மகளிர் உரிமைத் தொகை: புதிதாக விண்ணப்பிக்க 3 மாதங்களில் நடவடிக்கை - உதயநிதி ஸ்டாலின் தகவல்

தகுதி வாய்ந்த பெண்களுக்கு மகளிர் உரிமை தொகை கிடைப்பதற்காக புதிதாக விண்ணப்பிக்க 3 மாதங்களில் நடவடிக்கை எடுக்கப்படும் என துணை முதலமைச்சர் உதயநிதி ஸ்டாலின் தெரிவித்துள்ளார்.

சென்னை:2025ஆம் ஆண்டின் முதல் சட்டப்பேரவைக் கூட்டத்தொடரின் மூன்றாம் நாளான இன்று, வினா - விடை நேரத்தில் பேரவை உறுப்பினர் காந்திராஜன் 'கலைஞர் மகளிர் உரிமைத் தொகை' திட்டம் தொடர்பாக கேள்வி எழுப்பினார். இதற்கு பதிலளித்த துணை முதலமைச்சர் உதயநிதி ஸ்டாலின், இந்த திட்டத்தில் விண்ணப்பித்து விடுபட்ட தகுதியான பெண்களுக்கு உரிமைத் தொகை கிடைக்கவும், புதிதாக விண்ணப்பிக்கவும் 3 மாதங்களுக்குள் நடவடிக்கை எடுக்கப்படும் என்றார்.

இன்றைய சட்டப்பேரவைக் கூட்டத்தொடர் வினா விடை நேரத்தில், பேரவை உறுப்பினர் காந்தி ராஜன் திண்டுக்கல் மாவட்டம் வேடசந்தூர் தொகுதியில் கலைஞர் மகளிர் உரிமைத் திட்டத்தின் கீழ் பயன்பெறும் மகளிர் எண்ணிக்கையை தெரிவிக்க அரசு முன்வருமா என்று கேள்வி எழுப்பினார்.

இதற்கு பதில் அளித்த துணை முதலமைச்சர் உதயநிதி ஸ்டாலின், வேடசந்தூர் தொகுதியில் 62 ஆயிரம் பேர் மகளிர் உரிமை தொகை பெற்று வருகின்றனர். திண்டுக்கல் மாவட்டத்தில் 4,00,897 பேர் மகளிர் உரிமை தொகை பெற்று வருகின்றனர் என்று பதில் அளித்தார்.

இதையடுத்து திருச்செங்கோடு சட்டப்பேரவை உறுப்பினர் ஈஸ்வரன் பேசுகையில், மகளிர் உரிமை தொகை பயனாளிகள் எண்ணிக்கை அதிகரிக்கப்படுமா என்று கேள்வி எழுப்பினார். மேலும், பேரவைத் தலைவர் உள்பட அனைத்து சட்டப்பேரவை உறுப்பினர்களுக்கும் இந்த கோரிக்கை பெண்கள் தரப்பில் இருந்து வந்திருக்கும் என்று கூறினார்.

இதற்கு பேரவைத் தலைவர் அப்பாவு, 'ஆமாம்' என்று பதில் அளித்தார். அதனைத் தொடர்ந்து இந்த கேள்விகளுக்கு துணை முதலமைச்சர் உதயநிதி ஸ்டாலின் பதிலளித்தார்.

அதில், மகளிர் உரிமை தொகை திட்டம் வாயிலாக 1 கோடியே 14 லட்சத்து 65 ஆயிரத்து 525 (1,14,65,525) பெண்கள், மகளிர் உரிமை தொகை பெற்று வருகின்றனர். மகளிர் உரிமை தொகை திட்டம் கிடைக்காததவர்களுக்கு கிடைக்கவும், புதிதாக விண்ணப்பிக்கவும் 3 மாதங்களில் நடவடிக்கை எடுக்கப்படும் என்றார். மேலும், தகுதி வாய்ந்த பெண்களுக்கு மகளிர் உரிமை தொகை கிடைக்க நிச்சயமாக நடவடிக்கை எடுக்கப்படும் என்று கூறினார்.