ஐந்தாவது மாநில திட்டக் குழு கூட்டம்; முதல்வர் ஸ்டாலின் வழங்கிய அறிவுரைகள் என்னென்ன? - State Planning Commission

5th State Planning Commission: திமுக ஆட்சியின் நோக்கங்கள், சாதனைகளை உள்ளிட்டவற்றை சொல்லும் வகையில் சென்னையில் ஒரு கருத்தரங்கை நடத்தி, ஆய்வுக் கட்டுரைகளை வெளியிடுமாறு மாநில திட்டக் குழுவை முதலமைச்சர் மு.க.ஸ்டாலின் அறிவுறுத்தியுள்ளார்.

சென்னை:தமிழ்நாடு முதலமைச்சரும், தமிழ்நாடு மாநிலத் திட்டக் குழுத் தலைவருமான மு.க.ஸ்டாலின் தலைமையில் மாநில திட்டக்குழுவின் ஐந்தாவது கூட்டம் இன்று (செவ்வாய்க்கிழமை) தலைமைச் செயலகத்தில் நடைபெற்றது. இக்கூட்டத்தில், மாநில திட்டக் குழுவின் துணைத் தலைவர், மாநில திட்டக் குழுவில் மேற்கொள்ளப்படும் செயல்பாடுகள் பற்றி விரிவாக எடுத்துரைத்தார்.

அதில், நான்காவது திட்டக் குழு கூட்டத்தில் முதலமைச்சரின் அறிவுரைகள் மற்றும் வழிகாட்டுதலின்படி மேற்கொள்ளப்பட்ட பணிகளான, 'புதுமைப் பெண்' திட்டத்தின் தாக்கம், முதலமைச்சரின் காலை உணவுத் திட்டத்தால் அரசு தொடக்க பள்ளி மாணவர்களிடம் ஏற்பட்டுள்ள தாக்கம், 'எண்ணும் எழுத்தும்' திட்டச் செயலாக்கத்தின் மதிப்பீடு போன்ற ஆய்வுகளின் முடிவுகள் குறித்தும் விவரித்தார்.

மேலும் மாநில திட்டக் குழுவால் செயல்படுத்தப்படும் சிறப்பு திட்டங்களான, தமிழ்நாடு புதுமை முயற்சிகள் திட்டம், மாநில சமச்சீர் வளர்ச்சி நிதி திட்டம், வளமிகு வட்டாரங்கள் திட்டம், தமிழ்நாடு நிலப்பயன்பாட்டு ஆராய்ச்சி வாரிய பணிகள் பற்றியும், தற்போது மேற்கொள்ளப்பட்டுவரும் ஆய்வுகள் பற்றியும் விரிவாக விவரித்தார்.

அதனைத் தொடர்ந்து இக்கூட்டத்தில் பேசிய முதலமைச்சர், "நாங்கள் செல்லும் பாதையைத் தீர்மானிப்பவர்களாக மட்டுமல்லாமல், அதில் உள்ள நிறைகுறைகளை எடுத்துச் சொல்பவர்களாகவும் நீங்கள் இருக்கிறீர்கள். அந்த வகையில் எனக்கும், இந்த அமைச்சரவைக்கும், ஆட்சிக்கும் மிக மிக முக்கியமான வழிகாட்டிகளாக அமைந்துள்ளீர்கள்.

கடந்த மார்ச் மாதம் என்னைச் சந்தித்த துணைத் தலைவர் ஜெயரஞ்சன் துறை சார்ந்த 16 அறிக்கைகளை அளித்தார். தமிழ்நாடு அரசின் ஒவ்வொரு திட்டமும் எந்த அளவுக்கு மக்களுக்குப் பயனுள்ள திட்டமாகச் செயல்படுத்தப்பட்டு வருகிறது என்பதை அந்த அறிக்கை மூலமாகத் தெரிந்து கொள்ள முடிந்தது.

முதலமைச்சரின் காலை உணவுத் திட்டம் மூலமாக மாணவர்கள் மட்டுமல்ல, கல்வித் துறையில் அடைந்துள்ள வளர்ச்சி என்ன? மக்களைத் தேடி மருத்துவம் திட்டத்தின் மூலமாக கிராமப்புற சுகாதாரம் எந்தளவுக்கு மேன்மை அடைந்துள்ளது? நகர்ப்புறங்களில் வேலைவாய்ப்பு கூடிவருவதால் சமூகம் அடைந்துள்ள வளர்ச்சி என்ன? போன்ற தகவல்கள் எங்களுக்கு கிடைத்தன" எனக் கூறினார்.

சமூகத்தை மேம்படுத்திய திட்டங்கள்: தொடர்ந்து பேசிய அவர், "நமது அரசின் ஒவ்வொரு திட்டமும், சமூகத்தின் ஒவ்வொரு பிரிவினரையும் மேம்படுத்துவதாக அமைந்துள்ளது. காலை உணவுத் திட்டத்தால் மாணவர்களின் பள்ளி வருகை உயர்ந்துள்ளது என்பதை அறிந்தேன். இதனைவிட மகிழ்ச்சியான செய்தி வேறு எதுவும் இருக்க முடியாது.

மகளிர் உரிமைத் தொகை மூலமாக பெண்களின் பொருளாதாரச் சுதந்திரம் அதிகமாகி இருக்கிறது. பேருந்துகளில் கட்டணமில்லா விடியல் பயணம் மூலமாகப் பெண்களின் சமூகப் பங்களிப்பு அதிகமாகி உள்ளது. புதுமைப் பெண் திட்டத்தின் காரணமாக கல்லூரிக்குச் செல்லும் மாணவிகளின் எண்ணிக்கை உயர்ந்துள்ளது.

இப்படி ஒவ்வொரு திட்டமும் சமூகத்தின் பல்வேறு பிரிவினரையும் உயர்த்தி வருகிறது. இந்த தகவல்களை எல்லாம் மக்களிடமிருந்து நேரடியாக நாங்கள் அறிந்தாலும், புள்ளிவிவரங்களாக நீங்கள் வழங்கி வருகிறீர்கள். தொழில் வளர்ச்சி, சமூக மாற்றம், கல்வி மேம்பாடு ஆகிய அனைத்தும் ஒரே நேரத்தில் நடக்க வேண்டும்" என்றார்.

வளர்ச்சி எப்படி இருக்க வேண்டும்:மேலும் பேசிய முதலமைச்சர், "வளர்ச்சி என்பது பொருளாதார வளர்ச்சியாக மட்டுமல்ல, சமூக வளர்ச்சியாக இருக்க வேண்டும். பொருளாதாரம், கல்வி, சமூகம், சிந்தனை, செயல்பாடு ஆகிய ஐந்தும் ஒருசேர வளர வேண்டும். அதுதான் பெரியாரும், அண்ணாவும், கலைஞரும் காண விரும்பிய வளர்ச்சி. அதுதான் திராவிட மாடல் வளர்ச்சி" என்று முதல்வர் பேசினார்.

திட்டக்குழுவிற்கு முதல்வரின் அறிவுரை:"மேலும், ஆலோசனை சொல்வதோடு உங்கள் கடமை முடிந்துவிடவில்லை. நீங்கள் வழங்கிய ஆலோசனைகள் செயல்படுத்தப்படுகிறதா? என்பதையும் கண்காணியுங்கள். ஆலோசனைகளைச் செயல்படுத்துவதற்கு ஏதாவது தடை, தடங்கல்கள் இருக்கிறதா? என்பதைப் பாருங்கள்.

கடந்த முறை என்னிடம் தரப்பட்ட அறிக்கையில் கல்லூரி மாணவர்களுக்கான இறுதித் தேர்வு வினாத்தாள்களை மேம்படுத்துவது குறித்த ஆலோசனை சொல்லி இருந்தீர்கள். அது செய்யப்பட்டுள்ளதா என்பதை ஆய்வு செய்யுங்கள். வேளாண்மை, காடுகள், வெப்பம் அதிகரிப்பு ஆகியவைக் குறித்த உங்களது ஆலோசனைகள், துறை சார்ந்த நிர்வாக நடவடிக்கைகளாக எந்தளவு மாறி உள்ளது என்பதையும் ஆய்வு செய்யுங்கள்.

மாநிலத் திட்டக் குழுவை இந்தியாவிலேயே முதன்முதலாக அமைத்தவர் தலைவர் கலைஞர். ஒன்றிய அரசில் இருப்பதைப் போல மாநிலத்திற்கு இருக்க வேண்டும் என்று நினைத்ததற்குக் காரணம், அனைத்து வளங்களையும் கொண்ட மாநிலமாகத் தமிழ்நாடு அமைய வேண்டும் என்ற அடிப்படையில் இதனை அமைத்தார்.

பசி இல்லை, பஞ்சம் இல்லை, வறுமை இல்லை, கொடுமையான தொற்று நோய் இல்லை, சாலைகள் இல்லாத கிராமங்கள் இல்லை, மின்சாரம் இல்லாத கிராமம் இல்லை, குடிதண்ணீர் இல்லாத கிராமம் இல்லை, பள்ளிகள் இல்லாத கிராமம் இல்லை இப்படி தன்னிறைவு பெற்றவையாக அனைத்து மாவட்டங்களையும் உருவாக்கினோம்.

எல்லா வளங்களும் இருக்கிறது என்ற நிலைமையை உருவாக்கி வருகிறோம். கல்வித் துறையில், வேளாண்மையில், உள்கட்டமைப்பு வசதியில் தமிழ்நாடு மற்ற மாநிலங்களுக்கு முன்மாதிரியாக வளர்ந்துவிட்டது. அனைத்துத் துறையும் சமச்சீராக வளர்ந்து வருகிறது. அண்மையில் நிதி ஆயோக் வெளியிட்ட அறிக்கை, மிக மிக மகிழ்ச்சியைத் தந்துள்ளது.

அந்த அறிக்கையை முன் மாதிரியாக கொண்டு உங்களது ஆய்வறிக்கை ஒன்றை வழங்குமாறு கேட்டுக் கொள்கிறேன். நிதி வளம் இருக்குமானால், இன்னும் பல திட்டங்களை நம்மால் உருவாக்க முடியும். நிதி வளத்தை பெருக்கும் ஆலோசனைகளைச் சொல்லுங்கள். அறிவிக்கப்படும் திட்டங்கள் அனைத்து மனிதர்களையும் உடனடியாகச் சென்று சேரத் திட்டமிடுங்கள்.

காலதாமதமின்றி அனைத்துப் பயன்களையும் மக்கள் பெற்றாக வேண்டும். அதற்கான இலகுவான நிர்வாகச் சீர்திருத்தங்களைச் சொல்லுங்கள் என்று கேட்டுக் கொள்கிறேன். இந்தக் கூட்டத்தில் பங்கெடுத்திருக்கும் நான், இந்த நேரத்தில் உங்களுக்கு ஒரு பணியை, பொறுப்பை வழங்க விரும்புகிறேன்.

நமது திராவிட மாடல் ஆட்சியின் நோக்கங்களை, சாதனைகளைச் சொல்லும் வகையில் ஒரு மாபெரும் கருத்தரங்கை சென்னையில் நீங்கள் நடத்திட வேண்டும். அதில் பல்துறை அறிஞர்கள், ஊடகவியலாளர்கள் போன்றவர்களைப் பங்கேற்க வைத்து, அவர்களது ஆய்வுக் கட்டுரைகளைப் பெற்று, அதனை வெளியிடுமாறு மாநில திட்டக்குழுவின் துணைத் தலைவர் ஜெயரஞ்சன் அவர்களைக் கேட்டுக் கொள்கிறேன்" என்று முதல்வர் ஸ்டாலின் அறிவுறுத்தினார்.

ஈடிவி பாரத் தமிழ் வாட்ஸ்ஆப் சேனலில் இணையஇங்கே க்ளிக் செய்யவும்

ஈடிவி பாரத் தமிழ்நாடு (ETV Bharat Tamil Nadu)

இதையும் படிங்க:பத்தாண்டுகளை கடந்த தமிழக அரசின் இலவச அமரர் ஊர்தி சேவை திட்டம்; 13.98 லட்சம் உடல்களை சுமந்து தொடரும் பணி!