ஜூன் வரை பொது இடங்களில் ஓஆர்எஸ் பவுடர் வழங்க சுகாதாரத்துறை அறிவுறுத்தல்! - ORS powder in public places

ORS Powder: தமிழ்நாட்டில் வெப்பநிலை அதிகரித்து வருவதன் காரணமாக, பொது இடங்களில் ஓஆர்எஸ் பவுடர் வழங்க வேண்டும் என பொது சுகாதாரத்துறை அறிவுறுத்தி உள்ளது.

சென்னை: இது தொடர்பாக பொது சுகாதாரத்துறை இயக்குனர் அனைத்து மாவட்ட சுகாதார அலுவலர்களுக்கு அனுப்பி உள்ள கடிதத்தில், “உலக வானிலை அமைப்பு (WMO) வெப்ப அலையை வரையறை செய்துள்ளது. அதன்படி, வெப்ப அலை என்பது சாதாரண வெப்பநிலையிலிருந்து 4.5 டிகிரி செல்சியஸ் முதல் 6.4 டிகிரி செல்சியஸ் வரை அதிகரிப்பதாகும்.

மேலும், கடுமையான வெப்ப அலையானது இயல்பான வெப்பநிலையிலிருந்து 6.4 டிகிரி செல்சியஸ் வரை அதிகரிக்கும். வெப்ப அலை என்பது சாதாரணமான அதிகபட்ச வெப்பநிலை 45 டிகிரி செல்சியஸ் மற்றும் கடுமையான வெப்ப அலை என்பது சாதாரணமான வெப்பநிலையில் இருந்து அதிகபட்ச வெப்பநிலை 47 டிகிரி செல்சியஸ் ஆகும்.

காலநிலை மாற்றம் காரணமாக, வெயிலின் தாக்கம் உலகளவிலும் அதிகரித்து வருகிறது. வெயிலின் தாக்கத்தினாலும், வளிமண்டலத்தில் ஏற்படும் மாற்றங்களும் மக்களை அதிகளவில் பாதிக்கின்றன. மேலும், பல்வேறு வெப்பம் தொடர்பான நோய்களை ஏற்படுத்துவதுடன், (HRI), உடலியல் மன அழுத்தம், சில நேரங்களில் மரணத்தையும் ஏற்படுத்துகிறது.

தமிழ்நாடு அரசின் தலைமைச் செயலாளருடனான ஆய்வுக் கூட்டத்தில், வெப்பம் தொடர்பான நோய்களை எதிர்கொண்டு சிகிச்சை அளிக்க ஓஆர்எஸ் பவுடர் வழங்குவதற்கு அறிவுறுத்தப்பட்டது. அதன் அடிப்படையில், பொதுமக்களுக்கு நோய்த்தொற்று மற்றும் நீரிழப்பு ஏற்படுவதைத் தவிர்க்கும் வகையில், ஓஆர்எஸ் (ORS) பவுடர்கள் வழங்கப்பட வேண்டும்.

உள்ளாட்சி அமைப்புகளுடன் இணைந்து இதற்கான ஏற்பாடுகளை சுகாதாரத்துறை அலுவலர்கள் மேற்கொள்ள வேண்டும். வெப்பநிலை மாற்றத்தின் காரணமாக ஜூன் 30ஆம் தேதி வரையில் வழங்கப்பட வேண்டும் என அதில் கூறப்பட்டுள்ளது.

இதையும் படிங்க:22 மாவட்டங்களில் குடிநீர் பற்றாக்குறையைப் போக்க ரூ.150 கோடி ஒதுக்கீடு - முதலமைச்சர் ஸ்டாலின் உத்தரவு! - MK Stalin On Summer Actions