சென்னை:கப்பலோட்டிய தமிழன் வ.உ.சிதம்பரனாரின் 88 ஆவது நினைவு தினத்தையொட்டி
சென்னை கிண்டி காந்தி மண்டபத்தில் உள்ள வ.உ.சிதம்பரனாரின் சிலைக்கு அருகே வைக்கப்பட்டுள்ள வ.உ.சிதம்பரத்தின் படத்திற்கு பாஜக முன்னாள் மாநில தலைவர் தமிழிசை சௌந்தரராஜன் மாலை அணிவித்து மரியாதை செலுத்தினார்.
இதையடுத்து செய்தியாளர்களை சந்தித்த தமிழிசை சௌந்தரராஜன் கூறுகையில், “வ.உ.சி அவருக்கு நினைவஞ்சலி செலுத்துவதில் பெருமை கொள்கிறோம். இந்திய பொருளாதாரம் மேம்பட வேண்டும் என்று போராடியவர் வ.உ.சிதம்பரனார். அவர் பெயரை கொண்டு தூத்துக்குடி துறைமுகத்திற்கு 170 கோடி ரூபாயில் மேம்பாட்டு திட்டங்களை பிரதமர் மோடி அறிவித்திருக்கிறார்.
தமிழக வளர்ச்சியில் மத்திய அரசு அதிக அக்கறை கொள்கிறது. அரசு மருத்துவர்கள் தனியார் மருத்துவமனைகளில் பணி புரிவது தவறு என்ற சட்டம் தெலுங்கானாவில் உள்ளது. அதேபோன்று தமிழகத்தில் அரசு மருத்துவர்கள், தனியார் மருத்துவமனைகளில் பணிபுரிய கூடாது என்ற சட்டத்தை கொண்டு வர வேண்டும். அரசு மருத்துவமனைகளில் காலிப் பணியிடங்களை சரியாக நிரப்பாதனால்தான் அரசு மருத்துவர்கள் சிறப்பான பணியை செய்ய முடிவதில்லை.
திருமாவளவனின் மனதில் இருப்பதை புரிந்து கொண்டு அவர் கேட்டதை செய்வோம் என முதலமைச்சர் கூறுகிறாரே தவிர, மக்கள் மனதில் என்ன இருக்கு என்பதை புரிந்து கொண்டு அவர் நடப்பதில்லை. திருமாவளவனின் மனதில் இருப்பதை புரிந்து கொண்டு அதை நிறைவேற்றுவதாக முதல்வர் கூறினார். ஆனால் திருமாவளவன் கூட்டத்தைக் கூட்டி மதுவிலக்கை அமல்படுத்த வேண்டும் என்று வைத்த கோரிக்கையை முதலமைச்சர் இன்னும் நிறைவேற்றவில்லை.