சென்னை: இந்தியாவில் 18வது நாடாளுமன்றத் தேர்தல் நாடு முழுவதும் ஏப்ரல் 19ஆம் தேதி தொடங்கி ஏழு கட்டங்களாக நடைபெற்ற முடிந்தது. நாளை (ஜூன் 4) வாக்கு எண்ணிக்கை நடைபெற இருக்கிறது.
இந்நிலையில், நேற்று இந்தியா கூட்டணியைச் சார்ந்த எதிர்க்கட்சி தலைவர்கள் இந்திய தேர்தல் ஆணையத்தில் மனு ஒன்றை வழங்கினர். அதில், மின்னணு வாக்கு பதிவு இயந்திரங்களின் முடிவுகளை அறிவிப்பதற்கு முன்பாக தபால் வாக்குகள் எண்ணப்பட்டு அவற்றின் முடிவுகளை அறிவிக்க வேண்டும் என மனுவில் குறிப்பிட்டுள்ளனர்.
அதேபோல, தமிழக தலைமை செயலகத்திலும் திமுக சார்பில் தமிழகத்தில் உள்ள 39 தொகுதிகளிலும் முதலில் தபால் வாக்குகளை எண்ணி முடிக்க வேண்டி வலியுறுத்தி மனு அளிக்கப்பட்டது.
இந்நிலையில், தலைமை தேர்தல் அதிகாரியிடம் மனு அளித்தது தொடர்பாக ஈடிவி பாரத் ஊடகத்திடம் பேசிய திமுக அமைப்புச் செயலாளர் ஆர்.எஸ். பாரதி, தபால் வாக்குகளை முதலில் எண்ணி முடிக்க வேண்டி வலியுறுத்தி தலைமை தேர்தல் அதிகாரியிடம் மனு அளித்துள்ளோம். அதன்படி முன்பிருந்தது போல தபால் வாக்குகளை ஈவிஎம் மிஷின் வாக்குகளை எண்ணுவதற்கு முன்பாக தபால் வாக்குகளை எண்ணி முடிவுகளை அறிவித்து விட்டு பிறகு ஈவிஎம் மிஷினில் பதிவான வாக்குகளை எண்ண வேண்டும் என தெரிவித்தார்.