திருவாரூரில் கைக்குழந்தையுடன் கடமையை செய்த காவலர்.. நேரில் அழைத்து பரிசு கொடுத்த எஸ்.பி!

Thiruvarur police traffic control video: கைக்குழந்தையுடன் சுமார் அரை மணி நேரம் சாலையில் நின்று போக்குவரத்து நெரிசலை சரி செய்த காவலரின் கடமை உணர்வை பாராட்டி, திருவாரூர் எஸ்.பி நேரில் அழைத்து பரிசளித்துள்ளார்.

திருவாரூர்: திருவாரூர் நகரின் முக்கிய நுழைவு வாயில் பகுதியாக இருந்து வருவது, திருச்சி - நாகை தேசிய நெடுஞ்சாலை மார்க்கத்தில் உள்ள விளமல் கல்பாலம் பகுதி. இந்த வழியாக தினசரி ஆயிரக்கணக்கான வாகனங்கள் வந்து செல்கின்றன. இந்நிலையில், திருவாரூர் நகராட்சி நிர்வாகம் சார்பில், விஜயபுரம் பகுதியில் வணிக வளாகத்துடன் கூடிய ஒருங்கிணைந்த பேருந்து நிலைய கட்டுமானப் பணிக்காக, திருவாரூர் பழைய பேருந்து நிலைய பாதையை, முழுவதுமாக நகராட்சி நிர்வாகம் கடந்த இரண்டு நாட்களுக்கு முன்பு அடைத்துள்ளது.

திருவாரூர் நகராட்சியின் இத்தகைய நடவடிக்கையால், திருவாரூர் நகரின் மையப் பகுதிக்குள் நுழையும் கனரக வாகனங்கள், நான்கு சக்கர வாகனங்கள் என அனைத்து வாகனங்களும், விளமல் கல்பாலம் அருகே உள்ள பாலம் வழியாகச் செல்ல வேண்டிய நிலை ஏற்பட்டுள்ளது. இதனால், திருச்சி - நாகை தேசிய நெடுஞ்சாலையில் கடும் போக்குவரத்து நெரிசல் ஏற்பட்டு வருகிறது.

இத்தகைய சூழலில், தை மாத இறுதி முகூர்த்த நாள் மற்றும் பல்வேறு கோயில்களில் குடமுழுக்கு நாளான நேற்று (பிப்.13), திருச்சி - நாகை தேசிய நெடுஞ்சாலை விளமல் கல்பாலம் அருகில், சாலையின் இருபுறமும் நூற்றுக்கணக்கான வாகனங்கள் அணிவகுத்து நின்றன. இது தவிர, மன்னார்குடி சாலை மார்க்கமாக திருவாரூர் நகருக்கு வரும் வாகனங்கள் என திருச்சி - நாகை தேசிய நெடுஞ்சாலையில் கடும் போக்குவரத்து நெரிசல் ஏற்பட்டது.

வழக்கமாக விளமல் கல்பாலம் அருகில் போக்குவரத்தை சரி செய்வதற்காக, போக்குவரத்துக் காவலர்களுக்கு பணி ஒதுக்கப்பட்டு வரும் போதிலும், நேற்று அங்கு எவரும் பணியில் இல்லை. இந்நிலையில், திருவாரூர் நகர காவல் நிலையத்தில் முதல் நிலை காவலராக பணிபுரியும் மணிகண்டன் என்பவர், தனது பணியை காலை முடித்துவிட்டு, தனது வீட்டுக்குத் தேவையான பொருட்களை வாங்க, அவரின் 1 வயது கூட நிறைவடையாத கைக்குழந்தையுடன் விளமல் பகுதிக்கு வந்துள்ளார்.

அப்போது அங்கு போக்குவரத்து நெரிசலால் பொதுமக்கள் வாகனங்களில் அவதியுற்று வந்ததைக் கண்ட அவர், தனது கையில் இருந்த கைக்குழந்தையையும் பொருட்படுத்தாமல், சுமார் அரை மணி நேரம் சாலையில் நின்று போக்குவரத்து நெரிசலை சரி செய்துள்ளார்.

கைக்குழந்தையோடு காவலர் மணிகண்டன் சாலையின் இருபுறமும் மாறி மாறி போக்குவரத்தை சரி செய்த அந்தக் காட்சி, தற்போது சமூக வலைத்தளங்களில் வைரலாகி உள்ளது. இதனையடுத்து, காவலர் மணிகண்டனை மாவட்ட காவல் கண்காணிப்பாளர் ஜெயக்குமார் நேரில் அழைத்து, அவருக்கு பொன்னாடை அணிவித்து, பரிசளித்து பாராட்டு தெரிவித்தார்.

இதையும் படிங்க:தனியார் பள்ளிக்கு சீல்: மாணவர்களின் கல்வி பாதிப்பு என பெற்றோர்கள் மயிலாடுதுறை கலெக்டரிடம் மனு