சென்னை:கிருஷ்ணகிரியில் போலி என்சிசி முகாம் நடத்தி மாணவிகளுக்கு பாலியல் வன்கொடுமை செய்ததாக பதிவு செய்யப்பட்ட வழக்கின் விசாரணையை சிபிஐக்கு மாற்றக் கோரி வழக்கறிஞர் சூரியபிரகாசம் சென்னை உயர்நீதிமன்றத்தில் வழக்கு தாக்கல் செய்திருந்தார்.
இந்த வழக்கு நீதிபதிகள் கிருஷ்ணகுமார் மற்றும் பாலாஜி அடங்கிய அமர்வில் இன்று மீண்டும் விசாரணைக்கு வந்தது. அப்போது தமிழக அரசு தரப்பில் ஆஜரான தலைமை வழக்கறிஞர் பிஎஸ் ராமன் மற்றும் கூடுதல் தலைமை வழக்கறிஞர் ரவீந்திரன் ஆகியோர் வழக்கின் விசாரணை குறித்த நிலை அறிக்கைகளை தாக்கல் செய்தனர்.
இதையும் படிங்க:பிடிவாரண்டை அமல்படுத்தாத கியூ பிராஞ்ச் ஐஜிக்கு அபராதம் - சென்னை கூடுதல் அமர்வு நீதிமன்றம் அதிரடி!
"நான்கு பள்ளிகளில் போலி என்சிசி முகாம் நடத்தப்பட்டதாக குற்றச்சாட்டு எழுந்துள்ள நிலையில், வேறு பள்ளிகளில் போலி என்சிசி முகாம்கள் நடத்தப்பட்டுள்ளதா? என விசாரிக்கப்பட்டு வருவதாக அரசு தரப்பில் தெரிவிக்கப்பட்டது. முக்கிய குற்றவாளியான சிவராமன் மரணம் தொடர்பான வழக்கில் சேலம் குற்றவியல் நடுவர் நீதிமன்ற நீதிபதியின் அறிக்கைக்காக காத்திருப்பதாகவும்" அரசு தரப்பில் விளக்கம் அளிக்கப்பட்டது.
இதையடுத்து,"போலி என்சிசி முகாம் நடத்தியதாக கூறப்படும் ஒரு பள்ளியில் மட்டுமே மாவட்ட சட்டப்பணிகள் ஆணைக்குழு விசாரணை நடத்தி அறிக்கையை தாக்கல் செய்துள்ளதைச் சுட்டிக்காட்டிய நீதிபதிகள், மற்ற மூன்று பள்ளிகளிலும் நேரில் விசாரணை நடத்தி மாணவிகளின் மனநலம் உள்ளிட்ட அம்சங்கள் குறித்து ஆய்வு செய்து விரிவான அறிக்கை தாக்கல் செய்யும்படி கிருஷ்ணகிரி மாவட்ட சட்டப்பணிகள் ஆணைக்குழு தலைவருக்கு உத்தரவிட்டனர்". மேலும் சிவராமன் மரணம் தொடர்பாக விசாரணை அறிக்கையை விரைந்து தாக்கல் செய்யும்படி, சேலம் குற்றவியல் நடுவர் நீதிமன்ற நீதிபதிக்கு உத்தரவிட்ட நீதிபதிகள், வழக்கின் விசாரணையை நவம்பர் 13 ஆம் தேதிக்கு தள்ளி வைத்தனர்.
