சென்னை: ராஜ்கமல் பிலிம்ஸ் இண்டர்நேஷனல் மற்றும் சோனி புரோடக்ஷன்ஸ் தயாரிப்பில் ராஜ்குமார் பெரியசாமி இயக்கத்தில் சிவகார்த்திகேயன், சாய் பல்லவி நடித்துள்ள திரைப்படம் 'அமரன்'. இப்படத்தின் கதை தமிழ்நாட்டை சேர்ந்த முன்னாள் இராணுவ வீரர், மேஜர் முகுந்த் வரதராஜனின் வாழ்க்கையை தழுவி உருவாக்கப்பட்டுள்ளது.
ஜீவி பிரகாஷ் இசையமைத்துள்ள 'அமரன்' திரைப்படம் வரும் அக்டோபர் 31ஆம் தேதி தீபாவளி பண்டிகையையொட்டி வெளியாகவுள்ளது. இப்படத்தின் டீசர் கடந்த பிப்ரவரி 16ஆம் தேதி சிவகார்த்திகேயன் பிறந்தநாளன்று வெளியானது. அப்போது ரசிகர்கள் இப்படத்திற்காக நடிகர் சிவகார்த்திகேயன் உடல் அமைப்பை மாற்றி கடினமாக உழைப்பை செலுத்தியுள்ளதாக பாராட்டினர்.
இதனைத்தொடர்ந்து நடிகை சாய் பல்லவி பிறந்தநாளுக்கு ஸ்பெஷல் போஸ்டர் வெளியானது. தற்போது படக்குழு போஸ்ட் புரொடக்ஷன்ஸ் பணிகளில் மும்முரமாக ஈடுபட்டுள்ள நிலையில், சாய் பல்லவி அமரன் பட டப்பிங் பணிகளில் ஈடுபட்டுள்ளதாக தனது சமூக வலைதள பக்கத்தில் பதிவிட்டார். இந்நிலையில் நாளை (ஆக.15) சுதந்திர தினத்தை முன்னிட்டு அமரன் படத்தின் முதல் சிங்கிள் வெளியாகும் என எதிர்பார்க்கப்படும் நிலையில், இன்று அமரன் படக்குழு மேக்கிங் வீடியோ ஒன்றை வெளியிட்டுள்ளது.