சென்னையில் வெளுத்து வாங்கிய கனமழை.. வேரோடு சாய்ந்த 80 வருட பழமையான ஆலமரம்! - Chennai rain

Chennai Rains: சென்னை மற்றும் அதன் புறநகர்ப் பகுதிகளில் நேற்று இரவு காற்று, இடி மின்னலுடன் பெய்த கனமழைக்கு, ஓமந்தூரார் அரசு பன்னோக்கு மருத்துவக் கல்லூரி மருத்துவமனையில் 80 வருடங்களாக இருந்த மரம் வேரோடு சாய்ந்துள்ளது.

சென்னை: கடந்த சில நாட்களாக மதிய நேரங்களில் சென்னைவாசிகளை வெயில் வாட்டி வதைத்து வந்த நிலையில், மாலை மற்றும் இரவு நேரங்களில் சென்னையின் ஒரு சில பகுதிகளில் விட்டு விட்டு லேசான மழை பெய்து வந்தது. இந்த நிலையில் நேற்றைய தினம் (திங்கட்கிழமை) சென்னை மற்றும் அதன் புறநகர்ப் பகுதிகளில் கடும் வெயில் வீசியதால் மக்கள் கடும் சிரமத்திற்குள்ளாகினர்.

மேலும், இரவு 12 மணி வரையிலும் அதிகளவில் புழுக்கம் நிலவியது. பிறகு வானிலை முற்றிலும் தலைகீழாக மாறி கடும் காற்றுடன், இடி மின்னலுடன் கூடிய கனமழை சென்னையின் பல்வேறு பகுதிகளிலும், சென்னையின் புறநகர்ப் பகுதிகளிலும் கொட்டித்தீர்த்தது.

அதாவது, சென்னையில் அண்ணா சாலை, தேனாம்பேட்டை, நுங்கம்பாக்கம், மீனம்பாக்கம், எழும்பூர், சிந்தாதிரிப்பேட்டை, மயிலாப்பூர், திருவல்லிக்கேணி, பாரிமுனை, கோயம்பேடு, அண்ணா நகர், முகப்பேர், அமைந்தகரை, கிண்டி, ஈக்காட்டுத்தாங்கல் உள்ளிட்ட பகுதிகளிலும், சென்னையின் புறநகர்ப் பகுதிகளாக இருக்கக்கூடிய போரூர், பூந்தமல்லி, மதுரவாயில், அம்பத்தூர், தாம்பரம், குன்றத்தூர் உள்ளிட்ட பல்வேறு பகுதிகளிலும் நேற்று இரவு நல்ல மழை பெய்தது.

குறிப்பாக, சென்னையின் புறநகர்ப் பகுதியாக இருக்கக்கூடிய பூந்தமல்லியில் 10 சென்டிமீட்டர் மழை பெய்துள்ளது. நேற்றைய தினம் சென்னையில் நல்ல மழை பெய்த காரணத்தால், இன்று காலை வேளையில் சென்னை முழுவதும் குளிர்ந்த சூழல் நிலவியது. இதனால், பொதுமக்கள் மிகுந்த மகிழ்ச்சி அடைந்துள்ளனர்.

அதுமட்டுமின்றி, சென்னையில் நேற்று இரவு பெய்த கனமழைக்கு ஓமந்தூரார் அரசு பண்ணோக்கு மருத்துவக் கல்லூரி மருத்துவமனையில், சுமார் 80 வருடங்களாக நிழல் தந்துவந்த ஆலமரம் ஒன்று வேரோடு சாய்ந்துள்ளது. இந்த ஆலமரம் பழங்கால மரம் என்பதால், நேற்று கனமழையுடன் வீசிய காற்றுக்கு சுமார் 2 மணியளவில் விழுந்துவிட்டதாகவும், நல்வாய்ப்பாக உயிர் சேதம் எதுவும் இல்லை எனவும் கூறப்படுகிறது.

3 மாவட்டங்களில் மழைக்கு வாய்ப்பு: தமிழ்நாட்டில் இன்று கன்னியாகுமரி, தேனி, தென்காசி ஆகிய மாவட்டங்களில் இடியுடன் கூடிய மழைக்கு வாய்ப்புள்ளதாக சென்னை வானிலை ஆய்வு மையம் தெரிவித்துள்ளது.