மழைநீர் அகற்றப்பட்டு திறக்கப்பட்ட மேட்லி சப்வே! இயல்பு நிலையில் மாம்பலம்!

மேற்கு மாம்பலம் மற்றும் தியாகராய நகரை இணைக்கும் மேட்லி சப்வேயில் மழைநீர் தேங்கியதால் அந்த பாதை அடைக்கப்பட்ட நிலையில் இன்று மதியம் முதல் அந்த பகுதி இயல்பு நிலைக்கு திரும்பியுள்ளது.

சென்னை:ஃபெஞ்சல் புயல் காரணமாக கடந்த மூன்று நாட்களாக சென்னை உள்பட தமிழகத்தின் பல்வேறு மாவட்டங்களில் தொடர் கனமழை பெய்து வந்தது. இதனால் சென்னையின் பல்வேறு இடங்களில் மழைநீர் தேங்கி, பொதுமக்களின் இயல்பு வாழ்க்கை முடக்கப்பட்டது.

இதில், மேற்கு மாம்பலம் மற்றும் தி நகரை இணைக்கும் மேட்லி சப்வேயில் நேற்று (நவ.30) பெய்த அதிக கனமழை காரணமாக மழைநீர் தேங்கி போக்குவரத்து முடக்கப்பட்டுள்ளது. இதன் காரணமாக அந்த சுரங்கப் பாதை அடைக்கப்பட்டது. மேலும் அப்பகுதியில் உள்ள தெருக்களில் தண்ணீர் அதிக அளவு தேங்கி இருந்த நிலையில் மாநகராட்சி ஊழியர்கள் அப்பகுதியில் அதை அகற்றும் பணியில் ஈடுப்பட்டனர்.

இது குறித்து அப்பகுதியில் உள்ள மக்கள் நமது ஈ டிவி பாரத் தமிழ் ஊடகத்திற்கு இன்று (டிச.1) காலை 10 மணி அளவில் பேட்டி அளித்தனர். அப்போது தனியார் அலுவலகத்தில் வேலை செய்யும் பார்த்திபன் கூறுகையில், "நேற்றில் இருந்து கடும் மழை பெய்து வருகிறது. இந்த சுரங்க பாதையில் மழைநீர் அதிகளவு தேங்கியுள்ளது. அதனால் பாதுகாப்பு கருதி பாலத்தை மூடிவிட்டனர்.

மாநகராட்சி ஊழியர்கள் நேற்று முதல் தண்ணீரை அகற்றும் பணியில் ஈடுபட்டு வருகின்றனர். மழை நின்ற பிறகு ஆங்காங்கே தேங்கி இருந்த தண்ணீர் தானாக வடிய ஆரம்பித்துவிட்டது. ஆனால் இந்த சுரங்க பாதை வழியில் மட்டும் இன்னும் தண்ணீர் வெளியேறவில்லை.

அதனால் மக்கள் இந்த சுரங்க பாதையை சுற்றி ஒன்றரை கிலோமீட்டர் தாண்டி செல்ல வேண்டியுள்ளது. மேலும் இதனால் பெரும் சிரமாக உள்ளது. வாகனத்தில் சிறிதளவு தண்ணீர் ஏறினால் கூட வாகனம் பழுதாகி இயங்க முடியாத நிலை உருவாகிறது" எனக் கூறினார்.

இதையும் படிங்க:ஃபெஞ்சல் புயல்: சூறாவளி காற்றில் சாலையின் குறுக்கே சரிந்த தென்னை மரம்!

இதையடுத்து பேசிய வளசரவாக்கத்தை சேர்ந்த பரமசிவம், “ நான் வளசரவாக்கத்தில் இருந்து தி நகர் சென்று கொண்டிருக்கிறேன். எப்போதும் இந்த பாதையில் தான் செல்வேன். ஆனால், தற்போது தண்ணீர் அதிகமாக தேங்கியுள்ளதால் இந்த சுரங்கப்பாதையை மூடி உள்ளனர்.

நேற்று பெய்த மழையில் தண்ணீர் நிரம்பி இருக்கும், ஆனால் சரி செய்திருப்பார்கள் என்று நினைத்தோம். ஆனால் இன்னும் தண்ணீரை அகற்றும் பணிகளை செய்து வருகின்றனர். இப்போது தி நகர் செல்வதற்கு நான் சுற்றி செல்ல வேண்டும். அரசாங்கம் மழைநீரை அகற்றும் பணியை வேகமாக செய்ய நடவடிக்கை எடுத்தால் நன்றாக இருக்கும்" என்று கூறினார்.

இந்நிலையில், இன்று (டிச.1) மதியம் 1 மணி நிலவரப்படி மேட்லி சப்வேயில் தேங்கி இருந்த மழைநீர் அகற்றப்பட்டு, திறக்கப்பட்டது. பின் அந்த பகுதியில் போக்குவரத்து மற்றும் மக்கள் வாழ்க்கை இயல்பு நிலைக்கு திரும்பியது.