சொந்த ஊருக்கு போறீங்களா?... அப்போ முதல்ல இதை படிங்க!

Special Bus: சனிக்கிழமை பௌர்ணமி மற்றும் வாரஇறுதி நாட்கள் முன்னிட்டு, திருவண்ணாமலை மற்றும் தமிழ்நாட்டின் இதர இடங்களுக்கு சிறப்பு பேருந்து இயக்கவுள்ளதாக தமிழ்நாடு அரசு விரைவு போக்குவரத்துக் கழக மேலாண் இயக்குநர் தகவல் தெரிவித்துள்ளார்.

திருவண்ணாமலை: பிப்ரவரி 24ஆம் தேதி சனிக்கிழமை பௌர்ணமி மற்றும் பிப்ரவரி 25ஆம் தேதி ஞாயிறு விடுமுறையை முன்னிட்டு, பிப்.23 முதல் பிப்.25ஆம் தேதி வரை சென்னையிலிருந்து திருவண்ணாமலைக்கும், இதர இடங்களுக்கும் மற்றும் பிற இடங்களிலிருந்தும் கூடுதலான பயணிகள் தமிழ்நாடு முழுவதும் பயணம் மேற்கொள்வார்கள் என எதிர்பார்க்கப்படுகிறது.

இதனை கருத்தில் கொண்டு தமிழ்நாடு அரசு போக்குவரத்துக் கழகங்கள் தினசரி இயக்கப்படும் பேருந்துகளுடன், கூடுதலாக சிறப்பு பேருந்துகளை இயக்கத் திட்டமிட்டுள்ளது. அதாவது, சென்னை கிளாம்பாக்கத்திலிருந்து திருவண்ணாமலை, திருச்சி, கும்பகோணம், மதுரை, திருநெல்வேலி, நாகர்கோவில், கன்னியாகுமரி, தூத்துக்குடி, கோயம்புத்தூர், சேலம், ஈரோடு, திருப்பூர் ஆகிய இடங்களுக்கு பிப்ரவரி 23ஆம் தேதியன்று 730 பேருந்துகளும், பிப்ரவரி 24ஆம் தேதியன்று 640 பேருந்துகளும் இயக்கப்படுகிறது.

சென்னை கோயம்பேட்டிலிருந்து நாகை, வேளாங்கண்ணி, ஓசூர், பெங்களூரு ஆகிய இடங்களுக்கு பிப்ரவரி 23ஆம் தேதியன்று (வெள்ளிக்கிழமை) 80 பேருந்துகளும் மற்றும் பிப்ரவரி 24ஆம் தேதியன்று (சனிக்கிழமை) 80 பேருந்துகளும் இயக்க திட்டமிடப்பட்டுள்ளது. மொத்தமாக தினசரி இயக்க கூடிய பேருந்துகளுடன் கூடுதலாக 23ஆம் தேதி 810 சிறப்பு பேருந்துகளும், 24ஆம் தேதி 720 பேருந்துகளும் மேற்கூறிய இடங்களிலிருந்தும் மற்றும் பெங்களூர், திருப்பூர், ஈரோடு மற்றும் கோயம்புத்தூர் ஆகிய இடங்களிலிருந்தும், பல்வேறு இடங்களுக்கும் 200 சிறப்பு பேருந்துகளும் இயக்க திட்டமிடப்பட்டுள்ளது.

மேலும், அரசு விரைவுப் போக்குவரத்துக் கழகம் மூலமாக இருக்கை மற்றும் படுக்கை வசதி கொண்ட குளிர்சாதனம் கொண்ட 30 பேருந்துகள், சென்னை கிளாம்பாக்கத்திலிருந்து திருவண்ணாமலைக்கு பிப்.23 மற்றும் பிப்.24 ஆகிய நாட்களில் இயக்க நடவடிக்கை மேற்கொள்ளப்பட்டுள்ளது. இதில் முன்பதிவு செய்து பயணிக்கவும் வழிவகை செய்யப்பட்டுள்ளது.

அதனைத் தொடர்ந்து, ஞாயிற்றுக்கிழமை சொந்த ஊர்களில் இருந்து சென்னை மற்றும் பெங்களூர் திரும்ப வசதியாக, பயணிகளின் தேவைகேற்ப அனைத்து இடங்களிலிருந்தும் சிறப்பு பேருந்துகள் இயக்கிட திட்டமிடப்பட்டுள்ளது. இந்த நிலையில், இந்த வார இறுதியில் வெள்ளிக்கிழமை பயணம் மேற்கொள்வதற்கு இதுவரை 7 ஆயிரத்து 702 பயணிகளும், சனிக்கிழமை 2 ஆயிரத்து 818 பயணிகளும், ஞாயிற்றுக்கிழமை 7 ஆயிரத்து 25 பயணிகளும் முன்பதிவு செய்துள்ளனர்.

இந்த எண்ணிக்கை மேலும் அதிகரிக்க வாய்ப்புள்ளதால் தொலைதூர பயணம் மேற்கொள்ளவிருக்கும் பயணிகள் கூட்ட நெரிசலை தவிர்க்கும் பொருட்டு தங்களது பயணத்திற்கு www.tnstc.in அல்லது Mobile App மூலம் முன்பதிவு செய்து பயணிக்க வேண்டும். இச்சிறப்பு பேருந்து இயக்கத்தினை கண்காணிக்க அனைத்து பேருந்து நிலையங்களிலும் போதிய அலுவலர்கள் நியமிக்கப்பட்டுள்ளனர். எனவே, பயணிகள் மேற்கூறிய வசதியினை பயன்படுத்தி தங்களது பயணத்தினை பாதுகாப்பாக மேற்கொள்ளவும்" என தெரிவிக்கப்பட்டுள்ளது.

இதையும் படிங்க:கோயம்பேடு - ஆவடி இடையே மெட்ரோ ரயில்.. விரிவான திட்ட அறிக்கை தயாரிக்க டெண்டர்!