மதுரை: மதுரை காமராசர் பல்கலைக்கழக உறுப்புக் கல்லூரி, மதுரை மாநகர் தல்லாகுளம் அருகே இயங்கி வருகிறது. இக்கல்லூரியில் அவ்வப்போது பல்வேறு சர்ச்சைகள் நிலவிவந்த நிலையில், கடுமையான நிதி சிக்கலிலும் தள்ளாடி தவித்தது. இதனை அடுத்து, மதுரை காமராசர் பல்கலைக்கழக சமூகவியல் துறை தலைவராக பணியாற்றிய முனைவர் புவனேஸ்வரன், கல்லூரியில் முதல்வராக நியமனம் செய்யப்பட்டார்.
முனைவர் புவனேஸ்வரன் கல்லூரி முதல்வராக பொறுப்பேற்ற பின்னர், பல்வேறு நிதி நிர்வாக சிக்கல்கள் சீர் செய்யப்பட்டதாக கூறப்படுகிறது. இந்த நிலையில், இங்குள்ள சில பேராசிரியர்கள் கொடுத்து வந்த நெருக்கடி காரணமாக கடந்த சில மாதங்களுக்கு முன்பு தன்னை முதல்வர் பதவியிலிருந்து விடுவிக்குமாறு மதுரை காமராசர் பல்கலைக்கழக துணைவேந்தருக்கும், பதிவாளருக்கும் கடிதம் அனுப்பி இருந்தார்.
கல்லூரி பேராசிரியர்கள் பலரின் வற்புறுத்தல் காரணமாக மீண்டும் முதல்வர் பதவியில் தொடர்ந்து பணியாற்றி வருகிறார். இந்த நிலையில், ஆகஸ்ட் 5ஆம் தேதி கல்லூரியின் முதுநிலை வகுப்புகளை தொடங்குவது தொடர்பாக கல்லூரி முதல்வர் புவனேஸ்வரன் அறையில் துறைத் தலைவர்கள் அளவிலான பேராசிரியர்கள் ஆலோசனைக் கூட்டம் இன்று (ஜூலை 30) நடைபெற்றது.
இதனை அடுத்து, முதுநிலை மாணவர் சேர்க்கை குறைவாக உள்ள துறைகளையும் திறப்பது குறித்த விவாதம் நடைபெற்ற போது, பி.காம்., (சிஏ) துறையின் தலைவர் முனைவர் ராணி எழுப்பிய வினாவுக்கு, ஆங்கில துறை தலைவர் முனைவர் மோகன் விரும்பத்தகாத வகையில் பதில் அளித்ததாகக் கூறப்படுகிறது.
மேலும், இந்த வாக்குவாதத்தின் போது முனைவர் மோகன், முனைவர் ராணியை அருவருக்கத்தக்க வார்த்தைகளால் திட்டி பேசி, ஆலோசனைக் கூட்டத்தை விட்டு வெளியேறுமாறு கத்தியதாகவும் தெரிகிறது. அப்போது உடன் இருந்த சக துறை தலைவர்களும் சமாதானம் செய்ய முயற்சி மேற்கொண்டுள்ளனர். இருந்த போதும் வாக்குவாதம் மிகக் கடுமையாக முற்றியுள்ளது.