சூடுபிடிக்கும் துணை முதல்வர் விவகாரம்.. ஒரே நேரத்தில் உயர் பதவி வகித்த தந்தை - மகன் யார்? - Father and son heir politics

Father and son heir politics: இந்திய அரசியல் வரலாற்றில் தந்தை ஒரு மாநிலத்தின் முதலமைச்சராக இருந்த காலகட்டத்தில் அவர்களது மகன் துணை முதலமைச்சர் அல்லது சட்டமன்ற உறுப்பினராக உயர் பதவி வகித்தது குறித்து இந்த செய்தித் தொகுப்பில் காணலாம்.

சென்னை:முதலமைச்சர் மு.க.ஸ்டாலின் தலைமையிலான தமிழ்நாடு சட்டப்பேரவை பதவியேற்று மூன்றாண்டுகள் நிறைவடைந்து தற்போது நான்காவது ஆண்டு நடைபெற்று வரும் நிலையில், மு.க.ஸ்டாலின் மகனும், இளைஞர் நலன் மற்றும் விளையாட்டு மேம்பாட்டுத் துறை அமைச்சருமான உதயநிதி ஸ்டாலின் துணை முதலமைச்சராக நியமிக்கப்பட உள்ளதாக கடந்த சில நாட்களுக்கு முன் தகவல் வெளியானது. இது தமிழ்நாடு அரசியல் வட்டாரத்தில் பெரும் பேசுபொருளாகியது.

இது குறித்து திமுக இளைஞரணி விழாவில் உதயநிதி ஸ்டாலின், "தான் துணை முதலமைச்சராக பதவியேற்க உள்ளதாக வெளியான வதந்தி, கிசுகிசுக்களை நம்ப வேண்டாம்" என கூறினார். அதே நேரத்தில், மூத்த அமைச்சர் துரைமுருகன் இந்த விவகாரம் குறித்து, “உதயநிதி ஸ்டாலின் துணை முதலமைச்சர் ஆவது குறித்து முதலமைச்சர் ஸ்டாலின் தான் முடிவெடுப்பார்” எனக் கூறியுள்ளார்.

இந்நிலையில், இந்திய அரசியல் வரலாற்றில் தந்தை ஒரு மாநிலத்தின் முதலமைச்சராக இருந்த நேரத்தில், அவர்களது மகன் துணை முதலமைச்சர் அல்லது சட்டமன்ற உறுப்பினராக உயர் பதவி வகித்தது குறித்த விவரங்களைக் காணலாம்

பஞ்சாப் முன்னாள் முதலமைச்சர் பிரகாஷ் சிங் பதல் - மகன் சுக்பிர்:

2009 - கடந்த 2009ஆம் ஆண்டு ஜனவரி 21ஆம் தேதி பஞ்சாப் முதலமைச்சராக பிரகாஷ் சிங் பதல் இருந்த போது, அவரது மகன் சுக்பிர் பஞ்சாப் மாநிலத்தின் துணை முதலமைச்சராக நியமிக்கப்பட்டார். இதனைத் தொடர்ந்து, அடுத்த ஆறு மாத காலத்திற்குள் சட்டமன்ற உறுப்பினராக தேர்வு செய்யப்படாததால், அதே ஆண்டு ஆகஸ்ட் மாதத்தில் மீண்டும் துணை முதலமைச்சராக அவர் பதவி ஏற்றார்.

தமிழ்நாடு முன்னாள் முதலமைச்சர் மு.கருணாநிதி - மகன் மு.க.ஸ்டாலின்:

2009 - 2011 - கடந்த 2009ஆம் ஆண்டு மே 29ஆம் தேதி மு.க.ஸ்டாலின் துணை முதலமைச்சராக பதவியேற்றார். மு.க.ஸ்டாலின் தமிழ்நாட்டின் முதல் துணை முதலமைச்சர் என்ற பெருமையையும் பெற்றார்.

ஆந்திர முதலமைச்சர் சந்திரபாபு நாயுடு - மகன் நாரா லோகேஷ்:

2014 - 2019 - சந்திரபாபு நாயுடு 2014 முதல் 2019 வரை ஆந்திர முதலமைச்சராக இருந்த போது, அவரது மகன் நாரா லோகேஷ் தகவல் தொழில்நுட்பத்துறை அமைச்சராக 2014 முதல் 2019ஆம் ஆண்டு வரையிலும், பஞ்சாயத்து ராஜ் மற்றும் ஊரக வளர்ச்சித் துறை அமைச்சராக 2017 முதல் 2019ஆம் ஆண்டு வரையிலும் பதவி வகித்தார்.

தெலங்கானா முன்னாள் முதலமைச்சர் சந்திரசேகர் ராவ் - மகன் கே.டி. ராமா ராவ்:

2014 - 2023 - சந்திரசேகர ராவ் மற்றும் அவரது மகன் கே.டி.ராமா ராவ் இருவரும் தெலங்கானா ராஷ்டிர சமிதி கட்சி (அப்போது TRS என்ற பெயரில் கட்சி செயல்பட்டது) ஆட்சி அமைத்த போது சந்திரசேகர ராவ் முதலமைச்சராக பதவியேற்றார். இதனைத் தொடர்ந்து, 2023ஆம் ஆண்டு வரை தெலங்கானா முதலமைச்சராக சந்திரசேகர ராவ் பதவி வகித்தார். இந்த 2014 முதல் 2023 காலக்கட்டத்தில் அவரது மகன் கே.டி.ராமா ராவ் பல்வேறு துறைகளில் அமைச்சராக பதவியில் இருந்தார்.

மகாராஷ்டிரா முன்னாள் முதலமைச்சர் உத்தவ் தாக்கரே - மகன் ஆதித்யா தாக்கரே:

நவம்பர் 2019 - ஜூன் 2022 - கடந்த 2019ஆம் ஆண்டு நவம்பர் 28ஆம் தேதி உத்தவ் தாக்கரே, தேர்தலுக்குப் பின் உருவாக்கப்பட்ட மகா விகாஸ் அகாதி என்ற கூட்டணி மூலம் மகாராஷ்டிரா மாநிலத்தின் 18வது முதலமைச்சராக தேர்ந்தெடுக்கப்பட்டார். அப்போது டிசம்பர் 30ஆம் தேதி 2019ஆம் ஆண்டு மகாராஷ்டிரா அமைச்சரவையில் சுற்றுலா மற்றும் சுற்றுச்சூழல் துறை அமைச்சராக அவரது மகன் ஆதித்யா தாக்கரே தேர்ந்தெடுக்கப்பட்டார்.

ஈடிவி பாரத் தமிழ்நாடு (Credits - ETV Bharat Tamil Nadu)

ஈடிவி பாரத் தமிழ் வாட்ஸ்ஆப் சேனலில் இணைய இங்கே கிளிக் செய்யவும்

இதையும் படிங்க:ஷிரூர் மலைச்சரிவு; மீட்புப் பணிகளை ஆய்வு செய்த முதலமைச்சர்.. விரைந்த இராணுவம்! - Shirur landslide