ਗਾਇਕ ਰਵਿੰਦਰ ਗਰੇਵਾਲ ਨੇ ਦੋਗਾਣਾ ਗੀਤ ਦੀ ਝਲਕ ਕੀਤੀ ਰਿਵੀਲ, ਜਾਣੋ ਕਿਸ ਦਿਨ ਹੋਵੇਗਾ ਰਿਲੀਜ਼

ਪੰਜਾਬ ਦੇ ਮਸ਼ਹੁਰ ਗਾਇਕ ਰਵਿੰਦਰ ਗਰੇਵਾਲ ਨੇ ਆਪਣੇ ਨਵੇਂ ਗੀਤ ਦਾ ਐਲਾਨ ਕੀਤਾ ਹੈ, ਜਿਸ ਦੀ ਪਹਿਲੀ ਝਲਕ ਸਾਹਮਣੇ ਆ ਗਈ ਹੈ।

ਚੰਡੀਗੜ੍ਹ:ਪੰਜਾਬੀ ਗਾਇਕੀ ਦੇ ਖੇਤਰ ਵਿੱਚ ਇੱਕ ਵਾਰ ਮੁੜ ਅਪਣੀ ਸਰਦਾਰੀ ਕਾਇਮ ਕਰਦੇ ਜਾ ਰਹੇ ਗਾਇਕ ਰਵਿੰਦਰ ਗਰੇਵਾਲ ਦਾ ਨਵਾਂ ਗੀਤ ਜਲਦ ਹੀ ਰਿਲੀਜ਼ ਹੋਣਾ ਜਾ ਰਿਹਾ ਹੈ। ਜਿਸਦਾ ਪੋਸਟਰ ਉਨ੍ਹਾਂ ਨੇ ਆਪਣੇ ਸੋਸ਼ਲ ਮੀਡੀਆ ਅਕਾਊਂਟ 'ਤੇ ਸਾਂਝਾ ਕੀਤਾ ਹੈ। ਉਨ੍ਹਾਂ ਦਾ ਨਵਾਂ ਗਾਣਾ 'ਜੁੱਤੀ' ਜਲਦ ਹੀ ਵੱਖ-ਵੱਖ ਸੰਗੀਤਕ ਪਲੇਟਫ਼ਾਰਮਾਂ 'ਤੇ ਆਪਣੀ ਹਾਜ਼ਰੀ ਦਰਜ ਕਰਵਾਏਗਾ।

ਗਾਇਕ ਰਵਿੰਦਰ ਗਰੇਵਾਲ (Etv Bharat)

ਜੈਸਮੀਨ ਅਖ਼ਤਰ ਨਾਲ ਦੋਗਾਣਾ ਗੀਤ

ਜ਼ਿਕਰਰਯੋਗ ਹੈ ਕਿ ਹਾਲ ਹੀ ਵਿੱਚ ਰਵਿੰਦਰ ਗਰੇਵਾਲ ਦੀ ਧੀ ਦਾ ਵਿਆਹ ਸੰਪਨ ਹੋਇਆ ਸੀ ਅਤੇ ਹੁਣ ਉਹ ਪਰਵਾਰਿਕ ਰੁਝੇਵਿਆਂ ਤੋਂ ਸੂਰਖਰੂ ਹੋ ਕੇ ਗਾਇਕੀ ਪਿੜ੍ਹ 'ਚ ਮੁੜ ਕਾਫ਼ੀ ਸਰਗਰਮ ਨਜ਼ਰ ਆ ਰਹੇ ਹਨ। ਰਵਿੰਦਰ ਗਰੇਵਾਲ ਸਟੇਜ਼ ਅਤੇ ਐਲਬਮ ਗਾਇਕੀ ਵਿੱਚ ਮੁੜ ਧਮਾਲਾਂ ਪਾ ਰਹੇ ਹਨ। ਹੁਣ ਉਨ੍ਹਾਂ ਦਾ ਨਵਾਂ ਗੀਤ 'ਜੁੱਤੀ' ਵੀ ਇਸ ਤਰ੍ਹਾਂ ਹੀ ਧਮਾਲ ਪਾਉਣ ਨੂੰ ਤਿਆਰ-ਬਰ-ਤਿਆਰ ਹੈ। ਇਸ ਦੋਗਾਣਾ ਗੀਤ 'ਜੁੱਤੀ' ਵਿੱਚ ਉਨ੍ਹਾਂ ਦੀ ਸਹਿ ਗਾਇਕਾ ਜੈਸਮੀਨ ਅਖ਼ਤਰ ਹੋਵੇਗੀ। ਇਹ ਗੀਤ ਜਲਦ ਹੀ ਵੱਖ-ਵੱਖ ਸੰਗੀਤਕ ਪਲੇਟਫ਼ਾਰਮ ਦਾ ਸ਼ਿੰਗਾਰ ਬਣਨ ਜਾ ਰਿਹਾ ਹੈ। 'ਟੇਡੀ ਪੱਗ' ਰਿਕਾਰਡਸ ਵੱਲੋਂ ਪੇਸ਼ ਕੀਤਾ ਜਾ ਰਿਹਾ ਹੈ।

ਪੰਜਾਬੀਅਤ ਵੰਨਗੀਆਂ ਦੀ ਤਰਜ਼ਮਾਨੀ ਕਰਦੇ ਅਤੇ ਮੱਠੀ ਤਕਰਾਰ ਭਰੇ ਦੇਸੀ ਰੰਗਾਂ ਅਧੀਨ ਬੁਣੇ ਗਏ ਇਸ ਖੂਬਸੂਰਤ ਦੋਗਾਣਾ ਗੀਤ ਦੇ ਬੋਲ ਰੂਬੀ ਚੱਠੇ ਨੇ ਲਿਖੇ ਹਨ, ਜਿੰਨ੍ਹਾਂ ਦੀ ਇਸ ਤੋਂ ਪਹਿਲਾਂ ਵੀ ਇਸ ਬਾਕਮਾਲ ਗਾਇਕ ਨਾਲ ਸੰਗੀਤਕ ਸੁਮੇਲਤਾ ਕਮਾਲ ਦਾ ਅਸਰ ਵਿਖਾਉਣ ਵਿੱਚ ਕਾਮਯਾਬ ਰਹੀ ਹੈ। ਸੰਗੀਤਕ ਗਲਿਆਰਿਆਂ ਵਿੱਚ ਤਰੋ ਤਾਜ਼ਗੀ ਭਰੀ ਇੱਕ ਵੱਖਰੀ ਲੈਅ-ਬੱਧਤਾ ਦਾ ਪ੍ਰਗਟਾਵਾ ਕਰਵਾਉਂਦੇ ਉਕਤ ਗਾਣੇ ਦਾ ਮਿਊਜ਼ਿਕ ਵੀਡੀਓ ਵੀ ਬੇਹੱਦ ਸ਼ਾਨਦਾਰ ਬਣਾਇਆ ਗਿਆ ਹੈ। ਜਿਸ ਦੀ ਨਿਰਦੇਸ਼ਨਾ ਸਮਨ ਦੁਆਰਾ ਕੀਤੀ ਗਈ ਹੈ, ਜਿੰਨਾਂ ਵੱਲੋ ਬੇਹਤਰੀਣ ਰੂਪ ਵਿੱਚ ਸਿਰਜੇ ਗਏ ਇਸ ਸੰਗੀਤਕ ਵੀਡੀਓ ਨੂੰ ਚਾਰ ਚੰਨ ਲਾਉਣ ਵਿੱਚ ਚਰਚਿਤ ਮਾਡਲ ਸਮਰਿਧੀ ਪੁਰੀ ਵੱਲੋਂ ਵੀ ਅਹਿਮ ਭੁੂਮਿਕਾ ਨਿਭਾਈ ਗਈ ਹੈ। ਇਸ ਗੀਤ ਦੀ ਪ੍ਰਮੋਸ਼ਨ ਕਰ ਰਹੇ ਗਾਇਕ ਨੇ ਕਿਹਾ ਕਿ ਲੋਕਾਂ ਨੂੰ ਇਹ ਗੀਤ ਬਹੁਤ ਪਸੰਦ ਆਵੇਗਾ।