தேனியில் லாரி மற்றும் இருசக்கர வாகனம் மோதி விபத்து..சம்பவ இடத்தில் ஒருவர் உயிரிழப்பு!

தேனி அருகே லாரி மற்றும் இருசக்கர வாகனம் மோதிய விபத்தில் ஒருவர் சம்பவ இடத்திலேயே உயிரிழந்துள்ள சம்பவம் சோகத்தை ஏற்படுத்தியுள்ளது.

தேனி:லாரி மற்றும் இருசக்கர வாகனம் மோதிய விபத்தில் ஒருவர் உயிரிழந்துள்ள சம்பவம் குறித்து அல்லிநகரம் போலீசார் வழக்குப் பதிவு செய்து விசாரணை மேற்கோண்டு வருகின்றனர்.

தேனி அருகே கோட்டூர் பகுதியைச் சேர்ந்தவ பிரவீன் (35). அவரது சகோதரர் மதன்குமார் (32) இருவரும் தலா ஒரு இரு சக்கர வாகனத்தில் திண்டுக்கல் - குமுளி தேசிய நெடுஞ்சாலையில் பெரியகுளம் நோக்கி சென்று கொண்டிருந்துள்ளனர். அப்போது மதுரையை நோக்கி காய்கறி ஏற்றிக்கொண்டு லாரி ஒன்று சென்றுள்ளது.

அப்போது, அல்லிநகரம் அருகே எதிர்பாராத விதமாக இரண்டு இருசக்கர வாகனங்களும் லாரியில் மோதி விபத்துக்குள்ளாயின. இதில் பிரவீன் லாரியின் சக்கரத்தில் சிக்கி சம்பவ இடத்திலேயே பரிதாபமாக உயிரிழந்துள்ளார். மதன்குமார் படுகாயங்களுடன் உயிர் தப்பியுள்ளார். இருசக்கர வாகனம் லாரியில் மோதிய வேகத்தில் சுமார் அரை கிலோ மீட்டர் தூரம் இழுத்துச் சென்றதில், பெட்ரோல் கசிந்து லாரி தீ பற்றி எரிய தொடங்கியுள்ளது.

இதையும் படிங்க:உ.பி.யில் அதிகாலை நடந்த கார் விபத்து; நான்கு பெண்கள் உட்பட 5 பேர் பலி..!

இது குறித்து தகவல் அறிந்து சம்பவ இடத்திற்கு வந்த அல்லிநகர போலீசார் மற்றும் தேனி தீயணைப்பு துறையினர், அரை மணி நேரம் போராடி லாரியில் ஏற்பட்ட தீயை அணைத்துள்ளனர். இந்த தீ விபத்தில், லாரியில் இருந்த காய்கறி மூட்டைகள் எரிந்து சாம்பலாயின. மேலும், படுகாயம் அடைந்த மதன்குமாரை மீட்ட போலீசார் ஆம்புலன்ஸ் மூலம் தேனி அரசு மருத்துவக் கல்லூரி மருத்துவமனைக்கு சிகிச்சைக்காக அனுப்பி வைத்துள்ளனர்.

தொடர்ந்து, உயிரிழந்த பிரவீன் உடல் பிரேத பரிசோதனைக்காக அரசு மருத்துவமனைக்கு அனுப்பி வைக்கப்பட்டது. மேலும், இந்த விபத்து குறித்து அல்லிநகர போலீசார் வழக்குப் பதிவு செய்து, தப்பி ஓடிய லாரி டிரைவரை தேடி வருகின்றனர்.

ஈடிவி பாரத் தமிழ்நாடு (Credits - ETV Bharat Tamil Nadu)

ஈடிவி பாரத் தமிழ் வாட்ஸ்ஆப் சேனலில் இணையஇங்கே கிளிக் செய்யவும்