சென்னை: ஏஜிஎஸ் எண்டர்டெயின்மெண்ட் தயாரிப்பில் வெங்கட் பிரபு இயக்கத்தில் விஜய் நடித்துள்ள கோட் திரைப்படம் இன்று உலகம் முழுவதும் வெளியாகியுள்ளது. இப்படத்தில் மோகன், பிரசாந்த், பிரபுதேவா, சினேகா, மீனாட்சி சவுத்ரி உள்ளிட்ட பலர் நடித்துள்ளனர். தமிழ்நாடு முழுவதும் அனைத்து திரையரங்குகளும் விழாக்கோலம் பூண்டுள்ளது. இன்று காலை முதல் ரசிகர்கள் திரையரங்குகளில் குவிந்து வருகின்றனர்.
மதுரவாயலில் உள்ள ஏஜிஎஸ் திரையரங்கில் நடிகை த்ரிஷா, இசையமைப்பாளர் யுவன் ஷங்கர் ராஜா மற்றும் தயாரிப்பாளர் அர்ச்சனா கல்பாத்தி உள்ளிட்டோர் ‘கோட்’ திரைப்படத்தை பார்த்து ரசித்தனர். இசையமைப்பாளர் யுவன் ஷங்கர் ராஜாவின் மனைவியும் திரைப்படத்தை பார்த்து ரசித்தார். இந்நிலையில் கோட் திரைப்படம் நல்ல வரவேற்பைப் பெற்று வருகிறது.
படத்தில் ஆரம்பம் முதல் விறுவிறுப்பான திரைக்கதையுடன் இருப்பதாக ரசிகர்கள் சமூக வலைதளங்களில் தெரிவித்து வருகின்றனர். மேலும் கோட் படத்தில் ரசிகர்கள் கொண்டாட பல சர்ப்ரைஸ் உள்ளதாக கூறப்படுகிறது.