ବଢିବ ପିଏମ୍ ଆବାସ ଟଙ୍କା; ମିଳୁଥିବା ସହାୟତା ରାଶିର ପରିମାଣ ବୃଦ୍ଧି, ଶୌଚାଳୟ ପାଇଁ 20ହଜାର ଟଙ୍କା - PM Awas Yojana in Odisha

PM Awas Yojana assistance to be enhanced: ଓଡ଼ିଶାରେ ବଢିବ ପ୍ରଧାନମନ୍ତ୍ରୀ ଆବାସ ଯୋଜନା ଟଙ୍କା । ମିଳୁଥିବା ସହାୟତା ରାଶିର ପରିମାଣ ମଧ୍ୟ ବୃଦ୍ଧି ପାଇବ । ଜାଣନ୍ତୁ କେତେ ପାଇବେ ହିତାଧିକାରୀ

ଭୁବନେଶ୍ବର:ବଢିବ ପିଏମ୍ ଆବାସ ଟଙ୍କା । ପିଏମ୍ ଆବାସ ଯୋଜନାରେ ହିତାଧିକାରୀଙ୍କୁ ମିଳୁଥିବା ସହାୟତା ରାଶିର ପରିମାଣ ବୃଦ୍ଧି ପାଇବ । ଖୁବଶୀଘ୍ର ପ୍ରଧାନମନ୍ତ୍ରୀ ଆବାସ ଯୋଜନାରେ ହିତାଧିକାରୀଙ୍କୁ ୧ ଲକ୍ଷ ୨୦ ହଜାର ବଦଳରେ ୧ ଲକ୍ଷ ୮୦ ହଜାର ଟଙ୍କା ମିଳିବ । ଏନେଇ ଖୁବଶୀଘ୍ର ସମ୍ପୂର୍ଣ୍ଣ ଗାଇଡଲାଇନ ଆସିବ । ଏନେଇ ସୂଚନା ଦେଇଛନ୍ତି ପଞ୍ଚାୟତିରାଜ ମନ୍ତ୍ରୀ ରବି ନାୟକ ।

ଆସିବ ନୂଆ ଗାଇଡଲାଇନ:-

ଏନେଇ ପଞ୍ଚାୟତିରାଜ ମନ୍ତ୍ରୀ ରବି ନାୟକ କହିଛନ୍ତି, "ପ୍ରଧାନମନ୍ତ୍ରୀ ଆବାସ ଯୋଜନାରେ ବିଜେପି ତାର ନିର୍ବାଚନୀ ଇସ୍ତାହାରରେ 15 ଲକ୍ଷ ଘର ଦେବାକୁ ଲକ୍ଷ୍ୟ ରଖିଛି । ଏହାରି ଭିତରେ ନୂଆ ଗାଇଡଲାଇନ ଆସିବ ତା' ଉପରେ ଆମେ କାମ କରିବୁ । ବିଗତ ଦିନରେ ଯେଉଁମାନେ ଏହି ଯୋଜନାରୁ ବଞ୍ଚିତ ଅଛନ୍ତି ଏବଂ ଯୋଗ୍ୟ ହିତାଧିକାରୀ ଯେଉଁମାନେ ଅଛନ୍ତି ସେମାନେ କେମିତି ଘର ପାଇପାରିବେ ସେଥିପାଇଁ ପ୍ରତ୍ୟେକ ଡିପାର୍ଟମେଣ୍ଟର କର୍ମକର୍ତ୍ତାମାନଙ୍କୁ ଯେଉଁମାନେ ପଞ୍ଚାୟତ ଏବଂ ବ୍ଲକ ଲେବଲର କାମ କରୁଛନ୍ତି ସେମାନେ ତଦାରଖ କରିବେ । ଗାଇଡଲାଇନକୁ ଲୋକଲୋଚନକୁ ଆଣିବୁ ।"

ଏହା ସହିତ ଅନ୍ତୋଦୟ ଗୃହ ଯୋଜନା ନେଇ ସେ ଆହୁରି ମଧ୍ୟ କହିଛନ୍ତି, "ବନ୍ୟା, ବାତ୍ୟା, ଘରପୋଡ଼ି ଭଳି ବିପର୍ଯ୍ୟୟରେ ଘର ଯୋଗାଇ ଦେବୁ । ଆଗାମୀ ଦିନରେ ଯୋଗ୍ୟ ହିତାଧିକାରୀଙ୍କୁ ଘର ଦିଆଯିବ । ମନରେଗାକୁ ମିଶାଇଲେ ପ୍ରଧାନମନ୍ତ୍ରୀ ଆବାସ ଯୋଜନାରେ ହିତାଧିକାରୀ ପାଇବେ ୨ ଲକ୍ଷ ଟଙ୍କା ।"

ନିର୍ବାଚନ ପାଇଁ ‘ମୋ ଘର’ ଯୋଜନା ଲାଗୁ ହୋଇଥିଲା:-

ଗ୍ରାମ୍ୟ ଓ ପଞ୍ଚାୟତରାଜ ମନ୍ତ୍ରୀ ରବି ନାରାୟଣ ନାୟକ ଆହୁରି କହିଛନ୍ତି, "ପୂର୍ବ ସରକାର ମୋ ଘର ଯୋଜନା କେବଳ ନିର୍ବାଚନ ପାଇଁ ଲାଗୁ କରିଥିଲେ । ଏହି ଯୋଜନାରେ କୌଣସି ଲୋକ ଉପକୃତ ହୋଇ ନାହାନ୍ତି । ଯୋଜନାର କୌଣସି ନିର୍ଦ୍ଦିଷ୍ଟ ଗାଇଡଲାଇନ ନାହିଁ । ୩ ଲକ୍ଷ ଟଙ୍କାର ଋଣ କରିବା କଥା ଲୋକ ଶୁଣିବା ପରେ ଚାଲି ଯାଉଛନ୍ତି । ଆଗ୍ରହ ନାହିଁ ଲୋକଙ୍କର ଏହି ଯୋଜନାରେ ସାମିଲ ହେବା ପାଇଁ ।"

ଶୌଚାଳୟ ପାଇଁ 20ହଜାର ଟଙ୍କା:-

ସେହିପରି ସ୍ଵଚ୍ଛ ଭାରତ ମିସନରେ ଶୌଚାଳୟ ପାଇଁ ପୂର୍ବରୁ ୧୨ ହଜାର ଟଙ୍କା ଦିଆଯାଉଥିଲା ବର୍ତ୍ତମାନ ତାକୁ ଆଉ କିଛି ଅର୍ଥ ବଢାଇବା ପାଇଁ ବ୍ୟବସ୍ଥା କରାଯାଇଛି । ପାଖାପାଖି 20 ହଜାର ଟଙ୍କା ହେବ ।

ଇଟିଭି ଭାରତ, ଭୁବନେଶ୍ବର