இறந்து பிறந்த குழந்தை.. பிரசவத்திற்கு பிறகு தாயும் உயிரிழப்பு.. தனியார் மருத்துவமனை மீது குற்றசாட்டு!

தஞ்சை, பட்டுக்கோட்டையில் பிரசவத்தின் போது குழந்தை இறந்த நிலையில் தாயும் அதிக ரத்தப்போக்கு ஏற்பட்டு உயிரிழந்த சம்பவம் சோகத்தை ஏற்படுத்தியுள்ளது.

தஞ்சாவூர்: தஞ்சை மாவட்டம், பட்டுக்கோட்டையை அடுத்த துவரங்குறிச்சி தெற்கு தெருவை சேர்ந்தவர் பிரவீன் (33). இவருடைய மனைவி சந்தியா (33). இவர்களுக்கு திருமணம் ஆகி 3 வயதில் ஒரு பெண் குழந்தை உள்ளது. பிரவீனும் அவருடைய மனைவி சந்தியாவும் பெங்களூருவில் இன்ஜினியராக வேலை பார்த்து வந்தனர்.

இந்த நிலையில், சந்தியா இரண்டாவது முறையாக கர்ப்பமடைந்தார். இதனால் பிரசவத்திற்காக சந்தியாவும் அவரது கணவர் பிரவீனும் பட்டுக்கோட்டையில் உள்ள தங்கள் சொந்த ஊருக்கு வந்திருந்தனர்.

இந்த நிலையில், நேற்று சந்தியாவுக்கு பிரசவ வலி ஏற்பட்டதில் பட்டுக்கோட்டை நாடிமுத்து நகரில் உள்ள ஒரு தனியார் மருத்துவமனையில் சேர்த்தனர். அங்கு அவருக்கு ஆண் குழந்தை இறந்து பிறந்தது. மேலும், சந்தியாவுக்கு ரத்தப்போக்கு ஏற்பட்டு உயிருக்கு ஆபத்தான நிலை ஏற்பட்டது.

இதையும் படிங்க:போலீஸ், வக்கீல் என அனைவரின் முன்னிலையில் அரங்கேறிய படுகொலை!

இதனால், சந்தியாவை மேல்சிகிச்சைக்காக தஞ்சாவூர் அரசு மருத்துவமனைக்கு ஆம்புலன்சில் அனுப்பி வைத்தனர். ஆனால், செல்லும் வழியிலேயே சந்தியாவும் இறந்தார். இதனையடுத்து சந்தியா உடலை பட்டுக்கோட்டையில் உள்ள தனியார் மருத்துவமனைக்கு மீண்டும் கொண்டு வந்தனர். அப்போது ஆத்திரமடைந்த சந்தியாவின் உறவினர்கள் தனியார் மருத்துவமனை மீது கல்வீசி தாக்கினர்.

மேலும், பட்டுக்கோட்டை பழனியப்பன் தெருவில் நேற்று இரவு சாலை மறியலிலும் ஈடுபட்டனர். பின்னர் தகவல் அறிந்து சம்பவ இடத்துக்கு வந்த போலீசார் மறியலில் ஈடுபட்ட சந்தியாவின் உறவினருடன் பேச்சுவார்த்தை நடத்தி அவர்களை கலைந்து போகுமாறு கூறினர். இதனால் பட்டுக்கோட்டை நகரில் பெரும் பரபரப்பு ஏற்பட்டது.