டான்செட், சீட்டா தேர்வெழுதும் மாணவர்களுக்கு ஒரு அறிவிப்பு.! அண்ணா பல்கலைக்கழகம் கூறுவது என்ன?

TANCET and CEETA Exam: முதுகலை பொறியியல் படிப்புகள் மற்றும் எம்பிஏ, எம்சிஏ படிப்புகளில் சேர்வதற்கான டான்செட் (TANCET), சீட்டா (CEETA) பொது நுழைவுத்தேர்விற்கு விண்ணப்பித்த மாணவர்கள் இன்று (பிப்.21) முதல் ஹால் டிக்கெட் பதிவிறக்கம் செய்து கொள்ளலாம் என அண்ணா பல்கலைக்கழகம் அறிவித்துள்ளது.

சென்னை:அண்ணா பல்கலைக்கழகம், வளாக கல்லூரி, இணைவு கல்லூரி மற்றும் தனியார் கல்லூரிகளில் எம்பிஏ, எம்சிஏ ஆகிய படிப்புகளில் சேர்வதற்குத் தமிழ்நாடு பொது நுழைவுத் தேர்வான டான்செட்டில் (TANCET) கட்டாயம் தேர்ச்சி பெற வேண்டும். அதே போல், எம்இ (M.E), எம்டெக் (M.Tech), எம்ஆர்க் (M.Arch), எம்பிளான் (M.Plan) ஆகிய முதுநிலை படிப்புகளில் சேர்வதற்குக் கடந்த ஆண்டு முதல், பொது பொறியியல் நுழைவுத் தேர்வு மற்றும் மாணவர் சேர்க்கை (CEETA) எனும் புதிய தேர்வு முறையை அண்ணா பல்கலைக்கழகம் அறிமுகம் செய்தது.

அதன்படி, 2024-25ஆம் கல்வியாண்டில் சேர்வதற்கான தமிழ்நாடு பொது நுழைவுத் தேர்வு (டான்செட்), முதுநிலை பொறியியல் படிப்புகளில் சேர்வதற்கான நுழைவுத் தேர்வு (சீட்டா-பி.ஜி) ஆகிய நுழைவுத் தேர்வுகளில் பங்கேற்கும் மாணவ மாணவிகள் ஜனவரி 10ஆம் தேதி முதல் பிப்ரவரி 12ஆம் தேதி வரை விண்ணப்பிக்கலாம் எனவும், இளநிலை படிப்புகளில் 2024-25ஆம் கல்வியாண்டில் இறுதி பருவ தேர்வு எழுத உள்ள மாணவர்கள் அதற்கான மதிப்பெண் சான்றிதழ் இல்லாமலும் விண்ணப்பிக்கலாம் எனவும் அறிவிக்கப்பட்டது.

இதையும் படிங்க:"சாமி சிலைகள், நினைவுச் சின்னங்களைப் பாதுகாக்க வேண்டும்" - சென்னை உயர்நீதிமன்றம் உத்தரவு!

அதனைத்தொடர்ந்து டான்செட் பொதுத் தேர்வில் எம்சிஏ (MCA) படிப்பிற்கு 9 ஆயிரத்து 206 பேரும், எம்பிஏ (MBA) படிப்பிற்கு 24 ஆயிரத்து 814 பேரும், எம்இ, எம்டெக், எம் ஆர்க், எம்பிளான் ஆகிய பட்டப் படிப்பிற்கு 5 ஆயிரத்து 281 பேரும் விண்ணப்பித்துள்ளனர்.

எம்சிஏ நுழைவுத்தேர்வுக்கு விண்ணப்பித்த மாணவர்களுக்கு மார்ச் 9ஆம் தேதி காலையிலும், எம்பிஏ படிப்பிற்கு விண்ணப்பிக்கும் மாணவர்களுக்கு அன்றைய தினம் பிற்பகலிலும் நுழைவுத்தேர்வு நடத்தப்படும் என அறிவிக்கப்பட்டு இருந்தது.மேலும், முதுநிலை பொறியியல் நுழைவுத்தேர்வுக்கு விண்ணப்பித்த மாணவர்களுக்கு மார்ச் 10ஆம் தேதி தேர்வு நடத்தப்படும் என்றும், இந்த நுழைவுத்தேர்வுகள் மாநிலம் முழுவதும் 14 நகரங்களில் நடத்த திட்டமிடப்பட்டுள்ளது.

இந்நிலையில் முதுநிலை பட்டப்படிப்பிற்கான நுழைவுத்தேர்வில் விண்ணப்பித்துள்ள மாணவ மாணவிகள் இன்று முதல் தங்களது ஹால் டிக்கெட்டுகளை அண்ணா பல்கலைக்கழகத்தின் இணையதளத்தில் பதிவிறக்கம் செய்து கொள்ளலாம் என பல்கலைக்கழகம் தரப்பில் அறிவிக்கப்பட்டுள்ளது.

இதையும் படிங்க:வேளாண் மற்றும் அதன் சார்புத் துறைகளுக்கான மூலதனம் மற்றும் வருவாய் ஒதுக்கீடு.. எவ்வளவு?