"எல்லோருக்கும் சம வாய்ப்பு, சம உரிமையை கொண்டு வந்தவர் ராஜீவ் காந்தி..” - செல்வப்பெருந்தகை புகழஞ்சலி! - SELVAPERUNTHAGAI ON RAJIV GANDHI

RAJIV GANDHI DEATH ANNIVERSARY: ராஜீவ் காந்தியின் நினைவு நாளை ஒட்டி, சென்னை சத்தியமூர்த்தி பவனில் தமிழ்நாடு காங்கிரஸ் கமிட்டி தலைவர் செல்வப்பெருந்தகை மலர் தூவி மரியாதை செலுத்தினார்.

சென்னை: முன்னாள் பிரதமர் ராஜீவ் காந்தியின் 33-வது ஆண்டு நினைவு நாளை ஒட்டி, தமிழ்நாடு காங்கிரஸ் கமிட்டி தலைவர் செல்வப்பெருந்தகை மற்றும் சட்டமன்ற கட்சி தலைவர் ராஜேஷ் குமார் ஆகியோர், சென்னை சத்தியமூர்த்தி பவனில் உள்ள ராஜீவ் காந்தியின் திருவுருவப் படத்திற்கு மலர் தூவி மரியாதை செலுத்தினர். மேலும், ராஜீவ் காந்தியின் நினைவு நாள் உறுதிமொழியாக ’பயங்கரவாத எதிர்ப்பு உறுதிமொழி’ எடுத்துக் கொண்டனர்

பின்னர் செய்தியாளர்களைச் சந்தித்து செல்வப்பெருந்தகை பேசிய போது, முன்னாள் பிரதமர் ராஜீவ் காந்தி இந்திய நாட்டின் அறிவியல் வளர்ச்சிக்கும், அறிவியல் புரட்சிக்கும் வழிவகை செய்த மாபெரும் தலைவர் என கூறினார். மேலும், அதிகாரப் பகிர்வு என மாநிலம், மத்தியம் இரண்டுக்கும் இடையில் நல்லுறவு தொடர்வதற்காக பாடுபட்டவர் ராஜீவ் காந்தி என்று கூறியுள்ளார்.

இந்தியாவில் பஞ்சாயத்துராஜ் சட்டத்தின் மூலமாக எல்லோருக்கும் சம வாய்ப்பு, எல்லோருக்கும் அரசியல் உரிமை என்ற முறையில் பஞ்சாயத்து சட்டத்தை கொண்டு வந்த தலைவர் இவர் என கூறினார். மேலும், இந்தியா சமத்துவ வளர்ச்சியை அடைய ராஜீவ் காந்தி பாடுபட்டதால்தான் இன்று குப்பனும் சுப்பனும் பச்சை மையில் கையெழுத்து போடுகிறார்கள் எனவும், அரசியல் உரிமைகளை மக்களுக்கு மீட்டுக் கொடுத்தவர் ராஜீவ் காந்தி என்றும் கூறியுள்ளார்.

இதையும் படிங்க:ராஜீவ் காந்தி நினைவு தினம்: காங்கிரஸ் தலைவர்கள், பிரதமர் மோடி உள்ளிட்டோர் மரியாதை!