சென்னை:தமிழ் சினிமாவில் முன்னணி நடிகராக வலம் வருபவர், நடிகர் சூர்யா. இவரது நடிப்பில் கடைசியாக 2022ஆம் ஆண்டு 'எதற்கும் துணிந்தவன்' படம் வெளியானது. அதற்கு பிறகு தற்போது இயக்குநர் சிறுத்தை சிவா இயக்கத்தில் 'கங்குவா' என்ற படத்தில் நடித்து வருகிறார். மிகப்பெரிய பட்ஜெட்டில் உருவாகி வரும் இப்படம் பீரியட் காலகட்டத்தில் நடப்பது போன்ற படமாக உருவாகி வருகிறது.
இப்படத்தை ஸ்டூடியோ கிரீன் ஞானவேல் ராஜா தயாரித்துள்ளார். பத்து மொழிகளில் இப்படம் வெளியாக உள்ளது. இப்படத்திற்கு தேவி ஸ்ரீ பிரசாத் இசை அமைத்துள்ளார். இப்படத்தை தொடர்ந்து, சூர்யா தனது 43வது படமாக சுதா கொங்கரா இயக்கும் புறநானூறு படத்தில் நடிக்க ஒப்பந்தமானார். இதன் அறிவிப்பு சமீபத்தில் வெளியானது.
இந்த நிலையில், சுதா கொங்கராவுடனான புறநானூறு திரைப்படத்திற்கு இன்னும் நேரம் தேவைப்படுகிறது என சில நாட்களுக்கு முன்பு நடிகர் சூர்யா தெரிவித்திருந்தார். இந்த நிலையில், தற்போது சூர்யாவின் 44வது படம் குறித்த அறிவிப்பு வெளியாகியுள்ளது. இதன்படி, கார்த்திக் சுப்புராஜ் இயக்கத்தில் சூர்யா நடிக்க உள்ளார். இப்படத்தை நடிகர் சூர்யாவின் 2டி என்டர்டைன்மென்ட் தயாரிப்பு நிறுவனமும், கார்த்திக் சுப்புராஜின் ஸ்டோன் பெஞ்ச் நிறுவனமும் இணைந்து தயாரிக்க உள்ளது.