କଟକ: ପୁରୁଷଙ୍କ ପୁରୁଷତ୍ବ ପରୀକ୍ଷା ନେଇ ଓଡ଼ିଶା ହାଇକୋର୍ଟଙ୍କ ରାୟ । ବୈବାହିକ ବିଚ୍ଛେଦ ମାମଲାରେ ରାୟ ଶୁଣାଇଛନ୍ତି ଉଚ୍ଚ ନ୍ୟାୟାଳୟ । ସ୍ବାମୀଙ୍କ ପୁରୁଷତ୍ବ ପରୀକ୍ଷା ପାଇଁ ଦାୟର ହୋଇଥିବା ଏକ ମାମଲା ସପକ୍ଷରେ ରାୟ ପ୍ରଦାନ କରିଛନ୍ତି ହାଇକୋର୍ଟ । ଆସନ୍ତୁ ଜାଣିବା ପୂରା ମାମଲା କଣ ? ଏବଂ ମାମଲାର ଶୁଣାଣି କରି କି ନିର୍ଦ୍ଦେଶ ଦେଇଛନ୍ତି ହାଇକୋର୍ଟ ?
ପୁରୁଷଙ୍କ ପୁରୁଷତ୍ବ ପରୀକ୍ଷା ସପକ୍ଷରେ ରାୟ:
ଏକ ବୈବାହିକ ବିବାଦ ସମ୍ପର୍କିତ ମାମଲାର ଶୁଣାଣି କରି ଗୁରୁତ୍ୱପୂର୍ଣ୍ଣ ରାୟ ପ୍ରଦାନ କରିଛନ୍ତି ଓଡି଼ଶା ହାଇକୋର୍ଟ । ସ୍ବାମୀଙ୍କ ପୁରୁଷତ୍ବ ପରୀକ୍ଷା କରାଯିବା ସପକ୍ଷରେ ରାୟ ପ୍ରଦାନ କରିଛନ୍ତି ହାଇକୋର୍ଟ । ପୁରୁଷତ୍ବ ପରୀକ୍ଷାର ସମ୍ମୁଖୀନ ହେବା ଲାଗି ମେଡିକାଲ ବୋର୍ଡ ନିକଟରେ ହାଜର ହେବା ପାଇଁ ପରିବାର ଅଦାଲତ ଦେଇଥିବା ନିର୍ଦ୍ଦେଶକୁ ଚାଲେଞ୍ଜ କରି ସ୍ବାମୀ ଦାୟର କରିଥିବା ଆବେଦନକୁ ହାଇକୋର୍ଟ ଖାରଜ କରି ଦେଇଛନ୍ତି । ହାଇକୋର୍ଟ ବିଚାରପତି ଜଷ୍ଟିସ ଗୌରୀଶଙ୍କର ଶତପଥୀଙ୍କୁ ନେଇ ଗଠିତ ଖଣ୍ଡପୀଠ ଏ ସଂପର୍କିତ ମାମଲାର ଶୁଣାଣି କରି ଏପରି ରାୟ ପ୍ରଦାନ କରିଛନ୍ତି ।
କଣ ରହିଛି ହାଇକୋର୍ଟଙ୍କ ରାୟ ?
କେବଳ ସ୍ବାମୀଙ୍କ ପୁରୁଷତ୍ବ ପରୀକ୍ଷା ପ୍ରସଙ୍ଗ ନେଇ ହାଇକୋର୍ଟରେ ଦାୟର କରାଯାଇଥିବା ମାମଲାର ବିବରଣୀରୁ ଜଣାପଡ଼ିଛି । ସ୍ବାମୀ ନିମ୍ନ ଅଦାଲତରେ ଦାଖଲ କରିଥିବା ଆପତ୍ତିରେ କୁହାଯାଇଥିଲା ଯେ, ଉଭୟ ପକ୍ଷ ସେମାନଙ୍କ ଅଭିଭାବକଙ୍କ ସହ ମେଡିକାଲ ଯାଇଥିଲେ । ସ୍ବାମୀଙ୍କ ପୁରୁଷତ୍ବ ପରୀକ୍ଷା ପାଇଁ ଭୁବନେଶ୍ବର ଏମ୍ସ(AIIMS) ଯାଇ ସେଠାରେ ଡାକ୍ତରଙ୍କୁ ମଧ୍ୟ ସାକ୍ଷାତ କରିଥିଲେ । ଡାକ୍ତରୀ ପରୀକ୍ଷା ପରେ ସ୍ବାମୀଙ୍କ ଅବସ୍ଥା ସ୍ବାଭାବିକ ବୋଲି କୁହାଯାଇଥିଲା । ଅନ୍ୟପକ୍ଷରେ ସ୍ବାମୀ ପୁରୁଷତ୍ବହୀନ ସଂକ୍ରାନ୍ତୀୟ ରୋଗରେ ପୀଡ଼ିତ ଥିଲେ ଓ ଏଥିପାଇଁ ଭୁବନେଶ୍ବରରେ ଚିକିତ୍ସିତ ହେଉଥିଲେ ବୋଲି ପରିବାର ଅଦାଲତରେ ଜେରା ବେଳେ ପତ୍ନୀ ପ୍ରକାଶ କରିଥିଲେ । ଏହା ସହ ଭୁବନେଶ୍ବର ଏମ୍ସରେ ସ୍ବାମୀ ସମସ୍ତ ପରୀକ୍ଷାର ସମ୍ମୁଖୀନ ହୋଇଥିଲେ ଓ ସେ ସ୍ବାଭାବିକ ଥିବା ନେଇ ଡାକ୍ତର ରିପୋର୍ଟ ଦେଇଥିବା ସଂକ୍ରାନ୍ତରେ ପତ୍ନୀ ଅବଗତ ଥିବା ନେଇ ମଧ୍ୟ ସାକ୍ଷ୍ୟ ଗ୍ରହଣ ସମୟରେ ପ୍ରକାଶ କରିଥିଲେ ।