ରାଉରକେଲା: NIT ରାଉରକେଲାରେ ଛାତ୍ରଛାତ୍ରୀ ଅସନ୍ତୋଷ । ବର୍ଦ୍ଧିତ ଫି ସତ୍ତ୍ବେ ହଷ୍ଟେଲ ମେସରେ ନିମ୍ନମାନର ଖାଦ୍ୟ ମିଳୁଥିବାରୁ ଆନ୍ଦୋଳନକୁ ଓଲ୍ଲାଇଛନ୍ତି ଛାତ୍ରଛାତ୍ରୀ । ତେବେ ରାଉରକେଲା NITର ମେସଗୁଡିକରେ ନିମ୍ନମାନର ଖାଦ୍ୟ ପରଷା ଯାଉଥିବା ଅଭିଯୋଗ ନେଇ ଅତୀତରେ ଅନେକ ଥର ଛାତ୍ର ଅଶାନ୍ତି ସୃଷ୍ଟି ହୋଇଛି । ଏବେ ପୁଣି ଏହି ଘଟଣାର ପୁନରାବୃତ୍ତି ହୋଇଛି । ସେମିଷ୍ଟର ପିଛା ପ୍ରତ୍ୟେକ ଛାତ୍ରଛାତ୍ରଙ୍କ ଖାଇବା ଖର୍ଚ୍ଚ ୧୭ ହଜାରରୁ ୨୦ ହଜାରକୁ ବୃଦ୍ଧି କରାଯାଇଛି । ହେଲେ ସେହି ଅନୁଯାୟୀ ମେସ୍ ତଦାରଖ ଦାୟିତ୍ଵରେ ଥିବା ଅଧିକାରୀ ଖାଦ୍ୟର ପରିମାଣ ଓ ମାନ ବୃଦ୍ଧି କରୁନଥିବା ଅଭିଯୋଗ ହୋଇଛି ।
ଗତ ଜାନୁଆରୀ ମାସରୁ ଏଭଳି ସମସ୍ୟା ଲାଗି ରହିଛି । ଯାହାର ପ୍ରତିବାଦରେ ଶନିବାର ଶହ ଶହ ଛାତ୍ରଛାତ୍ରୀ ମୁଖ୍ୟ ୱାର୍ଡେନଙ୍କ କାର୍ଯ୍ୟାଳୟ ଆଗରେ ଧାରଣା ଦେବା ସହ ବିକ୍ଷୋଭ କରିଥିଲେ । ରାତି ପ୍ରାୟ ୯ଟା ପର୍ଯ୍ୟନ୍ତ ଧାରଣା ଜାରି ରହିଥିଲା । ଯାହାର ଭିଡ଼ିଓ ସୋସିଆଲ ମିଡ଼ିଆରେ ଭାଇରାଲ ହେଉଛି । ଉତ୍ତେଜିତ ଛାତ୍ରଛାତ୍ରୀ ୱାର୍ଡେନଙ୍କୁ ଘେରିଥିଲେ ଏବଂ ଭିଡିଓରେ ପିଲାଙ୍କ ସହ NITର ପ୍ରଫେସର ପାଟିତୁଣ୍ଡ କରୁଥିବା ମଧ୍ୟ ଦେଖିବାକୁ ମିଳିଛି । ତେବେ ପୂର୍ବ ମେସ୍ ଫି ଅପେକ୍ଷା ଅଧିକ ୩ ହଜାର ଟଙ୍କା ବୃଦ୍ଧି କରାଯାଇଥିଲେ ମଧ୍ୟ ଖାଦ୍ୟର ପରିମାଣ ଓ ମାନ ବୃଦ୍ଧି କରାଯାଉନାହିଁ କାହିଁକି ବୋଲି ଛାତ୍ରଛାତ୍ରୀ ୱାର୍ଡେନଙ୍କୁ ପ୍ରଶ୍ନ କରିଥିଲେ ।
କେବଳ ସେତିକି ନୁହେଁ, ବର୍ଦ୍ଧିତ ୩ ହଜାର ଟଙ୍କା ମେସ୍ ଚଳାଉଥିବା ଠିକା ସଂସ୍ଥାକୁ ଦିଆଯାଉ ନାହିଁ ତ କୁଆଡ଼େ ଯାଉଛି ବୋଲି ପଚାରିଥିଲେ । ହେଲେ ୱାର୍ଡେନ ଛାତ୍ରଛାତ୍ରୀଙ୍କୁ କୌଣସି ସନ୍ତୋଷଜନକ ଉତ୍ତର ଦେଇନଥିଲେ ବରଂ କାହିଁକି ଏଠାରେ ଧାରଣା ବସିଛ, ତୁମକୁ ପ୍ରତିବାଦ କରିବାକୁ କିଏ କହିଲା ବୋଲି ଓଲଟା ଧମକଚମକ ଦେଇଥିଲେ ବୋଲି ଛାତ୍ରଛାତ୍ରୀ ଅଭିଯୋଗ କରିଛନ୍ତି ।