கோயம்புத்தூர்: 'திமுக எதிர் அதிமுக' என்றிருந்த தமிழ்நாடு அரசியல் களம், இப்போது, 'பாஜக எதிர் திமுக' என மாறியுள்ளது என பாஜக தேசிய மகளிரணித் தலைவரும், கோவை தெற்கு தொகுதி சட்டமன்ற உறுப்பினருமான வானதி சீனிவாசன் அறிக்கை வெளியிட்டு தெரிவித்துள்ளார்.
அதில், “திமுக தலைவரும், முதலமைச்சருமான மு.க.ஸ்டாலின் தமிழ்நாடு முழுவதும் பிரசாரம் செய்து வருகிறார். ‘தமிழ்நாட்டில் திமுக – அதிமுக இடையேதான் போட்டி. பாஜக களத்திலேயே இல்லை’ என்று திமுகவினர் மேடைதோறும் முழங்கி வருகிறார்கள். ஆனால், முதலமைச்சர் ஸ்டாலின் பிரசார பொதுக்கூட்டங்களில் ஒரு மணி நேரம் பேசினால், அதில் 50 நிமிடங்கள் பாஜகவைப் பற்றி, பிரதமர் மோடியைப் பற்றிதான் பேசுகிறார்.
1972-இல் இருந்து 'திமுக எதிர் அதிமுக' என்றிருந்த தமிழ்நாடு அரசியல் களம், இப்போது, 'பாஜக எதிர் திமுக' என மாறியுள்ளது. முதலமைச்சர் தேர்தல் பிரசார உரைகள் அதைத்தான் காட்டுகின்றன. இனி பாஜகவைச் சுற்றி தமிழ்நாடு அரசியல் நடக்கும் என்பதை உணர்ந்து கொண்ட முதலமைச்சர் ஸ்டாலினுக்கு நன்றி.
மார்ச் 27ஆம் தேதி விருதுநகரில் நடந்த பிரசார பொதுக்கூட்டத்தில் பேசிய முதலமைச்சர் ஸ்டாலின், சமூக நீதி பற்றி பாடம் எடுத்திருக்கிறார். குலக்கல்வியை ஊக்குவிக்கும் புதிய கல்விக் கொள்கை, ஏழை மாணவர்களின் மருத்துவக் கனவைச் சிதைக்கும் நீட் தேர்வு என்று காலமெல்லாம் செய்யும் அவதூறு பிரசாரத்தை செய்திருக்கிறார். மத்திய பாஜக அரசு கொண்டு வந்துள்ள புதிய கல்விக் கொள்கையில் குலக்கல்வி இல்லை.
ஆனால், குலத்தின் அடிப்படையில், அதாவது பிறப்பின் அடிப்படையில் கட்சித் தலைமை பதவியை நிரப்பும் முறை திமுகவில் இருக்கிறது. 'தந்தை - மகன் - பேரன்' கட்சி இப்போது 'கொள்ளுப் பேரன் இன்பநிதியையும் ஏற்போம்' என மூத்த அமைச்சர்களே பேசும் நிலைக்கு சென்றிருக்கிறது. இப்படி குடும்ப கட்சியை நடத்திக் கொண்டு, குலக்கல்வி என்று பேசுவதைப் பார்த்து தமிழ்நாட்டு மக்கள் நகைத்துக் கொண்டிருக்கிறார்கள். பள்ளிக் குழந்தைகளுக்கு காலை உணவுத் திட்டம் என்பது, பாஜக அரசின் புதிய தேசிய கல்விக் கொள்கையின் ஓர் அம்சம். அதைத்தான் தனது சாதனையாக முதலமைச்சர் ஸ்டாலின் முழங்கிக் கொண்டிருக்கிறார்.