ਅੱਜ ਮਨਾਇਆ ਜਾ ਰਿਹਾ ਹੈ ਵਿਸ਼ਵ ਨਾਰੀਅਲ ਦਿਵਸ, ਜਾਣੋ ਕਿਵੇਂ ਹੋਈ ਸੀ ਇਸ ਦਿਨ ਦੀ ਸ਼ੁਰੂਆਤ - World Coconut Day 2024

World Coconut Day 2024: ਨਾਰੀਅਲ ਦੇ ਲਾਭ ਹੀ ਨਹੀਂ ਸਗੋਂ ਇਸਦੇ ਮਹੱਤਵ ਨੂੰ ਸਮਝਾਉਣ ਲਈ ਹਰ ਸਾਲ ਵਿਸ਼ਵ ਨਾਰੀਅਲ ਦਿਵਸ ਮਨਾਇਆ ਜਾਂਦਾ ਹੈ। ਨਾਰੀਅਲ ਦਾ ਇਸਤੇਮਾਲ ਖਾਣ-ਪੀਣ ਤੋਂ ਲੈ ਕੇ ਸਜਾਵਟ ਤੱਕ ਹਰ ਚੀਜ਼ 'ਚ ਕੀਤਾ ਜਾਂਦਾ ਹੈ।

ਹੈਦਰਾਬਾਦ:ਹਰ ਸਾਲ 2 ਸਤੰਬਰ ਨੂੰ ਪੂਰੀ ਦੁਨੀਆ 'ਚ ਵਿਸ਼ਵ ਨਾਰੀਅਲ ਦਿਵਸ ਮਨਾਇਆ ਜਾਂਦਾ ਹੈ। ਨਾਰੀਅਲ ਦਾ ਇਸਤੇਮਾਲ ਖਾਣ-ਪੀਣ ਅਤੇ ਸਜਾਵਟ ਲਈ ਕੀਤਾ ਜਾਂਦਾ ਹੈ। ਭਾਰਤੀ ਅਤੇ ਵਿਦੇਸ਼ੀ ਪਕਵਾਨਾਂ 'ਚ ਵੀ ਨਾਰੀਅਲ ਦਾ ਇਸਤੇਮਾਲ ਹੁੰਦਾ ਹੈ। ਨਾਰੀਅਲ ਉਤਪਾਦਕ ਦੇਸ਼ ਹਰ ਸਾਲ 2 ਸਤੰਬਰ ਨੂੰ ਵਿਸ਼ਵ ਨਾਰੀਅਲ ਦਿਵਸ ਮਨਾਉਂਦੇ ਹਨ, ਜਿਸ ਦਿਨ ਅੰਤਰਰਾਸ਼ਟਰੀ ਨਾਰੀਅਲ ਕਮਿਊਨਿਟੀ (ਆਈਸੀਸੀ) ਦੀ ਸਥਾਪਨਾ ਕੀਤੀ ਗਈ ਸੀ। ਇਹ ਦਿਨ ਨਾਰੀਅਲ ਦੇ ਸਿਹਤ ਲਾਭ ਹੀ ਨਹੀਂ ਸਗੋ ਇਸਦੇ ਮਹੱਤਵ ਨੂੰ ਸਮਝਾਉਣ ਲਈ ਵੀ ਮਨਾਇਆ ਜਾਂਦਾ ਹੈ।

ਵਿਸ਼ਵ ਨਾਰੀਅਲ ਦਿਵਸ ਦਾ ਉਦੇਸ਼: ਵਿਸ਼ਵ ਨਾਰੀਅਲ ਦਿਵਸ ਮਨਾਉਣ ਦਾ ਉਦੇਸ਼ ਨਾਰੀਅਲ ਪ੍ਰਤੀ ਜਾਗਰੂਕਤਾ ਵਧਾਉਣਾ ਅਤੇ ਇਸ ਫਸਲ ਵੱਲ ਧਿਆਨ ਕੇਂਦਰਿਤ ਕਰਨਾ ਹੈ। ਸਾਲਾਂ ਤੋਂ ਇਸ ਦਿਨ ਨੂੰ ਨਾਰੀਅਲ ਦੇ ਲਾਭਾਂ ਅਤੇ ਇਸਤੇਮਾਲ ਨੂੰ ਵਧਾਉਣ ਲਈ ਮਨਾਇਆ ਜਾ ਰਿਹਾ ਹੈ।

ਵਿਸ਼ਵ ਨਾਰੀਅਲ ਦਿਵਸ ਦਾ ਇਤਿਹਾਸ: ਵਿਸ਼ਵ ਨਾਰੀਅਲ ਦਿਵਸ ਪਹਿਲੀ ਵਾਰ ਸਾਲ 2009 'ਚ ਮਨਾਇਆ ਗਿਆ ਸੀ। ਇਸ ਦਿਨ ਨੂੰ ਏਸ਼ੀਅਨ ਅਤੇ ਪੈਸੀਫਿਕ ਨਾਰੀਅਲ ਭਾਈਚਾਰਿਆਂ ਵੱਲੋਂ ਬੜੇ ਉਤਸ਼ਾਹ ਨਾਲ ਮਨਾਇਆ ਜਾਂਦਾ ਹੈ। ਇਸ ਨੂੰ ਮਨਾਉਣ ਦਾ ਮੁੱਖ ਉਦੇਸ਼ ਦੁਨੀਆ ਭਰ ਦੇ ਲੋਕਾਂ ਨੂੰ ਨਾਰੀਅਲ ਦੀ ਖੇਤੀ ਬਾਰੇ ਜਾਗਰੂਕ ਕਰਨਾ ਹੈ। ਇਸ ਨਾਲ ਨਾਰੀਅਲ ਉਦਯੋਗ ਨੂੰ ਉਤਸ਼ਾਹਿਤ ਕੀਤਾ ਜਾ ਸਕਦਾ ਹੈ। ਤੁਹਾਨੂੰ ਦੱਸ ਦੇਈਏ ਕਿ ਇਸ ਸਮੇਂ 18 ਦੇਸ਼ਾਂ ਦੇ ਮੈਂਬਰ ਅੰਤਰ-ਸਰਕਾਰੀ ਸੰਗਠਨ ਵਜੋਂ ਕੰਮ ਕਰ ਰਹੇ ਹਨ, ਜਿਸ ਵਿੱਚ ਭਾਰਤ ਵੀ ਸ਼ਾਮਲ ਹੈ। ਏਸ਼ੀਆ ਪੈਸੀਫਿਕ ਵਿੱਚ ਨਾਰੀਅਲ ਭਾਈਚਾਰੇ ਦਾ ਮੁੱਖ ਦਫ਼ਤਰ ਜਕਾਰਤਾ ਇੰਡੋਨੇਸ਼ੀਆ ਵਿੱਚ ਹੈ। ਇੰਡੋਨੇਸ਼ੀਆ ਦੁਨੀਆ ਵਿੱਚ ਨਾਰੀਅਲ ਦਾ ਸਭ ਤੋਂ ਵੱਡਾ ਉਤਪਾਦਕ ਹੈ।