சென்னை: பிரபல நடிகர் விஜய் கடந்த பிப்ரவரி மாதம் ’தமிழக வெற்றிக் கழகம்’ கட்சி தொடங்கினார். தமிழ் சினிமாத்துறையில் பல கோடி ரசிகர்களின் ஆதரவுடன் உச்சத்தில் இருக்கும் விஜய் சினிமாவில் இருந்து விடை பெற்று அரசியலில் நுழைந்துள்ளார். எச்.வினோத் இயக்கும் ’தளபதி 69’ திரைப்படமே தான் நடிக்கும் கடைசி திரைப்படம் என விஜய் அறிவித்துள்ளார்.
இதனால் விஜய் ரசிகர்கள் வருத்தத்தில் இருந்தாலும், விஜய்யின் அரசியல் பயணம் வெற்றி பெற ஏகோபித்த ஆதரவு அளித்து வருகின்றனர். கடந்த மாதம் தவெக கட்சி கொடியை அறிமுகம் செய்த விஜய், இன்று விழுப்புரம் மாவட்டத்தில் உள்ள விக்கிரவாண்டி வி.சாலையில் தனது கட்சியின் முதல் அரசியல் மாநாட்டை பிரமாண்ட முறையில் நடத்துகிறார். அதற்கு ரசிகர்கள் லட்சக்கணக்கில் திரண்டுள்ளனர்.
இந்நிலையில் தவெக கட்சியின் முதல் அரசியல் மாநாடு வெற்றி பெற தமிழ் திரைத்துறையை சார்ந்த பல பிரபலங்கள் வாழ்த்து தெரிவித்து வருகின்றனர். நடிகர் சிவகார்த்திகேயன் தனது சமூக வலைதள பக்கத்தில், “இன்று தனது புதிய பயணத்தை தொடங்கவிருக்கும் விஜய் சாருக்கு எனது மனமார்ந்த வாழ்த்துக்கள்” என பதிவிட்டுள்ளார்.