புதுடெல்லி:உத்தரப்பிரதேச மாநிலம் பிரயாக்ராஜ்ஜில் நடைபெற்று வரும் மகா கும்பமேளாவை முன்னிட்டு பக்தர்களின் அதிக பயணத் தேவையைப் பூர்த்தி செய்வதற்காக, டெல்லியில் இருந்து பிரயாக்ராஜுக்கு தினசரி விமானங்களை இயக்கப் போவதாக ஏர் இந்தியா நிறுவனம் அறிவித்துள்ளது.
12 ஆண்டுகளுக்கு ஒரு முறை நடைபெறும் மகா கும்பமேளா தற்போது பிரயாக்ராஜ் நகரில் நடைபெற்று வருகிறது. இது 144-வது கும்பமேளா என்பதால் இந்தியா மட்டுமின்றி உலகம் முழுவதும் இருந்து பக்தர்கள் குவிந்து வருகின்றனர். இந்த கும்பமேளா நேற்று முன் தினம் தொடங்கிய நிலையில், 45 நாட்கள் அதாவது பிப்ரவரி 25-ம் தேதி நடைபெறவுள்ளது.
இந்த நிலையில், பக்தர்களின் தேவையை அடுத்து, டெல்லியில் இருந்து பிரயாக்ராஜுக்கு தினமும் விமானம் இயக்கப்படும் என ஏர் இந்தியா நிறுவனம் அறிவித்துள்ளது. இது தொடர்பாக அந்த நிறுவனம் வெளியிட்ட அறிக்கையில், ஜனவரி 25 முதல் பிப்ரவரி 28 வரை இந்த வழித்தடத்தில் விமானங்களை இயக்கப்போவதாக தெரிவித்துள்ளது.