புதுச்சேரி பாஜக வேட்பாளரின் ஆதரவாளர் வீட்டில் சோதனை.. மாவட்ட ஆட்சியர் விளக்கம்! - Lok Sabha Election 2024

Puducherry BJP Supporters house raid issue: புதுச்சேரி பாஜக வேட்பாளரின் ஆதரவாளர் வீட்டில் சோதனை நடத்தியது தேர்தல் பறக்கும் படை இல்லை எனவும், அது சம்பந்தமாக எந்த தகவலும் தெரியாது எனவும் தேர்தல் அதிகாரியும், மாவட்ட ஆட்சியருமான குலோத்துங்கன் தெரிவித்துள்ளார்.

புதுச்சேரி: நாடாளுமன்றத் தேர்தல் நாடு முழுவதும் நடைபெறவுள்ள நிலையில், தமிழ்நாடு மற்றும் புதுச்சேரியில் வரும் ஏப்.19ஆம் தேதி வாக்குப்பதிவு நடைபெறுகிறது. இதனை முன்னிட்டு, தேர்தல் ஆணையம் தரப்பில் பல்வேறு முன்னெச்சரிக்கை நடவடிக்கைகளும், பாதுகாப்பு ஏற்பாடுகளும் செய்யப்பட்டு வருகிறது. குறிப்பாக, புதுச்சேரியில் 967 வாக்கு மையங்கள் அமைக்கப்பட்டுள்ளது.

வாக்கு எண்ணும் மையத்தில் பாதுகாப்பு ஏற்பாடுகளுக்காக துணை ராணுவப் படையினர் மற்றும் சிசிடிவி கேமரா, வெயிலில் வாக்குகளை பதிவு செய்ய வரும் பொதுமக்களுக்காக பந்தல், தண்ணீர் உள்ளிட்ட ஏற்பாடுகளும் செய்யப்பட்டு வருகிறது. தற்போது, புதுச்சேரி லாஸ்பேட்டை அரசு மகளிர் கல்லூரி மற்றும் மோதிலால் பாலிடெக்னிக் கல்லூரியில் வாக்குப்பதிவு செய்யும் இயந்திரங்கள் வைக்கப்பட்டுள்ளது.

இன்றும், நாளையும் சின்னம் பொருத்தும் பணி நடைபெற உள்ளது. அதற்காக பெல் நிறுவனத்திலிருந்து 600 ஊழியர்கள் புதுச்சேரிக்கு வர வைக்கப்பட்டுள்ளனர். இவர்கள் அரசியல் கட்சி மற்றும் சுயேட்சை வேட்பாளர்கள் முன்னிலையில் சின்னங்கள் பொருத்தும் பணியில் ஈடுபட்டு வருகின்றனர். அந்த பணிகளை தேர்தல் நடத்தும் அதிகாரியும், மாவட்ட ஆட்சியருமான குலோத்துங்கன் அதிகாரிகளுடன் நேரில் சென்று ஆய்வு செய்தார்.

அதனைத் தொடர்ந்து செய்தியாளர்களிடம் பேசிய ஆட்சியர் குலோத்துங்கன், "புதுச்சேரியில் உள்ள 967 வாக்கு மையங்களில் வாக்கு இயந்திரங்கள், சின்னம் பதிக்கும் பணி நடைபெற்று வருகிறது. மேலும், புதுச்சேரி, காரைக்கால், மாஹி, ஏனாம் ஆகிய பகுதிகளிலும் இந்த பணிகள் நடைபெற்று வருகிறது. புதுச்சேரி லாஸ்பேட்டையில் உள்ள மகளிர் கல்லூரி மற்றும் மோதிலால் பாலிடெக்னிக் கல்லூரியிலும் இந்த பணியானது நடைபெற்று வருகிறது.

அதற்காக பெல் நிறுவனத்திலிருந்து 60 ஊழியர்கள் வந்துள்ளனர். அதில் புதுச்சேரியில் 46 நபர்களும், காரைக்காலில் 10 நபர்கள், மாஹி, ஏனாம் தலா 2 நபர்கள் சின்னம் பொருத்தும் பணியில் ஈடுபட்டு வருகின்றனர். ஒவ்வொரு இடத்திலும் வேட்பாளர்கள் முன்னிலையில் பெல் நிறுவன ஊழியர்கள் சின்னம் பொருத்தும் பணியில் ஈடுபட்டு வருகின்றனர். இவை அனைத்துமே வீடியோ பதிவு செய்யப்பட்டு வருகிறது. இந்தப் பணிகள் 2 நாட்கள் நடைபெறும். பணியின்போது, செல்போன் எடுத்துச் செல்ல அனுமதி இல்லை.

மேலும், சிசிடிவி கேமரா பொருத்தப்பட்டுள்ளது. பாதுகாப்பிற்காக 10 துணை ராணுவப் படையினர் வரவழைக்கப்பட்டுள்ளது. அதில் ஏற்கனவே 6 படையினர் புதுச்சேரிக்கு வந்துள்ளனர். மீதமுள்ள 4 படையினர் வரவுள்ளனர். புதுச்சேரியில் பதட்டமான வாக்குச்சாவடிகள் என 232 வாக்குச்சாவடிகள் கண்டறியப்பட்டுள்ளது. அந்தப் பகுதிகளில் அதிக அளவில் சிசிடிவி காட்சிகளும், அதிக அளவில் துணை ராணுவப் படையினரும் பணியில் அமர்த்தப்படுவர்.

புதுச்சேரியில் தேர்தல் பறக்கும் படையினர் 24 குழுக்கள் போடப்பட்டுள்ளது. மேலும், 48 பறக்கும் படையினர் பணியில் அமர்த்தப்பட உள்ளது. மொத்தம் 60 பறக்கும் படையினர் தேர்தல் பணியில் ஈடுபடுவர். இதுவரை பறக்கும் படையினர் மூலம் சந்தேகத்தின் அடிப்படையில் பிடிக்கப்பட்ட பணம் 6 கோடியே 50 லட்சம் ரூபாய் உள்ளது. அது உரிய ஆவணங்கள் கொடுக்கப்பட்டு மீண்டும் ஒப்படைக்கப்பட்டுள்ளது” என்றார்.

தொடர்ந்து, புதுச்சேரியில் அரசியல் கட்சிகள் பிரச்சாரத்தின் போது அதிக அளவில் வாகனங்கள் பயன்படுத்துவது குறித்த கேள்விக்கு, “இதற்காகத்தான் வீடியோ பதிவு செய்யப்பட்டுள்ளது. அதனை ஆராய்ந்து கொடுக்கப்பட்ட அனுமதியோடு கூடுதலாக இருந்தால், அவர்களுக்கு நோட்டீஸ் கொடுக்கப்பட்டு புகார் செய்யப்படும்.

கொடுக்கப்பட்ட அனுமதியுடன் வாகனங்கள் இருந்தால் தேர்தல் செலவில் சேர்க்கப்படும். மேலும், வாக்காளர்களுக்கு பணம் கொடுக்கப்படுவது சம்பந்தமாக எங்களுக்கு எந்த ஒரு புகாரும் வரவில்லை. இதற்காக 24 மணிநேரமும் கண்காணிப்பு செய்யப்பட்டு வருகிறது” எனத் தெரிவித்தார்.

வில்லியனூரில் நேற்று அரசு ஊழியர் வீட்டில் வருமான வரித்துறை ஊழியர்கள் சோதனை செய்து குறித்து கேட்டதற்கு, புதுச்சேரியைச் சேர்ந்த தேர்தல் பறக்கும் படையினர் இந்த சோதனையைச் செய்யவில்லை, வருமான வரித்துறையினர் செய்தனர். ஆகையால், இது சம்பந்தமான முழு விவரங்கள் எனக்குத் தெரியவில்லை" எனத் தெரிவித்தார்.