ରାଉରକେଲା: ୨୦୨୪ ନିର୍ବାଚନ ନେଇ ରାଜ୍ୟରେ ସରଗରମ ରାଜ୍ୟ ରାଜନୀତି । ୩ ପ୍ରମୁଖ ଦଳର ନେତା କର୍ମୀମାନେ ଭୋଟରଙ୍କୁ ମନାଇବାରେ ଲାଗିପଡିଥିବା ବେଳେ ପ୍ରଚାରରେ କମ୍ପୁଛି ମୈଦାନ । ତେବେ ଏଥର ରାଉରକେଲାରେ ରାଜନୀତି ପାଣିପାଗ ଜୋରଦାର ହେବାରେ ଲାଗିଛି । ରାଉରକେଲା ବିଜେପି ବିଧାନସଭା ପ୍ରାର୍ଥୀ ଦିଲ୍ଲୀପ ରାୟ ଆଜି ସହରର ପାନପୋଷ ଅଞ୍ଚଳରେ ନିଜ ସମର୍ଥକମାନଙ୍କ ସହ ମିଶି ପ୍ରଚାର ଆରମ୍ଭ କରିଛନ୍ତି । ଏହି ସମୟରେ ଇଟିଭି ଭାରତକୁ ପ୍ରତିକ୍ରିୟା ଦେଇ କହିଛନ୍ତି ଯେ, ସେ ଲୋକଙ୍କ ସପକ୍ଷରେ ସେମାନଙ୍କ ମୌଳିକ ସମସ୍ୟାକୁ ମୁଦ୍ଦା କରି ନିର୍ବାଚନ ଲଢୁଛନ୍ତି । ନିର୍ବାଚନ ଜିତିଲେ ଲୋକଙ୍କ ମୌଳିକ ସମସ୍ୟା ପୂରଣ କରିବେ ବୋଲି କହିଛନ୍ତି ।
ଏହା ମଧ୍ୟ ପଢନ୍ତୁ:କିଏ କରିଛି ରାଉରକେଲାର ବିକାଶ ? କଥା କଟାକଟି ହେଲେ ବିଜେପି-ବିଜେଡି-କଂଗ୍ରେସ
ରାଉରକେଲା ନିର୍ବାଚନ ମଣ୍ଡଳୀର ବିଜେପିର ବିଜୟ ନିଶ୍ଚିତ କରିବା ପାଇଁ ବିଜେପି ବିଧାୟକ ଦିଲ୍ଲୀପ ରାୟ କର୍ମୀଙ୍କ ବିପୁଳ ପ୍ରୟାସ ଜାରି ରହିଛି । ଏକ ବିଶାଳ ରାଲି କରି ନିଜର ଶକ୍ତି ପ୍ରଦର୍ଶନ କରିଛନ୍ତି ଦିଲ୍ଲୀପ ରାୟ । ଲୋକଙ୍କ ସମର୍ଥନରେ ବିଶ୍ୱାସ ପ୍ରକଟ କରି ସୂଚନା ଦେଇଛନ୍ତି ଯେ, ଲୋକେ ପରିବର୍ତ୍ତନ ଚାହୁଁଛନ୍ତି । ଏଣୁ ଜନସାଧାରଣ ଏବଂ ଭୋଟର ଭାଇ ଭଉଣୀ ଏବଂ ଲୋକ ମାନଙ୍କ ଆଶୀର୍ବାଦ ତାଙ୍କୁ ଏହି ନିର୍ବାଚନରେ ବିଜୟ ଆଡ଼କୁ ଆଗେଇ ନେବ ନିଶ୍ଚିତ । ତେବେ ରାଜ୍ୟ ସରକାର ରାଜ୍ୟର ବିକାଶ ପାଇଁ କିଛି କରି ନାହାନ୍ତି ଏବଂ କେନ୍ଦ୍ର ସରକାରଙ୍କ ବିକାଶ ଧାରାରେ ଓଡିଶାକୁ ସମ୍ପୂର୍ଣ୍ଣ ସାମିଲ କରିବାକୁ ଚେଷ୍ଟା କରାଯାଉଛି ବୋଲି କହିଛନ୍ତି ଦିଲ୍ଲୀପ ରାୟ । ଏଥର ଏଠାରେ ନିଶ୍ଚିତ ବିଜେପି ବିଜୟ ନେଇ ଆଶାବାଦୀ ଥିବା ସେ କହିଛନ୍ତି ।