ଖୁବଶୀଘ୍ର ଆସିବ ୱେଡିଂ ଓଡ଼ିଶା ପଲିସି, ଫେବୃଆରୀ ୨୪ ଓଡ଼ିଶା ଟ୍ରାଭେଲ ବଜାର

ଆସନ୍ତା ଫେବୃଆରୀ ୨୪ ରୁ ୨୭ ତାରିଖ ପର୍ଯ୍ୟନ୍ତ ଭୁବନେଶ୍ୱରରେ ଆୟୋଜିତ ହେବ ଷଷ୍ଠ 'ଓଡ଼ିଶା ଟ୍ରାଭେଲ ବଜାର- ୨୦୨୫' ।

ଭୁବନେଶ୍ବର:ରାଜ୍ୟରେ ଖୁବଶୀଘ୍ର ଆସିବ ସ୍ଵତନ୍ତ୍ର ୱେଡିଂ ଓଡ଼ିଶା ପଲିସି । ଏଥିରେ ରାଜ୍ୟରେ ଟେମ୍ପୁଲ ୱେଡ଼ିଂ, ଡେଷ୍ଟିନେସନ୍ ୱେଡ଼ିଂ ଆଦିକୁ ପ୍ରୋତ୍ସାହିତ କରିବା ଲାଗି ବହୁ ବ୍ୟବସ୍ଥା ରହିବ । ଭିତ୍ତିଭୂମି ବିକାଶ ହେବ । ଆଜି ଷଷ୍ଠ ଓଡ଼ିଶା ଟ୍ରାଭେଲ ବଜାର ସାମ୍ବାଦିକ ସମ୍ମିଳନୀରେ ଏହି ସୂଚନା ଦେଇଛନ୍ତି ପର୍ଯ୍ୟଟନ ସଚିବ ବଲୱନ୍ତ ସିଂହ ଓ ପର୍ଯ୍ୟଟନ ମନ୍ତ୍ରୀ ପ୍ରଭାତୀ ପରିଡ଼ା।

ଆସନ୍ତା ୨୪ ରୁ 'ଓଡ଼ିଶା ଟ୍ରାଭେଲ ବଜାର ୨୦୨୫' :

ଆସନ୍ତା ଫେବୃଆରୀ ୨୪ ରୁ ୨୭ ତାରିଖ ପର୍ଯ୍ୟନ୍ତ ଭୁବନେଶ୍ୱରରେ ଆୟୋଜିତ ହେବ ଷଷ୍ଠ 'ଓଡ଼ିଶା ଟ୍ରାଭେଲ ବଜାର- ୨୦୨୫' । ଶିଳ୍ପ ସଂଘ ଫିକି ସହଭାଗିତାରେ ରାଜ୍ୟ ପର୍ଯ୍ୟଟନ ବିଭାଗ ପକ୍ଷରୁ 2ଟି ଘରୋଇ ହୋଟେଲରେ ଅନୁଷ୍ଠିତ ହେବ ଏହି ଟ୍ରାଭେଲ ବଜାର । ସମ୍ମିଳନୀରେ ଅଂଶଗ୍ରହଣ ଦେଶ ତଥା ବିଦେଶର ବହୁ ଟ୍ରାଭେଲ ଓ ଟୁର ଅପରେଟର, ଇଭେଣ୍ଟ ମ୍ୟାନେଜମେଣ୍ଟ କମ୍ପାନୀ ସାମିଲ ହେବେ । ଆଜି ଭୁବନେଶ୍ଵରରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ଏହି ସୂଚନା ଦେଇଛନ୍ତି ପର୍ଯ୍ୟଟନ ମନ୍ତ୍ରୀ ତଥା ଉପ ମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ।

ଓଡ଼ିଶା ଟ୍ରାଭେଲ ବଜାର (ETV BHARAT ODISHA)

ଭାଗ ନେବେ ୧୭ଟି ରାଷ୍ଟ୍ରରୁ ୩୦ରୁ ଅଧିକ ବିଦେଶୀ ଟୁର୍ ଅପରେଟର:

ଉପମୁଖ୍ୟମନ୍ତ୍ରୀ କହିଛନ୍ତି, '' ଓଡ଼ିଶା ଟ୍ରାଭେଲ ବଜାର ୨୦୨୫' ରେ ଅଷ୍ଟ୍ରେଲିଆ, ବ୍ରିଟେନ, ଜର୍ମାନୀ, ବେଲଜିୟମ, ଦକ୍ଷିଣ ଆଫ୍ରିକା, ସ୍ପେନ, ସିଙ୍ଗାପୁର ଭଳି ୧୭ଟି ରାଷ୍ଟ୍ରରୁ ୩୦ରୁ ଅଧିକ ବିଦେଶୀ ଟୁର୍ ଅପରେଟର ଓ ଭାରତର ୩୦ ସହରର ଶହେରୁ ଅଧିକ ଘରୋଇ ଟୁର ଅପରେଟର ଏଥିରେ ଭାଗ ନେବେ । ଓଡ଼ିଶାକୁ ଦେଶର ଏକ ସର୍ବଶ୍ରେଷ୍ଠ ଗନ୍ତବ୍ୟସ୍ଥଳି ଭାବେ ଉପସ୍ଥାପିତ କରିବା ଉଦ୍ଦେଶ୍ୟରେ ଏଥିରେ ରାଜ୍ୟରେ ଥିବା ପର୍ଯ୍ୟଟନ ସୁବିଧା ସୁଯୋଗ ଉପରେ ବିସ୍ତୃତ ଭାବେ ଆଲୋଚନା ହେବ । ଏହାସହ ବିଭିନ୍ନ ଅଂଶୀଦାରଙ୍କ ମଧ୍ୟରେ ବି ଟୁ ବି ଓ ବି ଟୁ ଜି ଆଲୋଚନା ମଧ୍ଯ ହେବ । ଟ୍ରାଭେଲ୍ ବଜାର ସମୟରେ ବିଭାଗ ହୋମ ଷ୍ଟେ ପଲିସି, ଆଡଭେଞ୍ଚର୍ ସ୍ପୋର୍ଟ ପଲିସି ଆଣିବ । ଏହାଦ୍ବାରା ରାଜ୍ୟରେ ବହୁ ଉଦ୍ୟୋଗୀ ସୃଷ୍ଟି ହେବା ସହ ଏହି କାର୍ଯ୍ୟକ୍ରମ ଏକ ଅଗ୍ରଣୀ ଆନ୍ତର୍ଜାତୀୟ ଭ୍ରମଣ ଗନ୍ତବ୍ୟସ୍ଥଳୀ ଭାବେ ଓଡିଶାର ସ୍ଥିତିକୁ ସୁଦୃଢ କରିବାକୁ ଲକ୍ଷ୍ୟ ରଖିଛି । ''

ଅଂଶଗ୍ରହଣକାରୀ ମାନେ ଓଡ଼ିଶାର ପର୍ଯ୍ୟଟନୀ ସ୍ଥଳୀ ଭ୍ରମଣ କରିବେ:

ଏହି କାର୍ଯ୍ୟକ୍ରମ ଓଡିଶାର ପର୍ଯ୍ୟଟନ କ୍ଷେତ୍ରର ୭୦ ଜଣ ସେଲର, ଘରୋଇ ଟୁର ଅପରେଟର (ଡିଟିଓ) ଓ ବିଦେଶୀ ଟୁର ଅପରେଟର (ଏଫ୍‌ଟିଓ)ଙ୍କ ମଧ୍ୟରେ B2B ବୈଠକଗୁଡିକ ଉପରେ ଗୁରୁତ୍ୱ ଦେବ । ଏଥିସହିତ ଅଂଶଗ୍ରହଣକାରୀ ମାନେ ଭିତରକନିକା, ରଘୁରାଜପୁର, ପୁରୀ-କୋଣାର୍କ, ଡାଇମଣ୍ଡ ଟ୍ରାଏଙ୍ଗେଲ ଭଳି ଓଡିଶାର ବିଭିନ୍ନ ପର୍ଯ୍ୟଟନ ଗନ୍ତବ୍ୟସ୍ଥଳୀ ଗୁଡିକୁ ଯାତ୍ରା କରିବେ । ସେଲରମାନଙ୍କ ସହ ୩୦୦୦ ପୂର୍ବ ନିର୍ଦ୍ଧାରିତ ବୈଠକ ଧାର୍ଯ୍ୟ କରାଯାଇଛି । ଏହାବ୍ୟତୀତ B2G ବୈଠକ ଓ ଆଡ୍‌ଭେଞ୍ଚର ୱାର୍କସପ ଏହି କାର୍ଯ୍ୟକ୍ରମର ପ୍ରମୁଖ ଅଂଶ ହେବାକୁ ଯାଉଛି ।

ଇଟିଭି ଭାରତ, ଭୁବନେଶ୍ବର