மகாராஷ்டிரா சட்டப்பேரவைத் தேர்தல்: மாலை 5 மணி வரை 58.22 சதவிகித வாக்குப்பதிவு!

மகாராஷ்டிரா சட்டப்பேரவைத் தேர்தலில் மாலை 5 மணி வரை 58.22 சதவிகித வாக்குகள் பதிவானதாக தேர்தல் ஆணையம் தெரிவித்துள்ளது.

மும்பை: மகாராஷ்டிரா சட்டப்பேரவைத் தேர்தலில் மாலை 5 மணி வரை 58.22 சதவிகித வாக்குகள் பதிவானதாக தேர்தல் ஆணையம் தெரிவித்துள்ளது.

மகாராஷ்டிரா மாநிலத்தின் 288 சட்டமன்ற தொகுதிகளை கொண்ட 15ஆவது சட்டப்பேரவைத் தேர்தல் வாக்கு பதிவு இன்று ஒரே கட்டமாக நடைபெற்றது. மொத்தம் 4,136 வேட்பாளர்கள் களத்தில் உள்ளனர். இதில் 2,086 பேர் சுயேச்சை வேட்பாளர்கள் ஆவர். 9.7 கோடி வாக்காளர்கள் வாக்களிக்க தகுதி பெற்றுள்ளனர்.வாக்குப்பதிவுக்காக மகாராஷ்டிரா மாநிலம் முழுவதும் 1,00,186 வாக்குச் சாவடிகள் அமைக்கப்பட்டிருந்தன. காலை 7 மணிக்கு வாக்குப்பதிவு தொடங்கி மாலை 6 மணிக்கு முடிவடைகிறது. மாலை ஐந்து மணி நிலவரப்படி 288 தொகுதிகளிலும் சராசரியாக 58.22 சதவிகித வாக்குகள் பதிவானதாக தேர்தல் ஆணையம் தெரிவித்துள்ளது.

இத்தேர்தலில் பாஜக, சிவசேனா, அஜித் பவாரின் தேசியவாத காங்கிரஸ் அடங்கிய மகாயுதி கூட்டணி, காங்கிரஸ், உத்தவ் தாக்ரே தலைமையிலான சிவசேனா, சரத்பவார் தலைமையிலான தேசியவாத காங்கிரஸ் அடங்கிய மகா விகாஸ் அகாதி கூட்டணிகளுக்கிடையே நேரடி போட்டி நிலவுகிறது. பகுஜன் சமாஜ் கட்சி 237 வேட்பாளர்களையும், மஜ்லிஸ்-இ-இத்தேஹாத்-உல்-முஸ்லிமீன் (ஏஐஎம்ஐஎம்) கட்சி 17 வேட்பாளர்களையும் நிறுத்தி தனித்து போட்டியிடுகின்றன.

இதையும் படிங்க:குழந்தை, தாய் கடத்தல்: சினிமா பாணியில் சேசிங் செய்து பிடித்த காவல்துறை!

மாலை ஐந்து மணி வரை அதிகபட்சமாக கட்சிரோலி மாவட்டத்தில் 69.63 சதவிகித வாக்குகளும், சத்ரபதி சம்பாஜிநகர் மாவட்டத்தில் 60.83 சதவிகித வாக்குகளும் பதிவாகி இருந்தன. மகாராஷ்டிராவின் பிறபகுதிகளோடு ஒப்பிடும்போது நகர் பகுதியான தெற்கு மும்பையில் உள்ள தொகுதிகளில் வாக்காளர்கள் வாக்களிக்க ஆர்வம் காட்டவில்லை. தெற்கு மும்பையில் உள்ள கொலாபா சட்டப்பேரவைத் தொகுதியில் ஐந்து மணி வரை வெறும் 41.64 சதவிகித வாக்குகள் மட்டுமே பதிவாகி இருந்தது. மாலை ஐந்து மணி வரை மலபார் ஹில் சட்டப்பேரவைத் தொகுதியில் 50.8 சதவிகித வாக்குகளும், மும்பாதேவி தொகுதியில் 46.10 சதவிகித வாக்குகள் மட்டுமே பதிவாகி இருந்தது.

மாலை 6 மணிக்கு வாக்குப்பதிவு முடிவடைந்ததும் வாக்குப்பதிவு எந்திரங்கள் வாக்கு எண்ணிக்கை மையங்களுக்கு கொண்டு செல்லப்படுகின்றன. 288 தொகுதிகளிலும் பதிவான வாக்குகள் வரும் 23ஆம் தேதி எண்ணப்பட்டு அன்றே முடிவுகள் அறிவிக்கப்பட உள்ளன.

ஈடிவி பாரத் வாட்ஸ்ஆப் சேனலில் இணையஇங்கே கிளிக் செய்யவும்