டான்செட் 2025, சீட்டா நுழைவுத் தேர்வுகளுக்கு இன்று முதல் ஆன்லைனில் விண்ணப்பம்!

டான்செட் 2025, சீட்டா நுழைவுத் தேர்வுகளுக்கு ஜனவரி 24 முதல் பிப்ரவரி 21 வரை விண்ணப்பிக்கலாம் என அண்ணா பல்கலைக்கழக பொது நுழைவுத்தேர்வு செயலாளர் ஸ்ரீதரன் அறிவிப்பு வெளியிட்டுள்ளார்.

சென்னை:முதுகலைப் பொறியியல் படிப்புகளான எம்.இ., எம்.டெக்., எம்.பிளான்., எம்.ஆர்க் ஆகியவற்றில் மாணவர்கள் சேர்வதற்கான CEETA மற்றும், எம்.பி.ஏ., எம்.சி.ஏ., ஆகிய படிப்புகளில் சேர்வதற்கான டான்செட் 2025 தேர்வினை எழுதுவதற்கு ஜனவரி 24-ஆம் தேதி முதல் பிப்ரவரி 21-ஆம் தேதி வரை விண்ணப்பிக்கலாம் என அறிவிக்கப்பட்டுள்ளது.

மேலும் முதுகலைப் பொறியியல் படிப்பில் சேர்வதற்கான நுழைவுத் தேர்வினை எழுதுவதற்கு விண்ணப்பிக்கும் போதே கலந்தாய்விற்கும் சேர்த்து விண்ணப்பம் செய்ய வேண்டும். 2024-ஆம் ஆண்டு நடைபெற்ற தேர்வினை 39,301 மாணவர்கள் எழுதினர். இந்தாண்டு அதிகளவில் மாணவர்கள் எழுதுவார்கள் என எதிர்பார்க்கப்படுகிறது.

தமிழ்நாட்டில் முதுகலை தொழிற்கல்விப் படிப்புகளில் சேர்வதற்கான அண்ணா பல்கலை கழகம் நடத்தும் நுழைவுத் தேர்வு மதிப்பெண் அடிப்படையில் மாணவர்கள் சேர்க்கை நடத்தப்படுகிறது. தமிழ்நாடு பொது நுழைவுத்தேர்வு மூலம் எம்.பி.ஏ., (MBA), எம்.சி.ஏ (MCA) படிப்புகளுக்கும், முதுகலைப் பொறியியல் படிப்புகளான எம்.இ., எம்.டெக்., எம்.ஆர்க்., எம்.பிளான் ஆகியவற்றிற்கு (CEETA-PG) நுழைவுத் தேர்வு தனித்தனியாக நடத்தப்பட உள்ளது.

எப்படி விண்ணப்பிப்பது?

இது குறித்து அண்ணா பல்கலைக் கழக பொது நுழைவுத்தேர்வு செயலாளர் ஸ்ரீதரன் அறிவிப்பு வெளியிட்டுள்ளார். அதன்படி, முதுகலைப் பொறியியல் படிப்புகளான எம்.இ., (ME), எம்.டெக்., (M.Tech), எம்.பிளான் ஆகியவற்றில் மாணவர்கள் சேர்வதற்கான CEETA மற்றும், எம்.பி.ஏ., எம்.சி.ஏ ஆகிய படிப்புகளில் சேர்வதற்கான தமிழ்நாடு பொது நுழைவுத்தேர்வுவிற்கு (டான்செட் 2025) ஜனவரி 24-ஆம் தேதி முதல் பிப்ரவரி 21-ஆம் தேதி வரை https://tancet.annauniv.edu என்ற இணையதளத்தில் விண்ணப்பிக்கலாம்.

இளங்கலை பொறியியல் படிப்பில் இறுதி செமஸ்டர் படித்து தேர்வு எழுதி மதிப்பெண் பட்டியல் இல்லாவிட்டாலும் விண்ணப்பிக்கலாம். எம்.சி.ஏ., எம்.பி.ஏ படிப்புகளுக்கு எஸ்.சி, எஸ்.சி.ஏ., எஸ்.டி பிரிவினருக்கு 500 ரூபாயும், பிற வகுப்பினருக்கு 1,000 ரூபாயும் விண்ணப்ப கட்டணமாக செலுத்த வேண்டும். இவர்களுக்கான பொது நுழைவுத் தேர்வு மார்ச் 22-ஆம் தேதி நடைபெறுகிறது.

CEETA, எம்.இ., எம்.டெக்., எம்.ஆர்க்., எம்.பிளான் ஆகிய முதுகலை பொறியியல் படிப்புகளுக்கு எஸ்.சி., எஸ்.சி.ஏ., எஸ்.டி பிரிவினருக்கு 900 ரூபாயும், இதர பிரிவினருக்கு 1,800 ரூபாயும் கட்டணமாக செலுத்த வேண்டும். இவர்களுக்கு கலந்தாய்வு கட்டணமும் இதில் அடங்கும். இவர்களுக்கான நுழைவுத்தேர்வு மார்ச் 23-ஆம் தேதி நடைபெறுகிறது.

இதற்காக https://tancet.annauniv.edu/tancet என்ற இணையதளத்தில் மாணவர்கள் கட்டணங்களை செலுத்த வேண்டும். இதே இணையதள முகவரியில் தேர்வுக்குரிய நுழைவுச்சீட்டைப் (Hall Ticket) பதிவிறக்கம் செய்து கொள்ள வேண்டும்.

இவர்கள் விண்ணப்பிக்க முடியாது!

அண்ணா பல்கலைக்கழகம், அண்ணாமலைப் பல்கலைக் கழகம், அரசு மற்றும் அரசு உதவிப்பெறும் கல்லூரிகள், சுயநிதிக் கல்லூரிகளில் நுழைவுத்தேர்வு மதிப்பெண் அடிப்படையில் மாணவர்கள் சேர்க்கை நடத்தப்படும்.

இதையும் படிங்க

பி.இ., பி.டெக் பட்டத்தை தொலைத்தூரக் கல்வி மூலமோ அல்லது வார இறுதி நாட்களில் நடைபெறும் வகுப்பு மூலமோ பயின்றவர்களுக்கு நுழைவுத்தேர்வினை எழுத தகுதியில்லை. மேலும் 10, 12-ஆம் வகுப்பு, மூன்று ஆண்டு டிப்ளமோ படித்தவர்களுக்கும் எம்.இ., எம்.டெக்., எம்.ஆர்க்., எம்.பிளான் படிப்பில் சேர தகுதியில்லை எனவும் அறிவிக்கப்பட்டுள்ளது.

தேர்வு நடைபெறும் இடங்கள்

மாணவர்களுக்கான பாடத்திட்டம் மற்றும் வினா விடைகளுக்கு அளிக்கப்படும் மதிப்பெண் விபரங்களும் வெளியிடப்பட்டுள்ளது.
நுழைவுத்தேர்வு சென்னை, கோயம்புத்தூர், சிதம்பரம், திண்டுக்கல், ஈரோடு, காரைக்குடி, மதுரை, நாகர்கோவில், சேலம், தஞ்சாவூர், திருநெல்வேலி, திருச்சிராப்பள்ளி, வேலூர், விழுப்புரம், பாகூர் ஆகிய 15 இடங்களில் நடைபெறும்.

மேலும் விபரங்களை பெறுவதற்கு செயலளார், தமிழ்நாடு பொது நுழைவுத்தேர்வு, நுழைவுத்தேர்வு மையம், அண்ணா பல்கலைக் கழகம், சென்னை என்ற முகவரியிலோ அல்லது 044-2235 8289 / 044-2235 8314 என்ற தொலைபேசி எண்களில் தொடர்புக் கொள்ளலாம்.

மாணவர்கள் ஆன்லைன் மூலமாக மட்டுமே விண்ணப்பிக்க முடியும் அதன் அடிப்படையில் தான் சேர்க்கை நடைபெறும். கடைசி நேரத்தில் ஏற்படும் தடங்களை தவிர்க்க முன்னரே விண்ணப்பிக்கவும்.