர் மாதத்தில் தமிழ்நாட்டைப் புரட்டிப் போட்ட வரலாறு காணாத புயல் மழை வெள்ள சேதங்களை சரிசெய்யவும், நிவாரண உதவியாகவும் 37,000 கோடி ரூபாய் தந்து உதவிட வேண்டும் என்ற தமிழ்நாடு அரசு கோரிக்கை பற்றி எந்த அறிவிப்பும் இல்லை.

அதேபோல, மதுரை எய்ம்ஸ் உள்ளிட்ட தமிழகத்தின் வளர்ச்சித் திட்டங்களுக்கான உரிய நிதி ஒதுக்கீடு குறித்தும் இடைக்கால பட்ஜெட்டில் அறிவிப்புக்கள் இடம் பெறவில்லை. இந்நிலையில், தமிழ்நாட்டுக்கு அன்னிய முதலீடு திரட்டும் நோக்கில் ஸ்பெயின் நாட்டில் பயணம் மேற்கொண்டு முதலமைச்சர் மு.க.ஸ்டாலின் மத்திய அரசை வன்மையாக கண்டித்ததுடன், திமுக நாடாளுமன்ற உறுப்பினர்கள் காந்தி சிலை எதிரில் கருஞ்சட்டை அணிந்து போராட்டம் நடத்துவர் என்றும் அறிவித்தார். அதன்படி, திமுக நாடாளுமன்ற உறுப்பினர்கள் 8.2.2024 அன்று கண்டன ஆர்ப்பாட்டம் நடத்த உள்ளனர்” என குறிப்பிடப்பட்டுள்ளது.

ஜனவரி 31ஆம் தேதி குடியரசுத் தலைவர் திரவுபதி முர்மு உரையுடன் நாடாளுமன்ற கூட்டத்தொடர் தொடங்கியது. இந்நிலையில், குடியரசு‌த் தலைவர் உரைக்கு நன்றி தெரிவிக்கும் தீர்மானத்தின் மீதான விவாதம் நேற்று (பிப்.2) நடைபெற்றது. அதில் கலந்து கொண்டு பேசிய எம்பி டி.ஆர்.பாலு, மத்திய அரசு மாற்றாந்தாய் மனப்பான்மையுடன் நடந்து கொள்வதாகப் பேசினார்.

அவரது உரையில், “குடியரசு‌த் தலைவர் தனது உரையில் அரசின் கொள்கைகளையும், திட்டங்களையும்தான் எடுத்துக் கூறி உள்ளார். தனது சொந்த கருத்துக்கள் எதையும் சொல்லவில்லை. அவரது உரை அரசு தயாரித்த உரை. அதனை குடியரசுத் தலைவர் முர்மு, அச்சு பிறழாமல் கடைசி வார்த்தை வரை அப்படியே பேசி உள்ளார். அதுதான் மரபு. அதற்காக முர்முக்கு நன்றி கூறியே ஆக வேண்டும்.

அதற்காக அவரது உரையில் பிரதிபலிக்கப்பட்டுள்ள, திமுகவின் கொள்கை கோட்பாடுகளுக்கு எதிரான ஒன்றிய அரசின் கொள்கைகள், செயல்பாடுகள் அனைத்தையும் திமுக ஏற்பதாக பொருள் அல்ல. குடியரசுத் தலைவரைப் போல் அல்லாமல், பல ஆளுநர்கள் குறிப்பாக தமிழ்நாடு ஆளுநர், மாநில அரசு கொடுத்த உரையில் இல்லாத விஷயங்களைப் பேசினார். சில ஆளுநர்கள் மாநில அரசு தங்கள் அரசு என்பதை மறந்து, எதிர்கட்சித் தலைவர்களுடன் போட்டி போடும் வகையில், அரசுக்கு எதிரான நடவடிக்கைகளை மேற்கொள்வதை வழக்கமாகவே வைத்துள்ளனர்.

பிரிட்டிஷ் கால ஆளுநர்கள் போல, தாங்கள்தான் அனைத்தும் அறிந்தவர்கள் என்ற போக்கில் செயல்படுகிறார்கள். அரசியலமைப்புச் சட்டத்தை மதிக்காமல், கோடிக்கணக்கான மக்களால் தேர்ந்தெடுக்கப்பட்ட மாநில அரசுகளை மதிக்காமல் மக்கள் தீர்ப்பை காலடியில் போட்டு மிதிக்கும் விதத்தில் செயல்படுகிறார்கள். அத்தகைய ஆளுநர்களைக் கண்டித்து, அவர்களை அரசியலமைப்புச் சட்டத்தின்படி பணியாற்ற வைக்க குடியரசுத் தலைவர் முன்வர வேண்டும்” எனத் தெரிவித்திருந்தார்.