தமிழ்நாட்டில் சாதி ஆணவ படுகொலைகள் அதிகம்; தடுப்புச் சட்டம் இயற்ற வேண்டும்: கே.பாலகிருஷ்ணன் வலியுறுத்தல் - cpim secretary about Genocide Act

CPIM State Secretary Balakrishanan: வரும் சட்டமன்ற கூட்டத் தொடரில் ஆணவ படுகொலை தடுப்புச் சட்டத்தை அரசு இயற்ற நடவடிக்கை எடுக்க வேண்டும் என மார்க்சிஸ்ட் கம்யூனிஸ்ட் கட்சி மாநிலச் செயலாளர் கே.பாலகிருஷ்ணன் தெரிவித்துள்ளார்.

திருநெல்வேலி: திருநெல்வேலி மார்க்சிஸ்ட் கம்யூனிஸ்ட் கட்சி அலுவலகத்தில் நடத்தி வைக்கப்பட்ட சாதி மறுப்பு திருமணத்திற்கு எதிர்ப்பு தெரிவித்து, திருமணம் செய்து கொண்ட பெண்ணின் பெற்றோர்கள் அலுவலகத்திற்குள் நுழைய முயன்ற போது ஏற்பட்ட பிரச்னையில் நிர்வாகிகள் உட்பட நான்கு பேர் காயமடைந்தனர்.

இந்த விவகாரம் தொடர்பாக பெருமாள் புரம் போலீசார் ஒன்பது பிரிவுகளில் வழக்குப்பதிவு செய்து 13 பேரை கைது செய்துள்ளனர். இந்நிலையில் திருநெல்வேலி மார்க்சிஸ்ட் கம்யூனிஸ்ட் கட்சி அலுவலகத்திற்கு வருகை தந்த கட்சியின் மாநிலச் செயலாளர் கே.பாலகிருஷ்ணன் செய்தியாளர்களைச் சந்தித்துப் பேசினார்.

அப்போது பேசிய அவர், "சமூக விரோத சாதிவெறி சக்திகள் மீது அரசு மற்றும் காவல்துறை கடுமையான நடவடிக்கைகளை எடுக்க வேண்டும். திருநெல்வேலி மாவட்டத்தில் கடந்த பல ஆண்டுகளாக சாதிவெறி செயல்கள் நடந்து வருவது தொடர்கதையாக இருக்கிறது. அய்யா வைகுண்டர் உள்ளிட்ட சாதி மறுப்பு தலைவர்கள் அதிகம் பிறந்த மண்ணில் சாதியின் பெயரால் நடக்கும் கொடுமைகளை ஏற்றுக்கொள்ள முடியாது.

அரசு கடுமையான நடவடிக்கைகளை எடுக்க வேண்டும். திருநெல்வேலி நடைபெற்ற சாதி மறுப்பு திருமணத்தை வைத்து மார்க்சிஸ்ட் கம்யூனிஸ்ட் கட்சியின் மீது பல்வேறு கருத்துக்களை சிலர் பரப்பி வருகின்றனர். இருவரும் ஒருவருக்கொருவர் விரும்பிய நிலையில் தான் மார்க்சிஸ்ட் கம்யூனிஸ்ட் கட்சி அலுவலகத்தில் அவர்களுக்கு திருமணம் செய்து வைக்கப்பட்டது. சாதி மறுப்பு திருமணம் செய்யும் தம்பதிகளுக்கு பாதுகாப்பு கேடயமாக மார்க்சிஸ்ட் கம்யூனிஸ்ட் கட்சி பக்கபலமாக திகழும்.

அரசு சாதி மறுப்பு திருமணம் செய்தவர்களுக்கு உரியப் பாதுகாப்பை அளித்து அரசு வேலை வழங்க வேண்டும், அரசு பாதுகாப்பு அளிக்க தவறினால் கடைசி வரை மார்க்சிஸ்ட் கம்யூனிஸ்ட் கட்சி அவர்களுக்குப் பாதுகாப்பாக இருக்கும். சாதி ஆணவ படுகொலைகள் அதிகரித்து வரும் மாநிலமாக தமிழகம் இருந்து வருகிறது. ஆணவ படுகொலை தடுப்பு சட்டம் நிறைவேற்றுவதற்கான மசோதா உச்சநீதிமன்றத்தால் வடிவமைக்கப்பட்டு தயார் நிலையில் இருக்கிறது.

அனைத்து மாநில தலைமைச் செயலாளர்களையும் அழைத்து இந்த சட்டம் தொடர்பாக ஆலோசனைகளும் வழங்கப்பட்டுள்ளது. தமிழக அரசு ஆணவ படுகொலையைத் தடுப்பதற்கும் மற்றும் சாதி மறுப்பு திருமணங்களை செய்து வைப்பதிலும் முற்போக்குடன் செயல்படுவதை உறுதி செய்யும் வகையில், நடைபெறும் சட்டமன்ற கூட்டத்தொடரில் ஆணவ படுகொலை தடுப்புச் சட்டத்தை ஏற்ற வேண்டும்.

இந்த விவகாரம் தொடர்பாக தமிழக சட்டமன்றத்தில் மார்க்சிஸ்ட் கம்யூனிஸ்ட் கட்சி குரல் கொடுக்கும். தமிழக முழுவதும் நடைபெறும் சாதி மறுப்பு திருமணங்கள் விவகாரத்தில் அனைத்து அரசியல் கட்சிகளும் கவனம் செலுத்த வேண்டும். ஆயிரம் காலம் பின்னால் உள்ள சாதி எனும் சகதியில் மக்கள் இன்னமும் ஊறிக் கொண்டிருக்கிறார்கள்.

சாதிப் பெயரால் ஆணவ படுகொலைகள் தொடர்ந்து நடந்து வருகிறது. சாதி அமைப்புகள் தான் அனைத்து பிரச்னைகளுக்கும் காரணமாக உள்ளது. சாதியை வைத்து அரசியல் பிழைப்பு நடத்தும் சிலர் இதுபோன்ற விவகாரத்தை அணையவிடாமல் ஊதி பெரிதாக்கி வருகின்றனர். அவர்களை தமிழக அரசும், காவல்துறையும் கடும் நடவடிக்கை எடுத்து அடக்க வேண்டும்.

முதலமைச்சரை சந்திக்க திட்டம்:மாஞ்சோலை தேயிலைத் தோட்ட விவகாரம் தொடர்பாக, மார்க்சிஸ்ட் கம்யூனிஸ்ட் கட்சி சார்பில் தமிழக முதலமைச்சரை நேரில் சந்தித்துப் பேச இருக்கிறோம். தமிழக அரசு மாஞ்சோலை தேயிலை நிறுவனத்தை எடுத்து நடத்த வேண்டும் என கேட்டுக்கொண்டார்.

இதையும் படிங்க:காற்றில் கலக்கும் கழிவு புகை.. கரூரில் தமிழ்நாடு செய்தித்தாள் காகித ஆலை நிறுவனம் முற்றுகை! - karur tnpl paper mill