ଭୁବନେଶ୍ବର: ନାହିଁ ନାହିଁରେ ଚାଲିଛି ଆଦର୍ଶ ବିଦ୍ୟାଳୟ । ଏହାକୁ ନେଇ ଆଦର୍ଶ ବିଦ୍ୟାଳୟ ଶିକ୍ଷକ ମାନଙ୍କ ମଧ୍ୟରେ ଦେଖାଦେଇଛି ଅସନ୍ତୋଷ । ଏଥି ପାଇଁ ଆଦର୍ଶ ବିଦ୍ୟାଳୟ ଶିକ୍ଷକ ମହାସଂଘ ପକ୍ଷରୁ ଆୟୋଜିତ ହୋଇଛି ଶାନ୍ତିପୂର୍ଣ୍ଣ ବିଶାଳ ସମାବେଶ ଓ ଗଣଧାରଣା । ମହାସଂଘ ପକ୍ଷରୁ ୫ ଗୋଟି ଦାବି ଉପସ୍ଥାପନା କରାଯାଇଛି । ପ୍ରଥମ ଦାବି ସ୍ବରୂପ, ଚାଲୁଥିବା ଗ୍ରେଡେସନ ତାଲିକାରେ ବିଳମ୍ବ ନକରି ସମସ୍ତ ପ୍ରକାରର କର୍ମଚାରୀଙ୍କ ପାଇଁ ୟୁନିଫର୍ମ କ୍ୟାଡ଼ର ନିୟମ ଲାଗୁ କରିବା । ଦ୍ଵିତୀୟରେ ରାଜ୍ୟ ସରକାରଙ୍କ କର୍ମଚାରୀଙ୍କ ପରି ସମାନ ସୁଯୋଗ ଏବଂ ସୁବିଧା ପ୍ରଦାନ କିମ୍ବା ସମସ୍ତ ଆଦର୍ଶ ବିଦ୍ୟାଳୟ ଗୁଡ଼ିକୁ ସରକାରୀ ଭାବରେ ଘୋଷଣା କରିବା । ଯାହା ସିବିଏସଇ ନିୟମ ଅନୁଯାୟୀ, ଆଦର୍ଶ ବିଦ୍ୟାଳୟ ଗୁଡ଼ିକ ସିଧାସଳଖ ବିଦ୍ୟାଳୟ ଓ ଗଣଶିକ୍ଷା ବିଭାଗ ଦ୍ଵାରା ପରିଚାଳିତ ହେବା ପାଇଁ ଲିପିବଦ୍ଧ ହେବ ।
ତୃତୀୟରେ ଏକାଦଶ ଶ୍ରେଣୀ ଓ ଦ୍ବାଦଶ ଶ୍ରେଣୀ ପାଇଁ କଳା ବିଭାଗ ଖୋଲିବା ସହ କ୍ରୀଡା ଶିକ୍ଷକ, କମ୍ପ୍ୟୁଟର ଶିକ୍ଷକ ଏବଂ ମ୍ୟୁଜିକ ଶିକ୍ଷକ ମାନେ ଅନ୍ୟ TGTର ସମାନ ସ୍ତରରେ ଅଛନ୍ତି କିନ୍ତୁ ସେମାନଙ୍କୁ ସମାନ ଦରମା ଦିଆଯାଇନଥାଏ । ତେଣୁ ମହାସଂଘ କହିଛି ଯେ ଏହି ଶିକ୍ଷକ ମାନଙ୍କର ବେତନର ଗ୍ରେଡ଼ ବୃଦ୍ଧି କରିବାକୁ ଦାବି ରଖିଛି । ଏହା ସହ ପଞ୍ଚମ ଦାବି ରହିଛି ଯେ, କନିଷ୍ଠ କିରାଣୀ ମାନଙ୍କର ଚାକିରିକୁ ନିୟମିତ କରାଯାଉ । ସୂଚନା ଅନୁଯାୟୀ, ରାଜ୍ୟରେ ଇଂରାଜୀ ମାଧ୍ୟମ ଶିକ୍ଷାର ବ୍ୟାପକ ପ୍ରସାର ପାଇଁ ରାଜ୍ୟ ସରକାରଙ୍କ ଦ୍ବାରା ବ୍ଲକ୍ ଅନୁଯାୟୀ ଏପର୍ଯ୍ୟନ୍ତ ୩୨୦ଟି ଓଡ଼ିଶା ଆଦର୍ଶ ବିଦ୍ୟାଳୟ ପ୍ରତିଷ୍ଠା କରାଯାଇଛି । ଏହି ବିଦ୍ୟାଳୟରେ ପ୍ରଶାସନିକ କାର୍ଯ୍ୟ ପାଇଁ ଜଣେ ଲେଖାଏଁ କନିଷ୍ଠ କିରାଣୀ ତଥା ହିସାବ ରକ୍ଷକ ପଦ ଠିକାରେ ସୃଷ୍ଟି କରାଯାଇଥିବା ବେଳେ ଭୁବନେଶ୍ବର ଉତ୍କର୍ଷ ଆଦର୍ଶ ବିଦ୍ୟାଳୟ ପାଇଁ ଦୁଇଟି, ସର୍ବମୋଟ ୩୨୧ଟି ପଦ ସୃଷ୍ଟି ହୋଇଛି ।