ମାଲକାନଗିରି: ମାଓ ଡମ୍ପ ଠାବ କଲା ବିଏସଏଫ(BSF) ଯବାନ । ମାଲକାନଗିରି କାଲିମେଳା ଥାନା ଅନ୍ତର୍ଗତ ଭେଜଙ୍ଗୱାଡା ଜଙ୍ଗଲରୁ ବିଏସଏଫ (BSF) ଯବାନମାନେ ମାଓ କ୍ୟାମ୍ପ ଏବଂ ଡମ୍ପ ଠାବ କରିଛନ୍ତି । ବୋଡିଗେଟା BSF କ୍ୟାମ୍ପ ତରଫରୁ ସର୍ଚ୍ଚ ଅପରେସନ ସମୟରେ ଏହି ମାଓ ଡମ୍ପ ଠାବ କରାଯାଇଥିବା ବେଳେ ବିପୁଳ ପରିମାଣର ବିସ୍ଫୋରକ ସାମଗ୍ରୀ ଏବଂ ଅସ୍ତ୍ରଶସ୍ତ୍ର ଜବତ କରିଛି ସୁରକ୍ଷା ବାହିନୀ ।
ମାଓ ସାମଗ୍ରୀ ଜବତ:
କାଲିମେଳା ବ୍ଲକ ତେଲରାଇ ପଞ୍ଚାୟତ ଦୟଲଗୁନ୍ଥି ସ୍ଥିତ ଜଙ୍ଗଲରେ ଠାବ ହୋଇଛି ମାଓ ଡମ୍ପ । ଏହାସହ ୩ଟି ଟିଫିନ ବୋମା, ଜିଲାଟିନ, ବିଦ୍ୟୁତ ତାର, ମାଓ ପୋଷାକ, ମାଓ ପୁସ୍ତକ ଭଳି ୧୭ରୁ ଊର୍ଦ୍ଧ୍ବ ସାମଗ୍ରୀ ଜବତ କରାଯାଇଛି । ସୂଚନାଯୋଗ୍ୟ, ଭେଜଙ୍ଗୱାଡା ସଂରକ୍ଷିତ ଜଙ୍ଗଲ ନକ୍ସଲଙ୍କ ଗଡ଼ ଥିଲା। ଏଠାରେ ନକ୍ସଲ ବହୁ ଡମ୍ପ କରି ମାଓ ସାମଗ୍ରୀ ଓ ବିସ୍ଫୋରକ ଲୁଚାଇ ରଖିଛନ୍ତି। ପୂର୍ବରୁ ମଧ୍ୟ ବହୁବାର ଏହି ଜଙ୍ଗଲରୁ BSF ଯବାନମାନେ ମାଓ ଡମ୍ପ ଠାବ କରିଛନ୍ତି । ମାଓବାଦୀମାନେ ସୁରକ୍ଷା କର୍ମୀଙ୍କୁ ଟାର୍ଗେଟ୍ କରି ଏହି ବିସ୍ଫୋରକ ଓ ମାଓ ସାମଗ୍ରୀ ଲୁଚାଇ ରଖିଥିବା ସନ୍ଦେହ କରାଯାଉଛି । BSF ପକ୍ଷରୁ ମାଓ ଦମନ ଓ ସୁରକ୍ଷା ଉପରେ ଗୁରୁତ୍ବ ଦିଆଯାଇଛି ।
BSF ଆଇଜିଙ୍କ ମାଲକାନଗିରି ଏବଂ କୋରାପୁଟ ଗସ୍ତ:
ମାଲକାନଗିରି ଏବଂ କୋରାପୁଟ ଜିଲ୍ଲାକୁ 4 ଦିନିଆ ଗସ୍ତରେ ଆସିଥିଲେ ବିଏସଏଫ ଆଇଜି ରୁରୁଜ ଅଗ୍ରୱାଲ । ମାଓ ଦମନ ଏବଂ ସୁରକ୍ଷା ସ୍ଥିତିର ସମୀକ୍ଷା କରି ସେ ଫେରିଯାଇଛନ୍ତି । ଏହାସହ ଆଇଜି (ଅପରେସନ) ସଞ୍ଜୟ ଯାଦବ ଏବଂ ଡିଆଇଜି ସତ୍ୟବାନ ଖାନଚି (ମାଲକାନଗିରି/କୋରାପୁଟ ବିଏସଏଫ ସେକ୍ଟର ମୁଖ୍ୟାଳୟ) ଏକ ସ୍ବତନ୍ତ୍ର ହେଲିକପ୍ଟର ଯୋଗେ ସ୍ଵାଭିମାନ ଅଞ୍ଚଳର ଗୋରା ସେତୁ ବିଏସଏଫ କ୍ୟାମ୍ପରେ ଓହ୍ଲାଇଥିଲେ । ସେଠାରେ ଅନ୍ୟ ବିଏସଏଫ ଅଧିକାରୀ ଏବଂ ସୁରକ୍ଷା ବଳଙ୍କ ସହ ଜିଲ୍ଲାରେ ମାଓ ଗତିବିଧି, ସୁରକ୍ଷା ସ୍ଥିତି ଏବଂ ମାଓ ଦମନ ନେଇ ସ୍ଵତନ୍ତ୍ର ରଣନୀତିର ସମୀକ୍ଷା କରିଥିଲେ । ଯବାନଙ୍କ ମନୋବଳ ବଢ଼ାଇବା ସହ ଅନେକ ପ୍ରତିକୂଳ ପରିସ୍ଥିତିରେ ମଧ୍ୟ ତ୍ୟାଗ ଏବଂ ନିଷ୍ଠାର ସହ ନିଜ ଦାୟିତ୍ଵ ସମ୍ପନ୍ନ କରିବାକୁ ପରାମର୍ଶ ଦେଇଛନ୍ତି ଆଇଜି ।