ପୁରୀ: ନିର୍ବାଚନ ଆଉ କିଛି ଦିନ ଥିବା ବେଳେ ଏବେ ନିମାପଡା ନିର୍ବାଚନ ମଣ୍ଡଳୀରେ ପ୍ରଚାର ଜୋର ଧରିଲାଣି । ନେତାମାନେ ଭୋଟରଙ୍କୁ ଆକୃଷ୍ଟ କରିବା ପାଇଁ କିଏ କେତେ ଯୋଜନା କରିବେ ବୋଲି ପ୍ରଲୋଭନ ଦେଖାଉଥିବା ବେଳେ କଂଗ୍ରେସ ପ୍ରାର୍ଥୀ ସିଦ୍ଧାର୍ଥ ରାଉତରାୟ ଏକ ପ୍ରେସମିଟ ଆୟୋଜନ କରିଛନ୍ତି । ଏହି ସମୟରେ ସେ ନିମାପଡ଼ା ପାଇଁ ଇସ୍ତାହାର ସମ୍ପର୍କରେ କହିଛନ୍ତି । ଏଥିସହ ସେ ୨୫ ବର୍ଷ ଶାସନରେ ବିଜେଡ଼ି ନିମାପଡା ପାଇଁ କଣ କରିଛି ବୋଲି ପ୍ରଶ୍ନ କରିବା ସହ ଲୋକଙ୍କୁ ଚେତିବାକୁ କହିଛନ୍ତି ।
ସେ କହିଛନ୍ତି, ନିମାପଡା ନିର୍ବାଚନ ମଣ୍ଡଳୀ ଜନସାଧାରଣଙ୍କର ଅନେକ ସମସ୍ୟା ରହିଛି । ନିମାପଡାରେ କଂଗ୍ରେସ କ୍ଷମତାକୁ ଆସିଲେ ଦୀର୍ଘ ଦିନ ଧରି ରହିଥିବା ସମସ୍ୟାକୁ ସୁଧାରିବା ସହ ନିମାପଡାକୁ ଏକ ବ୍ରାଣ୍ଡ କରାଯିବ । ନିମାପଡାରେ ଶିକ୍ଷା ବ୍ୟବସ୍ଥା ବିପର୍ଯ୍ୟସ୍ତ ହୋଇପଡ଼ିଥିବା ବେଳେ ସ୍ୱାସ୍ଥ୍ୟ ବିଭାଗ କଥା ନ କହିଲେ ଭଲ । ନିମାପଡା ଡାକ୍ତରଖାନାରେ ଜଣେ ଡ଼ାକ୍ତର ୫୦୦ରୁ ଊର୍ଦ୍ଧ୍ବ ରୋଗୀ, ଶୀତଳ ଭଣ୍ଡାର ନାହିଁ । ଅନେକ ସମସ୍ୟା ରହିଛି । ଏପରି ସ୍ଥିତିରେ ବିଜେଡି ସରକାର ଦୀର୍ଘ ଦିନ ହେବ ନିମାପଡାରେ କ୍ଷମତାରେ ଥିବା ବେଳେ କ'ଣ କରିଛି ବୋଲି ସେ ପ୍ରଶ୍ନ କରିଛନ୍ତି । ଏଥିପାଇଁ ସେ ଲୋକଙ୍କୁ ଚେତିବାକୁ ମଧ୍ୟ କହିଛନ୍ତି । ଭାବିଚିନ୍ତି ନେତା ବାଛିବାକୁ ଅନୁରୋଧ କରିଛନ୍ତି ।