ଆଜି ଜାତୀୟ ଟୀକାକରଣ ଦିବସ; ରାଜ୍ୟବ୍ୟାପୀ ପଲ୍ସ ପୋଲିଓ କାର୍ଯ୍ୟକ୍ରମ

Polio Vaccination Drive: ଓଡ଼ିଶାକୁ ପୋଲିଓ ମୁକ୍ତ କରିବା ପାଇଁ ପ୍ରୟାସ ଜାରି ରଖିଛନ୍ତି ସରକାର । ଅପହଞ୍ଚ ଦୁର୍ଗମ ଅଞ୍ଚଳର ଶିଶୁଙ୍କ ପାଖରେ ପହଞ୍ଚିଛି ଟ୍ରାଞ୍ଜିଟ୍ ଓ ମୋବାଇଲ ଟିମ୍ । ଅଧିକ ପଢନ୍ତୁ

ଭୁବନେଶ୍ବର:ଆଜି (ମାର୍ଚ୍ଚ 3 ତାରିଖ) ଜାତୀୟ ଟୀକାକରଣ ଦିବସ । ଅପହଞ୍ଚ ଦୁର୍ଗମ ଅଞ୍ଚଳର ଶିଶୁଙ୍କ ପାଖରେ ପହଞ୍ଚିଛି ଟ୍ରାଞ୍ଜିଟ୍ ଓ ମୋବାଇଲ ଟିମ୍ । ଓଡ଼ିଶାରୁ ପୋଲିଓ ମୁକ୍ତ କରିବା ପାଇଁ ସରକାରଙ୍କ ଏହା ଏକ ବଡ଼ ପ୍ରୟାସ । ସମସ୍ତ ଶିଶୁଙ୍କୁ ପୋଲିଓ ମୁକ୍ତ କରିବା ପାଇଁ ଦୁଇ ବୁନ୍ଦା ଦିଆଯାଉଛି । ମହାମାରୀ ଭାବେ ଏକଦା ସମଗ୍ର ମାନବ ସମାଜକୁ କବଳିତ କରିଥିଲା ପୋଲିଓ । ଏହି ରୋଗ ବିପକ୍ଷରେ ଲଢେଇ ପାଇଁ ସଚେତନତା ଉଦ୍ଦେଶ୍ୟରେ ପ୍ରତିବର୍ଷ ମାର୍ଚ୍ଚ 3 ତାରିଖକୁ ଜାତୀୟ ଟୀକାକରଣ ଦିବସ ପାଳନ କରାଯାଉଛି । ପୋଲିଓ ଟୀକାକରଣ ଓ ପୋଲିଓର ମୂଳପୋଛ ଏହି ଦିନ ପାଳନର ମୁଖ୍ୟ ଲକ୍ଷ୍ୟ ।

ପଲସ ପୋଲିଓ ଅଭିଯାନର ସଫଳତା ପାଇଁ ପ୍ରସ୍ତୁତି କରିଛନ୍ତି ରାଜ୍ୟ ସରକାର । ରାଜ୍ୟରେ 5 ବର୍ଷ ବୟସର ସମୁଦାୟ 4 ଲକ୍ଷ 71ହଜାର 617 ଜଣ ଶିଶୁଙ୍କୁ ପୋଲିଓ ବୁନ୍ଦା ଖୁଆଇବା ପାଇଁ 19ହଜାର 557 ଟି ବୁଥ କରାଯାଇଛି । ଏହି ଅଭିଯାନରେ ତାଲିମ ପ୍ରାପ୍ତ 78ହଜାର 228 ଜଣ କର୍ମୀଙ୍କ ସହିତ 3ହଜାର 789 ଜଣ ସୁପରଭାଇଜର, ସମୁଦାୟ 39ହଜାର 268 ଟି ଟିମ ନିୟୋଜିତ କରାଯାଇଛି । ଅପହଞ୍ଚ ଦୁର୍ଗମ କିମ୍ବା କୌଣସି ସ୍ଥାନକୁ ଯାତ୍ରା କରୁଥିବା ଶିଶୁଙ୍କ ଟୀକାକରଣ ପାଇଁ 1ହଜାର 149 ଟି ଟ୍ରାଞ୍ଜିଟ୍ ଟିମ ସହ 665 ଟି ମୋବାଇଲ ଟିମ୍ ମଧ୍ୟ ପ୍ରସ୍ତୁତ କରାଯାଇଛି।

ବିଶେଷ ଭାବରେ ପୋଲିଓ ଦୁଇ ପ୍ରକାର ଦେଖାଯାଏ । କେନ୍ଦ୍ରୀୟ ସ୍ନାୟୁ ମଣ୍ଡଳ ଆକ୍ରମିତ ନ ହୋଇ ଅଳ୍ପ ଅସୁସ୍ଥତା ଏବଂ ମୁଖ୍ୟ ପୋଲିଓ । ସୂଚନା ଅନୁସାରେ, ମୁଖ୍ୟ ପୋଲିଓ ମଧ୍ୟ ଦୁଇ ପ୍ରକାରର । ଗୋଟିଏ ପଙ୍ଗୁତ୍ୱ ଓ ଅନ୍ୟଟି ପଙ୍ଗୁତ୍ୱବିହୀନ ହୋଇଥାଏ । ଅଧିକାଂଶ ଜନସାଧାରଣ ଯାହାଙ୍କର ପ୍ରତିରୋଧକ ଶକ୍ତି ଯଥେଷ୍ଟ ଅଛି, ସେମାନେ ଲକ୍ଷଣ ବିହୀନ ହୁଅନ୍ତି । କ୍ୱଚିତ ସ୍ୱଳ୍ପ ଲକ୍ଷଣଯୁକ୍ତ ପୋଲିଓ ଦେଖାଯାଏ । ଯେଉଁଥିରେ ତଣ୍ଟି ପୀଡ଼ା, ବାନ୍ତି ଲାଗିବା, ପେଟରେ କଷ୍ଟ ହେବା, କୋଷ୍ଠ କାଠିନ୍ୟ, ବେଳେବେଳେ ତରଳ ଝାଡା ଓ ଇନଫ୍ଲୁଏଞ୍ଜା ଭଳି ଲକ୍ଷଣ ଦେଖାଯାଇଥାଏ । ପ୍ରାୟ ୩ ପ୍ରତିଶତ ପୋଲିଓ ରୋଗୀଙ୍କର ଦେହରେ ସ୍ନାୟୁ ମଣ୍ଡଳରେ ଭୁତାଣୁ ପ୍ରବେଶ କରିଥାଏ । ସେଥିରୁ ଅଧିକାଂଶ ଲୋକଙ୍କର ଆସେପ୍ଟିକ୍ ମେନିଞ୍ଜାଇଟିସ୍ ହୋଇ ମୁଣ୍ଡ ବଥା, ବେକ, ପିଠି, ପେଟରେ ଯନ୍ତ୍ରଣା, ଜ୍ବର, ବାନ୍ତି, ଅଳସୁଆମି ଓ ବିରକ୍ତିଭାବ ପ୍ରକାଶ ପାଏ । ଏମାନଙ୍କ ମଧ୍ୟରୁ ପ୍ରତି ୧ ହଜାରରେ ୧ ରୁ ୫ ଜଣଙ୍କର ପାରାଲିସିସ୍ ବା ପଙ୍ଗୁତ୍ୱ ହୁଏ । ଯେତେବେଳେ ମାଂସପେଶୀ ଦୁର୍ବଳ ହୁଏ, ନିୟନ୍ତ୍ରଣ ରହେ ନାହିଁ ଓ ସମ୍ପୂର୍ଣ୍ଣ ପାରାଲିସିସ୍ ହୋଇଯାଏ ।

ଇଟିଭି ଭାରତ, ଭୁବନେଶ୍ବର