மும்பை:பாலிவுட் நடிகர் சைஃப் அலி கான் கத்தியால் குத்தப்பட்ட சம்பவம் திரைப்படத் துறையினரையும் ரசிகர்களையும் பெரும் அதிர்ச்சியில் ஆழ்த்தியுள்ளது. மும்பை பாந்த்ரா மேற்கு பகுதியில் உள்ள நடிகர் சைஃப் அலி கான் வீட்டிற்குள் நேற்று அதிகாலை நுழைந்த மர்ம நபர், அங்கு கொள்ளையடிக்க முயன்றதாகக் கூறப்படுகிறது. அப்போது நடிகர் சைஃப் அலி கான் தடுக்க முயன்ற போது இருவருக்கும் இடையே கைகலப்பு ஏற்பட்டதாகவும் கூறப்படுகிறது. வீட்டிற்குள் நுழைந்த அந்த மர்ம நபர் நடிகர் சைஃப் அலி கானிடம் ரூ.1 கோடி கேட்டதாக காவல்துறை வட்டாரங்கள் தெரிவிக்கின்றன.
அதிகாலை நேரத்தில் அந்த அடுக்குமாடி கட்டிடத்தின் படிக்கட்டு வழியாக நுழைந்த அந்த நபர், டி-சர்ட், ஜீன்ஸ் மற்றும் ஆரஞ்சு நிற ஸ்கார்ஃப் அணிந்திருந்தார். நடிகர் சைஃப் அலி கானிடம் ரூ.1 கோடி கேட்ட போது அவர் கொடுக்க மறுத்ததாகக் கூறப்படுகிறது. இதனால், ஆத்திரம் அடைந்த அந்த நபர் சைஃப் அலி கானை தாக்கத் தொடங்கினார். இதில் சைஃப் அலி கானுக்கு கழுத்து மற்றும் கையில் ஆறு இடங்களில் கத்திக்குத்து விழுந்தது. மேலும் அவரது முதுகெலும்புக்கு அருகில் கடுமையான காயம் ஏற்பட்டது. இந்த தாக்குதலில் வீட்டில் இருந்த சைஃப் அலி கானின் மனைவி மற்றும் மகன் ஆகியோரும் காயமடைந்ததாக கூறப்படுகிறது.
நடிகரின் மூத்த மகன் இப்ராஹிம் தனது தந்தையை லீலாவதி மருத்துவமனைக்கு அழைத்துச் செல்ல விரைந்தார். தாமதம் காரணமாக அவர்களால் வாகனத்தை எடுத்துச் செல்ல முடியவில்லை. இருப்பினும், இப்ராஹிம் ஒரு ஆட்டோ ரிக்ஷாவைக் கண்டு தனது தந்தையை மருத்துவமனைக்கு அழைத்துச் சென்றார். அவரது மனைவி நடிகை கரீனா கபூர் கான் உட்பட அவரது குடும்பத்தினர், சைஃப் அலிகானுடன் இருந்தனர்.
குறிப்பிட்டபடி, அவசர அறுவை சிகிச்சைக்குப் பிறகு சைஃப் அலி கான் தற்போது நலமாக இருப்பதாக மருத்துவர்கள் உறுதிப்படுத்தியுள்ளனர். "நடிகர் ஆபத்திலிருந்து மீண்டுவிட்டார்; அறுவை சிகிச்சை நன்றாக நடந்தது. காயங்கள் ஆழமாக இருந்தன, ஆனால் மருத்துவர்கள் அதைச் சரி செய்து விட்டனர்," என்று மருத்துவமனை குழு தெரிவித்துள்ளது. சைஃப் அலி கானின் அறுவை சிகிச்சை பற்றிய விவரங்கள் குறித்து, மார்பு முதுகெலும்பில் ஒரு பெரிய காயம் இருந்தது, முதுகில் கத்தி இருந்தது, மேலும் இரண்டு ஆழமான காயங்களையும் அவர்கள் குறிப்பிட்டனர் - ஒன்று கழுத்திலும் மற்றொன்று கையில்.
சைஃப் நாளை காலை வரை ஐசியுவில் தொடர்ந்து கண்காணிப்பில் இருப்பார், இரண்டு அல்லது மூன்று நாட்களுக்குள் அவர் டிஸ்சார்ஜ் செய்யப்படலாம். மும்பை மட்டுமல்லாமல் ஒட்டுமொத்த இந்திய திரையுலகத்தையே இந்த சம்பவம் அதிர்ச்சி அடைய செய்துள்ளது.
