திருநெல்வேலி: நெல்லை மாவட்டம் மேற்கு தொடர்ச்சி மலைப்பகுதியில் அமைந்துள்ள மாஞ்சோலை, ஊத்து, காக்காச்சி உள்ளிட்ட இடங்களில் உள்ள தேயிலைத் தோட்டங்களை காலி செய்து, அங்கு வசித்து வரும் தொழிலாளர்களை வெளியேற்றும் நடவடிக்கையை பாம்பே பர்மா டிரெடிங் கார்ப்ரேஷன் (பிபிடிசி) மேற்கொண்டு வருகிறது.
இதனிடையே, தேயிலை தொட்ட தொழிலாளர்கள் சார்பில் தொடரப்பட்ட வழக்கில், வனத்துறை விளக்கம் அளித்து அறிக்கை தாக்கல் செய்ய நீதிமன்றம் உத்தரவு பிறப்பித்ததை தொடர்ந்து, களக்காடு முண்டந்துறை புலிகள் காப்பக துணை இயக்குநர் சார்பில் 13 பக்க அறிக்கை நீதிமன்றத்தில் சமர்ப்பிக்கப்பட்டுள்ளது.
இந்த நிலையில் மாஞ்சோலை மக்கள் வாழ்வுரிமை மீட்பு குழு சார்பில், மாஞ்சோலை தேயிலைத் தொட்ட தொழிலாளர்களின் வாழ்வாதாரத்தை பாதுகாக்க, தொடர்ந்து பல்வேறு நிகழ்வுகளை முன்னெடுத்து வருகின்றனர். குறிப்பாக நேற்று (ஞாயிற்றுக்கிழமை) நெல்லையில் இந்த விவகாரம் தொடர்பாக மாநாடு நடத்தினர்.
அதன் தொடர்ச்சியாக, இன்று (திங்கட்கிழமை) மே 17 இயக்கத்தின் ஒருங்கிணைப்பாளர் திருமுருகன் காந்தி, எஸ்டிபிஐ கட்சியின் மாநில தலைவர் நெல்லை முபாரக் ஆகியோர் நெல்லை ஆட்சியரை நேரில் சந்தித்து மனு அளித்தனர். அதில், மாஞ்சோலையில் கடந்த 8 நாட்களாக தொழிலாளர்களுக்கான குடிநீர், மின்சாரம் உள்ளிட்ட வசதிகள் நிறுத்தப்பட்டுள்ளதை சரிசெய்ய வேண்டும் என குறிப்பிட்டிருந்தனர்.
இதுகுறித்து செய்தியாளர்களுக்கு பேட்டி அளித்த திருமுருகன் காந்தி கூறியதாவது, "கடந்த 8 நாட்களாக மாஞ்சோலை தொழிலாளர்கள் மின்சாரம், குடிநீர் உள்ளிட்ட வசதி இல்லாமல் அவதிப்படுகின்றனர். சமூக நீதி அரசு என்று சொல்லிக் கொள்ளும் தமிழக அரசு மாஞ்சோலை மக்களின் கோரிக்கையை நிறைவேற்ற வேண்டும்.