ਕਰਨਾਟਕ: ਨਾਬਾਲਿਗ ਪੁੱਤ ਨੂੰ ਮੋਟਰਸਾਈਕਲ ਦੇਣਾ ਮਾਂ ਨੂੰ ਪਿਆ ਮਹਿੰਗਾ, ਅਦਾਲਤ ਨੇ ਲਗਾਇਆ 30 ਹਜ਼ਾਰ ਦਾ ਜੁਰਮਾਨਾ

ਕਰਨਾਟਕ ਦੀ ਸ਼ਿਵਮੋਗਾ ਅਦਾਲਤ ਨੇ ਬਿਨਾਂ ਡਰਾਈਵਿੰਗ ਲਾਇਸੈਂਸ ਦੇ ਨਾਬਾਲਗ ਪੁੱਤਰ ਨੂੰ ਦੋ ਪਹੀਆ ਵਾਹਨ ਦੇਣ ਵਾਲੀ ਮਾਂ ਨੂੰ 30 ਹਜ਼ਾਰ ਰੁਪਏ ਦਾ ਜੁਰਮਾਨਾ ਲਗਾਇਆ ਹੈ। ਪੁਲਿਸ ਨੇ ਇਸ ਸਬੰਧ ਵਿੱਚ ਨਾਬਾਲਗ ਦੀ ਮਾਂ ਖ਼ਿਲਾਫ਼ ਕੇਸ ਦਰਜ ਕਰ ਲਿਆ ਸੀ।

ਕਰਨਾਟਕ/ਸ਼ਿਵਮੋਗਾ:ਕਰਨਾਟਕ ਦੀ ਸ਼ਿਵਮੋਗਾ ਅਦਾਲਤ ਨੇ ਉਸ ਮਾਂ 'ਤੇ 30,000 ਰੁਪਏ ਦਾ ਜੁਰਮਾਨਾ ਲਗਾਇਆ ਹੈ, ਜਿਸ ਨੇ ਆਪਣੇ 17 ਸਾਲ ਦੇ ਨਾਬਾਲਗ ਬੇਟੇ ਨੂੰ ਬਿਨਾਂ ਡਰਾਈਵਿੰਗ ਲਾਇਸੈਂਸ ਦੇ ਦੋ ਪਹੀਆ ਵਾਹਨ ਦਿੱਤਾ ਸੀ। ਦੱਸਿਆ ਜਾਂਦਾ ਹੈ ਕਿ ਸ਼ਿਵਮੋਗਾ ਈਸਟ ਟ੍ਰੈਫਿਕ ਥਾਣੇ ਅਧੀਨ ਪੈਂਦੇ ਐਸਪੀਐਮ ਰੋਡ ਨੇੜੇ ਵਾਹਨਾਂ ਦੀ ਚੈਕਿੰਗ ਦੌਰਾਨ ਟਰੈਫਿਕ ਪੁਲਿਸ ਨੇ ਇੱਕ ਲੜਕੇ ਨੂੰ ਰੋਕਿਆ। ਇਸ ਦੌਰਾਨ ਪਤਾ ਲੱਗਾ ਕਿ ਉਹ ਨਾਬਾਲਗ ਸੀ ਅਤੇ ਬਾਈਕ 'ਤੇ ਜੋ ਬੈਠੀ ਹੈ, ਉਹ ਉਸ ਦੀ ਮਾਂ ਸੀ। ਇਸ ਤਰ੍ਹਾਂ ਪੂਰਬੀ ਟਰੈਫਿਕ ਪੁਲਿਸ ਨੇ ਵਾਹਨ ਮਾਲਕ ਮਾਂ ਖ਼ਿਲਾਫ਼ ਟਰੈਫਿਕ ਨਿਯਮਾਂ ਦੀ ਉਲੰਘਣਾ ਕਰਨ ਅਤੇ ਨਾਬਾਲਗ ਲੜਕੇ ਨੂੰ ਵਾਹਨ ਚਲਾਉਣ ਦੀ ਇਜਾਜ਼ਤ ਦੇਣ ਦੇ ਦੋਸ਼ ਹੇਠ ਕੇਸ ਦਰਜ ਕੀਤਾ।

ਬਾਅਦ ਵਿਚ ਪੁਲਿਸ ਨੇ ਅਦਾਲਤ ਵਿਚ ਦੋਸ਼ ਪੱਤਰ ਪੇਸ਼ ਕੀਤਾ। ਇਸ 'ਤੇ ਸ਼ਿਵਮੋਗਾ ਦੀ ਥਰਡ ਏਸੀਜੇ ਅਤੇ ਜੇਐਮਐਫਸੀ ਕੋਰਟ ਨੇ ਬਾਈਕ ਮਾਲਕ 'ਤੇ 30 ਹਜ਼ਾਰ ਰੁਪਏ ਦਾ ਜੁਰਮਾਨਾ ਲਗਾਉਣ ਦਾ ਹੁਕਮ ਦਿੱਤਾ। ਤੁਹਾਨੂੰ ਦੱਸ ਦਈਏ ਕਿ ਬੈਂਗਲੁਰੂ ਵਿੱਚ ਵੀ ਬਿਨਾਂ ਡਰਾਈਵਿੰਗ ਲਾਇਸੈਂਸ ਅਤੇ 18 ਸਾਲ ਤੋਂ ਘੱਟ ਉਮਰ ਦੇ ਵਿਦਿਆਰਥੀਆਂ ਦੀ ਬਾਈਕ ਚਲਾਉਣ ਦੀ ਗਿਣਤੀ ਵਿੱਚ ਵਾਧਾ ਹੋਇਆ ਹੈ। ਇਸ 'ਤੇ ਕਾਬੂ ਪਾਉਣ ਲਈ ਟ੍ਰੈਫਿਕ ਪੁਲਿਸ ਨੇ ਹਾਲ ਹੀ 'ਚ ਇਕ ਵਿਸ਼ੇਸ਼ ਮੁਹਿੰਮ ਚਲਾਈ ਸੀ, ਜਿਸ 'ਚ ਵਿਦਿਆਰਥੀਆਂ ਦੇ ਮਾਪਿਆਂ ਤੋਂ ਜੁਰਮਾਨਾ ਵਸੂਲਿਆ ਗਿਆ ਸੀ ਅਤੇ ਉਨ੍ਹਾਂ ਨੂੰ ਮੋਟਰਸਾਈਕਲ ਨਾ ਦੇਣ ਦੀ ਚਿਤਾਵਨੀ ਦਿੱਤੀ ਗਈ ਸੀ।

ਇਸ ਸਿਲਸਿਲੇ ਵਿੱਚ ਟ੍ਰੈਫਿਕ ਪੁਲਿਸ ਨੇ ਹਾਲ ਹੀ ਵਿੱਚ ਬੈਂਗਲੁਰੂ ਵਿੱਚ ਸਕੂਲ ਅਤੇ ਕਾਲਜ ਦੇ ਵਿਦਿਆਰਥੀਆਂ ਦੇ 1,500 ਤੋਂ ਵੱਧ ਮਾਪਿਆਂ ਨੂੰ ਜੁਰਮਾਨਾ ਕੀਤਾ ਹੈ। ਅੱਜ ਕੱਲ੍ਹ ਜ਼ਿਆਦਾਤਰ ਬੱਚੇ ਦੋ ਪਹੀਆ ਵਾਹਨ ਲੈ ਕੇ ਸਕੂਲਾਂ-ਕਾਲਜਾਂ ਨੂੰ ਜਾਂਦੇ ਹਨ। ਇਸ ਦੇ ਮੱਦੇਨਜ਼ਰ ਟਰੈਫਿਕ ਪੁਲਿਸ ਸ਼ਹਿਰ ਦੇ 150 ਤੋਂ ਵੱਧ ਕਾਲਜਾਂ ਵਿੱਚ ਜਾਂਚ ਲਈ ਪਹੁੰਚੀ ਸੀ। ਪੁਲਿਸ ਨੇ ਮਾਪਿਆਂ ਨੂੰ ਚਿਤਾਵਨੀ ਵੀ ਦਿੱਤੀ ਹੈ ਕਿ ਜੇਕਰ ਇਸ ਘਟਨਾ ਨੂੰ ਦੁਹਰਾਇਆ ਗਿਆ ਤਾਂ ਉਹ ਮਾਮਲਾ ਦਰਜ ਕਰਨਗੇ। ਇਸ ਸਬੰਧੀ ਬੈਂਗਲੁਰੂ ਸਾਊਥ ਡਿਵੀਜ਼ਨ ਦੇ ਟ੍ਰੈਫਿਕ ਡੀਸੀਪੀ ਸ਼ਿਵਪ੍ਰਕਾਸ਼ ਦੇਵਰਾਜ ਨੇ ਕਿਹਾ ਕਿ ਸਕੂਲਾਂ ਨੂੰ ਸਰਕੂਲਰ ਜਾਰੀ ਕਰਨ ਦੇ ਨਿਰਦੇਸ਼ ਦਿੱਤੇ ਗਏ ਹਨ।