ஹைதராபாத்: பிரபல தெலுங்கு நடிகர் நாகார்ஜுனாவின் மகனும், நடிகருமான நாக சைதன்யா, ஏ மாயா சேசாவே, மனம், லவ் ஸ்டோரி, மஜிலி உள்ளிட்ட பல படங்களில் நடித்துள்ளார். வெங்கட் பிரபு இயக்கத்தில் கஸ்டடி என்ற படம் மூலம் தமிழில் அறிமுகமானார். பிரபல நடிகர் நாக சைதன்யாவிற்கும், நடிகை சோபிதா துலிபாலா இன்று நிச்சயதார்த்தம் நடைபெற்றுள்ளது.
இதுகுறித்து அவரது தந்தை நாகார்ஜுனா அவரது எக்ஸ் பக்கத்தில் புகைப்படங்க்ள் பதிவிட்டு வாழ்த்து தெரிவித்துள்ளார். அவரது பதிவில், "எங்கள் மகன் நாக சைதன்யாவிற்கும், சோபிதா துலிபாலாவிற்கும் இன்று காலை 9.42 மணியளவில் நிச்சயதார்த்தம் நடைபெற்றுள்ளது என்பதை மகிழ்ச்சியுடன் தெரிவித்து கொள்கிறேன். எங்கள் குடும்பத்திற்கு சோபிதா துலிபாலாவை வரவேற்கிறோம். 8.8.8 முடிவில்லா காதலின் தொடக்கம்" என பதிவிட்டுள்ளார்.
நடிகை சோபிதா துலிபாலா கடந்த 2013ஆம் ஆண்டு ஃபெமினா மிஸ் இந்தியா பட்டத்தை வென்றார். 2016ஆம் ஆண்டு சினிமாவில் நடிக்க தொடங்கிய இவர், பொன்னியின் செல்வன்-2 படத்தில் வானதி கதாபாத்திரத்தில் நடித்தார்.